រដ្ឋលេខាធិការ ក្រសួងអភិវឌ្ឍន៍ជនបទ និង រដ្ឋបាលខេត្តឧត្តរមានជ័យចុះពិនិត្យស្ថានភាពហេដ្ឋារចនាសម្ព័ន្ធជនបទ ផ្លូវលំ ដែលរងការខូចខាតដោយសារជំនន់ទឹកភ្លៀងជាច្រើនកន្លែង
ខេត្តឧត្ដរមានជ័យ៖ នាព្រឹកថ្ងៃទី១២ខែតុលាឆ្នាំ២០២១នេះ ឯកឧត្តម អុិន ចន្ថា រដ្ឋលេខាធិការក្រសួងអភិវឌ្ឍន៍ជនបទ និងជាប្រធានលេខាធិការដ្ឋានគ្រប់គ្រងគ្រោះមហន្តរាយ តំណាង ឯកឧត្តមសភាចារ្យ អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ អមដំណើដោយ ឯកឧត្ដម ប៉ែន កុសល្យ អភិបាលខេត្តឧត្ដរមានជ័យ រួមទាំងក្រុមការងារ បានចុះពិនិត្យស្ថានភាពហេដ្ឋារចនាសម្ព័ន្ធជនបទ ផ្លូវលំក្រាលគ្រួសក្រហម ដែលរងផលប៉ះពាល់និងខូចខាត បាក់ស្រុត ដោយសារជំនន់ទឹកភ្លៀង ចំនួន២ខ្សែស្ថិតនៅត្រង់ចំណុច ត្រពាំងទ័ពសៀម ភូមិត្បែងចាស់ និងភូមិត្បែងថ្មី ឃុំអំពិលស្រុកបន្ទាយអំពិល ខេត្តឧត្ដរមានជ័យ។
ឯកឧត្ដម អុិន ចន្ថា រដ្ឋលេខាធិការ បានមានប្រសាសន៍លើកឡើងថា ការជួសជុលផ្លូវលំក្រាលក្រហមនេះឡើង គឺដើម្បីបង្កើតភាពងាយស្រួលដល់ប្រជាពលរដ្ឋមូលដ្ឋានក្នុងតំបន់នេះ ធ្វើដំណើរ និងដឹកកសិផលទៅលក់លើទីផ្សារ ជាពិសេសអនុវត្តន៍ទៅតាម យុទ្ធសាស្រ្ដ ពីរសំខាន់ៗ របស់ក្រសួងអភិវឌ្ឍន៍ជនបទ គឺ
ទី១-ចំពោះផ្លូវ ស្ពាន ដែលខូចធ្ងន់ធ្ងរ ឬដាច់ពុំអាចចរាចតណ៍បាន ត្រូវធ្វើការកែសម្រួលបន្ទាន់ដើម្បីភ្ជាប់ចរាចរណ៍ឡើងវិញ ។
ទី២-សិក្សាលម្អិតដើម្បីធ្វើការជួសជុលឲ្យមានលក្ខណៈរឹងមាំប្រកបដោយគុណភាព។
បើតាមការបញ្ជាក់ពី លោក ហេង សុអេង ប្រធានមន្ទីរអភិវឌ្ឍន៍ជនបទខេត្តឧត្តរមានជ័យ បានឲ្យដឹងថាផ្លូវលំដែលខូចខាតដោយសារជំនន់ភ្លៀង នឹងត្រូវជួសជុលឡើងវិញនេះមានជាង១៣គីឡូរម៉ែត្រមានព្រំប្រទល់ជាប់និងឃុំអំពិល ឃុំបេង ស្ថិតក្នុងស្រុកបន្ទាយអំពិល នៃខេត្តឧត្ដរមានជ័យ។
គួររំលឹកថា ផ្លូវលំដែលរងការខូតខាតដោយសារតែទឹកភ្លៀងនៅរដូវវស្សានេះនៅតាមបណ្តាឃុំស្រុកនានានោះក្នុងនាមរដ្ធបាលខេត្តឧត្តរមានជ័យទោះរវល់យ៉ាងណាក៏ដោយ។តែងតែយកចិត្តទុកដាក់ឲ្យតែមានការផ្តល់ពត៌មានពីអាជ្ញាធរឃុំស្រុកគឺលោកអភិបាលខេត្តតែងតែចាត់ឲ្យមន្ទីរជំនាញពាក់ព័ន្ធចុះទៅពិនិត្យមើលដល់កន្លែងជាក់ស្តែងតែម្តង ដើម្បីជួសជុលផ្លូវដែលខូចខាតឲ្យប្រជាពលរដ្ធនៅតាមមូលដ្ធាន ជាពិសេសគឺការធ្វើដំណើរទៅមកមានភាពងាយស្រួលជាប្រចាំផងដែរ៕
