អ្នកស្លាប់កើនដល់ ៤៤២នាក់ក្នុងគ្រោះមហន្តរាយធម្មជាតិនៅកោះស៊ូម៉ាត្រាឥណ្ឌូណេស៊ីខណ:ដែរ៤០២នាក់កំពុងបាត់ខ្លួន

ឥណ្ឌូណេស៊ី:គិតត្រឹមថ្ងៃចន្ទ ទី០១ ខែធ្នូ ឆ្នាំ ២០២៥ គ្រោះមហន្តរាយធម្មជាតិ ដូចជាទឹកជំនន់និងការរអិលបាក់ដីនៅកោះស៊ូម៉ាត្រា ប្រទេសឥណ្ឌូណេស៊ី បានសម្លាប់មនុស្ស ៤៤២នាក់ ខណៈ៤០២នាក់ផ្សេងទៀតកំពុងបាត់ខ្លួន នេះបើយោងតាមរបាយការណ៍របស់ទីភ្នាក់ងារគ្រប់គ្រងគ្រោះមហន្តរាយជាតិឥណ្ឌូណេស៊ី ហៅកាត់ថា BNPB ដែលដកស្រង់ដោយសារព័ត៌មានក្នុងស្រុក Asia Today ។
តំបន់ដែលរងគ្រោះធ្ងន់ធ្ងរជាងគេ រួមមាន ខេត្តស៊ូម៉ាត្រាខាងជើង, ខេត្តអាឆេ (Ache) និងខេត្តស៊ូម៉ាត្រាខាងលិច ជាទីដែលប្រជាជនរាប់ពាន់នាក់បានផ្លាស់ទីលំនៅ។ ហេដ្ឋារចនាសម្ព័ន្ធនានា រួមមានផ្លូវថ្នល់និងស្ពានរងនូវការខូចខាតខ្លាំងនៅក្នុងស្រុកនិងក្រុងជាច្រើន ដែលពិតជាលំបាកសម្រាប់ក្រុមជួយសង្គ្រោះក្នុងការធ្វើដំណើរទៅឱ្យដល់ទីតាំងរងផលប៉ះពាល់ ។
ប្រធានាធិបតី លោក ប្រាបូវ៉ូ ស៊ូប៊ីអាន់តូ (Prabowo Subianto) បានធ្វើដំណើរទៅកាន់តំបន់គ្រោះមហន្តរាយ ដើម្បីត្រួតពិនិត្យការងារជួយសង្គ្រោះ និងធានាការដឹកជញ្ជូនជំនួយឱ្យបានរហ័ស ហើយរដ្ឋាភិបាល ក៏បានបញ្ជូនឧទ្ធម្ភាគចក្រ យន្តហោះ និងសម្ភារៈសង្គ្រោះបន្ទាន់ផងដែរ ទៅកាន់សហគមន៍ដាច់ស្រយាល ។
ទីភ្នាក់ងារជាតិនិងទាហាន កំពុងតែធ្វើការជាមួយគ្នាដើម្បីបោសសម្អាតកម្ទេចកម្ទី ស្តារបណ្ដាញថាមពលអគ្គិសនីនិងទឹកស្អាតឡើងវិញ និងកែលម្អទីជម្រក។ ខណៈប្រតិបត្តិការសង្គ្រោះបន្ទាន់នៅតែបន្ត រដ្ឋាភិបាល កំពុងរៀបចំផែនការសម្រាប់ការកសាងឡើងវិញ រួមទាំងលំនៅឋានបណ្តោះអាសន្ន និងការស្តាររយៈពេលវែង ។
អាជ្ញាធរ ក៏បានសង្កត់ធ្ងន់លើតម្រូវការកាន់តែប្រសើរសម្រាប់ការរៀបចំផែនការដីធ្លី (រៀបចំតំបន់ច្បាស់លាស់) និងទប់ស្កាត់គ្រោះមហន្តរាយ ព្រោះថាបម្រែបម្រួលអាកាសធាតុធ្ងន់ធ្ងរអាចនឹងបន្តកើតមានក្នុងរយៈពេលប៉ុន្មានថ្ងៃខាងមុខទៀត ៕ប្រែសម្រួល ដោយ:សុខ សុភ័ណ្ឌ