ក្រោមការយកចិត្តទុកដាក់ពីសំណាក់ប្រមុខរាជរដ្ឋាភិបាលចំពោះពលករដែលវិលត្រឡប់មកពីប្រទេសថៃ ក្រសួងការងារបានរៀបចំការងាររាប់ម៉ឺនកន្លែងសម្រាប់ផ្តល់ការងារជូនពលករ។ អភិបាលខេត្តកំពតបានលើកទឹកចិត្តដល់ពលករទាំងអស់ ឱ្យយកចំណេះជំនាញ និងបទពិសោធន៍ការងារដែលមាន មកធ្វើការងារក្នុងស្រុក ដើម្បីចូលរួមអភិវឌ្ឍន៍ប្រទេសជាតិ។
ថ្លែងក្នុងវេទិកាការងារក្នុងស្រុកបន្ទាយមាស នៅព្រឹកថ្ងៃទី១៧ ខែកញ្ញា ឆ្នាំ២០២៥ ឯកឧត្ដម ម៉ៅ ធនិន អភិបាលខេត្តកំពតបានលើកឡើងថា កម្ពុជាក្រោមការដឹកនាំរបស់សម្តេចតេជោ ហ៊ុន សែន បន្តរហូតមកដល់សម្តេចធិបតី ហ៊ុន ម៉ាណែត ជានាយករដ្ឋមន្ត្រី កម្ពុជានៅតែរក្សាបាននូវសុខសន្តិភាព និងការអភិវឌ្ឍគ្រប់វិស័យ ពិសេសរោងចក្រសហគ្រាសជាច្រើនបានបង្កើតឡើងជាបន្តបន្ទាប់តាមរយៈវិនិយោគគិនទាំងក្នុងស្រុក និងក្រៅស្រុក ដែលជាកត្តាធ្វើឱ្យតម្រូវការកម្លាំងពលកម្មមានការកើនឡើងឥតឈប់ឈរ។ ទន្ទឹមនឹងនោះប្រជាពលរដ្ឋខ្មែរជាច្រើននៅទូទាំងប្រទេសទទួលបានការងារធ្វើ តាមរយៈការគិតគូរពីសំណាក់ប្រមុខរាជរដ្ឋាភិបាល ដែលមានក្រសួងការងារ និងបណ្តុះបណ្តាលវិជ្ជាជីវៈជាសេនាធិកា ហើយកម្មករទាំងអស់ត្រូវបានយកចិត្តទុកដាក់យ៉ាងខ្លាំងពីសំណាក់រាជរដ្ឋាភិបាល ទាំងប្រាក់បៀរវត្ស និងប្រាក់កម្រៃផ្សេងៗដែលត្រូវទទួលបានពីការបំពេញការងារ។
ឯកឧត្តមអភិបាលខេត្តបានបន្តថា បន្ទាប់ពីមានការឈ្លានពានពីសំណាក់ប្រទេសថៃពាក់ព័ន្ធនឹងបញ្ហាព្រំដែន ពលករដែលបានធ្វើការនៅក្នុងប្រទេសនោះគឺត្រូវបានបញ្ជូនត្រឡប់មកស្រុកកំណើតវិញ។ ដោយមានការគិតគូរពីសំណាក់ប្រមុខរាជរដ្ឋាភិបាល គឺសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា សម្តេចបានចង្អុលបង្ហាញដោយផ្ទាល់មកកាន់អាជ្ញាធររាជធានី-ខេត្តទាំងអស់ ត្រូវយកចិត្តទុកដាក់ចំពោះការវិលត្រឡប់របស់ពលករទាំងអស់ ដោយមានការដឹកជញ្ជូនបងប្អូនពលករមកកាន់លំនៅឋានដោយមិនយកប្រាក់ ពិសេសសម្តេចបានត្រៀមរួចជាស្រេចនូវកន្លែងការងារដើម្បីផ្តល់ជូនដល់ពលករទាំងអស់រាប់ម៉ឺនកន្លែង តាមរយៈក្រសួងការងារ និងបណ្តុះបណ្តាលវិជ្ជាជីវៈ។
ឯកឧត្តមអភិបាលខេត្ត ក៏បានធ្វើការជុំរុញ និងលើកទឹកចិត្តដល់ពលករដែលទើបត្រឡប់មកកាន់ស្រុកកំណើតវិញ សូមយកចំណេះជំនាញ និងបទពិសោធន៍ដែលធ្លាប់បានធ្វើកន្លងមកស្វែងរកការងារធ្វើនៅក្នុងស្រុកដែលមានរាប់ម៉ឺនកន្លែងដែលកំពុងរង់ចាំ ក្នុងន័យដើម្បីចូលរួមអភិវឌ្ឍន៍ប្រទេសជាតិ។ ឯកឧត្តមអភិបាលខេត្តបានបញ្ជាក់បន្ថែមថា ការដែលយើងមានការងារធ្វើក្នុងស្រុកគឺបានចូលរួមកាត់បន្ថយការចំណាយជាច្រើនរបស់បងប្អូនពលករ ហើយយើងមានពេលគ្រប់គ្រាន់សម្រាប់រស់នៅជួបជុំក្រុមគ្រួសារ និងដើរលេងកម្សាន្តដោយមិនមានការព្រួយបារម្ភក្រោមម្លប់សន្តិភាព ក្រោមការយកចិត្តទុកដាក់ពីសំណាក់រាជរដ្ឋាភិបាល ពិសេសខេត្តកំពតប្រសិនបើបងប្អូនកម្មករធ្វើការងារមានបញ្ហាជាមួយរោងចក្រ សហគ្រាស បងប្អូនអាចទំនាក់ទំនងមកកាន់ឯកឧត្តមផ្ទាល់ដើម្បីធ្វើការដោះស្រាយភ្លាមៗ ព្រោះបងប្អូនកម្មករទាំងអស់មានបងប្រុសម្នាក់ជាអភិបាលខេត្ត។
យោងតាមរបាយការណ៍របស់លោក អ៊ឹង ប៉ូហេង ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកំពត បានឱ្យដឹងថា ខេត្តកំពតមានរោងចក្រសហគ្រាសសរុបចំនួន ៨៥៨ ដែលមានកម្មករនិយោជិតចំនួន ២៥,០៣៩នាក់ ស្រី ១៣,២៤០នាក់ ក្នុងនោះរោងចក្រកាត់ដេរសម្លៀកបំពាក់ និងស្បែកជើងមាន ៧រោងចក្រ មានកម្មករចំនួន ១០,៩៩១នាក់ ស្រី ៩,១៧៥នាក់ និងរោងចក្រផលិតស៊ីម៉ង់ត៌មាន ៤រោងចក្រ មានកម្មករចំនួន ៣,០៧០នាក់ ស្រី ៣៦១នាក់។ ជាមួយគ្នានេះដែរ ខេត្តកំពតមានបងប្អូនពលករដែលវិលត្រទប់មកពីប្រទេសថៃវិញសរុបចំនួន ១,៥៥៩គ្រួសារ ស្មើនឹង ៦,២៣៦នាក់ ស្រី ២,៩០៦នាក់ ហើយសម្រាប់ឱកាសការងារក្នុងខេត្តកំពតបច្ចុប្បន្នមានតម្រូវការសរុបចំនួន ៣៨២កន្លែង៕
ដោយ:វង្ស ចំរើន |កំពត|រូបថតអំណាចព័ត៌មាន|
