បន្ទាប់ពីអ្នកលេងបណ្តាញសង្គម ហ្វេកប៊ុកបង្ហោះរឿង ឈូសឆាយដីនៅក្នុងស្រុកឱរ៉ាល់ រដ្ឋបាលខេត្តកំពង់ស្ពឺ បានចេញសេចក្តីបំភ្លឺព័ត៌មាន
កំពង់ស្ពឺ: កាលពីល្ងាចថ្ងៃទី១០ ខែកក្កដា ឆ្នាំ២០២៥នេះ រដ្ឋបាលខេត្តកំពង់ស្ពឺ សូមជម្រាបជូនដល់បងប្អូន និងសាធារណជនទាំងអស់ ឱ្យបានជ្រាបថា ថ្មីៗនេះ មានបណ្តាញសង្គមហ្វេសប៊ុកមួយចំនួន បង្ហោះដោយមានខ្លឹមសារ” ស្នើសុំការ អន្តរាគមន៍…..ជាពិសេសនេះ មិនមែន ករណីកាត់ឆ្កៀលដីឱ្យប្រជាពលរដ្ឋ នៅតំបន់ភ្នំឱរ៉ាល់ខេត្តកំពង់ស្ពឺនោះទេ នេះគឺជាការរៀបចំ ដើម្បីយក ដីធ្វើជាកម្មសិទ្ធិ…។
ពាក់ព័ន្ធនឹងករណីនេះ រដ្ឋបាលខេត្តកំពង់ស្ពឺ សូមធ្វើការបដិសេធ ចំពោះការបង្ហោះព័ត៌មានគ្មានមូលដ្ឋានត្រឹមត្រូវច្បាស់លាស់ ក្នុងន័យបំភ្លៃបំផ្លើស បង្អួចបង្កាច់ ចេតនាញុះញង់ បង្កប់នូវគំនិតទុច្ចរិត ធ្វើឱ្យសាធារណមតិ មានការយល់ច្រឡំ និងប៉ះពាល់ដល់កិត្តិយស សេចក្តីថ្លៃថ្នូរ មកលើថ្នាក់ដឹកនាំខេត្ត និងមន្ទីរជំនាញអាជ្ញាធរពាក់ព័ន្ធ ដែលបានខិតខំប្រឹងប្រែង អនុវត្តកិច្ចការងារ យ៉ាងសកម្មក្នុងការចូលរួមចំណែកអភិវឌ្ឍសង្គម សេដ្ឋកិច្ច ខេត្តកំពង់ស្ពឺ។ ក្នុងន័យនេះ ក្នុងនាមរដ្ឋបាលខេត្តកំពង់ស្ពឺ បានយកចិត្តទុកដាក់ខ្ពស់ ក្នុងការអភិរក្សតំបន់សហគមន៍ នៃដែនជម្រកសត្វព្រៃភ្នំឱរ៉ាល់ ក្នុងស្រុកឱរ៉ាល់ តាមរយៈការផ្សព្វផ្សាយច្បាប់ភូមិបាល និងលិខិតបទដ្ឋានគតិយុត្ត ជាធរមាន ស្របតាមក្រមបរិស្ថាន និងធនធានធម្មជាតិដល់ប្រជាពលរដ្ឋ ព្រមទាំង ពិនិត្យដោះស្រាយវិវាទដីធ្លី និងការចុះបញ្ជីដីធ្លីមានលក្ខណៈជាប្រព័ន្ធ ដើម្បីបានផ្តល់លទ្ធភាពចេញប័ណ្ណកម្មសិទ្ធិជូនប្រជាពលរដ្ឋ ដែលបាន កាន់កាប់ និងអាស្រ័យផលជាក់ស្តែង ឱ្យទទួលបានដីសម្រាប់បង្កបង្កើនផល លើកកម្ពស់កម្រិតជីវភាព របស់ ប្រជាពលរដ្ឋ ស្របពេលដែលរាជរដ្ឋាភិបាល បាននឹងកំពុងអនុវត្តកម្មវិធីផ្តល់ដី ការពារព្រៃ និងអភិវឌ្ឍន៍ដោយ ចីរភាពដល់ប្រជាពលរដ្ឋ។ ទន្ទឹមនឹងនេះ រដ្ឋបាលខេត្តនឹងបន្តចាត់វិធានការចំពោះបុគ្គលទាំងឡាយណាដែលរុករានទន្ទ្រានដីសាធារណៈរបស់រដ្ឋ។ ដូចនេះ រដ្ឋបាលខេត្តកំពង់ស្ពឺ ស្នើឱ្យអ្នកប្រើប្រាស់បណ្តាញសង្គម ធ្វើការផ្សព្វផ្សាយរាល់ព័ត៌មានទាំងឡាយ ត្រូវផ្អែកលើទិដ្ឋភាពច្បាប់ ធ្វើជាមូលដ្ឋានច្បាស់លាស់ ជៀសវាងកុំឱ្យសាធារណជន មានការភាន់ច្រឡំ ឬខុស ពីការពិតដោយគ្មានទឡីករណ៍ ផ្សារភ្ជាប់ជាមួយនឹងបទដ្ឋានគតិយុត្ត ដែលអាចប្រឈមនឹងផ្លូវច្បាប់ជាធរមាន និងស្នើឱ្យធ្វើការកែតម្រូវខ្លឹមសារ និងផ្សព្វផ្សាយឡើងវិញជាដាច់ខាត។
អាស្រ័យហេតុនេះ សូមសាធារណជនទាំងអស់ មេត្តាជ្រាបជាព័ត៌មាន៕ដោយ:apn
