សមត្ថកិច្ចស្រាវជ្រាវចាប់ខ្លួនអ្នកស៊ីឈ្នួលបាញ់ប្រហារលើបុរសម្នាក់ និងចាប់ខ្លួនអ្នកបញ្ជា

ភ្នំពេញ៖ សមត្ថកិច្ចនគរបាលបានធ្វើការស្រាវជ្រាវឈានដល់ចាប់ខ្លួនអ្នកស៊ីឈ្នួលបាញ់ប្រហារលើបុរសម្នាក់ និងអ្នកបញ្ជាឲ្យបាញ់ម្នាក់ សរុបចំនួន ០៣នាក់ (អ្នកស៊ីឈ្នួលបាញ់ ២នាក់ និងអ្នកបញ្ជា ១នាក់)  ពាក់ព័ន្ធ ករណីបាញ់ប្រហារលើបុរសម្នាក់​បណ្តាល​ឲ្យរបួសធ្ងន់ នៅចំណុចមុខស្ថានីយ៍ប្រេងឥន្ធនៈ LPG ផ្លូវជាតិលេខ១ ភូមិបឹងឈូក សង្កាត់និរោធ ខណ្ឌច្បារអំពៅ កាលពីទាបភ្លឺឈានចូលថ្ងៃទី៨ ខែតុលា ឆ្នាំ២០២៥កន្លងទៅ គឺឃាតករបានទទួលលុយចំនួន២,៣០០ដុល្លារ ក្នុងបាញ់​ប្រហារ​លើជនរងគ្រោះ។

ជនសង្ស័យទាំងបីនាក់ ត្រូវបានចាប់ខ្លួនជាបន្តបន្ទាប់ ដោយជនសង្ស័យទី១ ចាប់ខ្លួនកាលពីថ្ងៃទី១១ ខែតុលា ឆ្នាំ២០២៥ នៅចំណុចដីឡូត៍ផ្លូវបេតុង ភូមិអូរអណ្ដូង សង្កាត់ព្រែកប្រា ខណ្ឌច្បារអំពៅ។ ជនសង្ស័យទី២ ឈ្មោះ អួង សំណាង ភេទប្រុស អាយុ៥១ឆ្នាំ ចាប់ខ្លួននៅចំណុចភូមិដើមពពេល ឃុំថ្មឥដ្ឋ ស្រុកកំពង់ត្រឡាច ខេត្តកំពង់ឆ្នាំង កាលពីរសៀលថ្ងៃទី១៤ ខែតុលា ឆ្នាំ២០២៥ និងជនសង្ស័យទី៣ ឈ្មោះ ឡូ ឡាគាវ ភេទស្រី អាយុ៥៣ឆ្នាំ ចាប់ខ្លួននៅសង្កាត់ច្បារអំពៅទី១ ខណ្ឌច្បារអំពៅ នៅថ្ងៃទី១៥ ខែតុលា ឆ្នាំ២០២៥។
ក្រោយពីសាកសួរជនសង្ស័យខាងលើបានឆ្លើយសារភាពថា នៅថ្ងៃទី៨ ខែតុលា ឆ្នាំ២០២៥ ខ្លួនពិតជាបានធ្វើសកម្មភាពបាញ់ទៅលើជនគ្រោះប្រាកដមែន ដោយមានការបញ្ជាពីឈ្មោះ ឡូ ឡាគាវ ភេទស្រី អាយុ៥៣ឆ្នាំ ជនជាតិខ្មែរ និងទទួលបានថ្លៃឈ្នួល២,៣០០ដុល្លារ។

ក្រោយពីទទួលបានចម្លើយពីជនសង្ស័យខាងលើភ្លាម នៅថ្ងៃទី១៥ ខែតុលា ឆ្នាំ២០២៥ កម្លាំងជំនាញនាំខ្លួន ឈ្មោះ ឡូ ឡាគាវ ភេទស្រី អាយុ៥៣ឆ្នាំ ជនជាតិខ្មែរ ត្រង់ចំណុចសង្កាត់ច្បារអំពៅទី១ ខណ្ឌច្បារអំពៅ រាជធានីភ្នំពេញ យកមកធ្វើការសាកសួរតាមនីតិវិធី។ ដកហូតបានវត្ថុតាងធ្វើសកម្មភាព អាវុធខ្លី១ដើមម៉ាក K59 ។
បច្ចុប្បន្ន ជនសង្ស័យទាំង២នាក់ខាងលើ កំពុងធ្វើការសាកសួរនៅនាយកដ្ឋាននគរបាលព្រហ្មទណ្ឌ ៕ដោយ:និពន្ឋនាយក| ភ្នំពេញ|អំណាចព័ត៌មាន