ភ្នំពេញ:សម្ដេចតេជោ ហ៊ុន សែន ប្រធានព្រឹទ្ធសភា រំជួលចិត្ដរហូតស្រក់ទឹកភ្នែកនៅពេលបានឃើញនូវការស្វាគមន៍យ៉ាងកក់ក្ដៅពីសំណាក់ប្រជាជនកម្ពុជាគ្រប់មជ្ឈដ្ឋានចំពោះវីរយុទ្ធទាំង១៨នាក់ នេះជាស្មារតីសាមគ្គីដ៏ធំបំផុតរបស់ប្រជាជនកម្ពុជាដើម្បីជូននិងផ្ដល់កំលាំងចិត្ដដល់វីរយុទ្ធទាំង១៨នាក់ និងកងទ័ពកម្ពុជាទាំងអស់ដែលកំពុងឈរជើងនៅតាមបន្ទាត់ព្រំដែនពិសេសនៅសមរភូមិមុខ។
មានប្រសាន៍បែបនេះ នាឱកាស សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា អញ្ជើញជួបសំណេះសំណាលជាមួយវីរយុទ្ធជនកម្ពុជាទាំង១៨រូប ដែលបានធ្វើមាតុភូមិនិវត្តន៍មកមាតុប្រទេសវិញដោយសុខសុវត្ថិភាព នៅវិមាន៧មករា រាជធានីភ្នំពេញ នាព្រឹកថ្ងៃទី០១ ខែមករា ឆ្នាំ២០២៦។
យោងតាមលោក ជា ធីរិទ្ធ អ្នកនាំពាក្យ បានឲ្យដឹងថា សម្ដេចតេជោ ហ៊ុន សែន សម្ដែងក្ដីស្វាគមន៍ និងរីករាយចំពោះការធ្វើមាតុភូមិនិវត្ដន៍របស់យុទ្ធជនទាំង១៨រូបដែលបាន ជួបជុំក្រុមគ្រួសារវិញ និងបានមកដល់ប្រទេសកំណើតប្រកបដោយសុវត្ថិភាព។
នាឱកាសនោះសម្ដេចតេជោ ហ៊ុន សែន បានបង្ហាញពីការយល់អំពីអារម្មណ៍របស់វីរយុទ្ធជន និងក្រុមរបស់គាត់នូវការលំបាក ទុក្ខសោកនៃការព្រាត់ប្រាស់គ្នា ដែលសម្ដេចតេជោផ្ទាល់បានធ្លាប់ឆ្លងកាត់នូវពិសោធន៍ នៃការព្រាត់ប្រាស់គ្រួសារកាលពីពេលដែលសម្ដេចបានយកជីវិតជាដើមទុន ដើម្បីរំដោះប្រតេសជាតិចេញពីរបបប្រល័យពូជសាសន៍ប៉ុលពត ដូច្នេះសម្ដេចតេជោ បានយល់ការលំបាកគ្រប់យ៉ាងនៃក្រុមគ្រួសាររបស់វីរយុទ្ធជន និងការលំបាករបស់វីរជនទាំង១៨ផងដែរ។
ក្នុងជំនួប សម្ដេចតេជោ បានអរគុណរាជរដ្ឋាភិបាលដែលបានយកចិត្ដទុក្ខដាក់ជានិច្ចចំពោះសុខទុក្ខ និងអាយុជីវិត របស់វីរយុទ្ធជនរបស់យើង ហើយរូបសម្ដេចផ្ទាល់ក៏បានយកចិត្ដទុក្ខដាក់អំពីស្ថានភាពរបស់វីរយុទ្ធជនទាំង១៨នាក់ជានិច្ច ជាពិសេស សម្ដេចតេជោ មានប្រសាសន៍ថា ព្រះករុណា ព្រះមហាក្សត្រកម្ពុជា និងសម្ដេចម៉ែ ព្រះអង្គទាំងទ្វេរ យកព្រះទ័យទុកដាក់យ៉ាងខ្លាំងចំពោះសុខទុក្ខរបស់វីរកងទ័ពតាំង១៨នាក់ជាប់ជាប្រចាំ រួមទាំងវីរយុទ្ធជនទាំងអស់ដែលបានការពារនូវបន្ទាត់ព្រំដែនផងដែរ ដែលនេះជាការយកចិត្ដទុក្ខដាក់ពីសំណាក់ថ្នាក់ដឹកនាំគ្រប់លំដាប់ថ្នាក់នៃព្រះរាជាណាចក្រកម្ពុជា។
សម្ដេចតេជោ ហ៊ុន សែន ក៏បានបង្ហាញក្ដីរំភើបដែលកាលពីម្សិលមិញសម្ដេចតេជោបានឃើញវត្ដមានរបស់វីរយុទ្ធជនមកដល់ទឹកដីកម្ពុជា ហើយមានការផ្សាយបន្ដផ្ទាល់តាមគ្រប់ប្រព័ន្ធផ្សព្វផ្សាយ សម្ដេចមានអារម្មណ៍រំជួលចិត្ដរហូតស្រក់ទឹកភ្នែកនៅពេលបានឃើញនូវការស្វាគមន៍យ៉ាងកក់ក្ដៅពីសំណាក់ប្រជាជនកម្ពុជាគ្រប់មជ្ឈដ្ឋានចំពោះវីរយុទ្ធទាំង១៨នាក់ ដែលនេះជាស្មារតីសាមគ្គីដ៏ធំបំផុតរបស់ប្រជាជនកម្ពុជាដើម្បីជូននិងផ្ដល់កំលាំងចិត្ដដល់វីរយុទ្ធទាំង១៨នាក់ និងកងទ័ពកម្ពុជាទាំងអស់ដែលកំពុងឈរជើងនៅតាមបន្ទាត់ព្រំដែនពិសេសនៅសមរភូមិមុខ។
ចុងក្រោយនៃជំនួប សម្ដេចបានជូនពរដល់វិរយុទ្ធទាំង១៨ រូប និងក្រុមគ្រួសារជួបប្រទះតែសេចក្ដីសុខ សេចក្ដីចម្រើន និងបានរស់នៅជួបជុំក្រុមគ្រួសារនៅលើទឹកដីកំណើតរបស់ខ្លួនវិញ៕
ដោយ:KH.SP
