ភ្នំពេញ៖ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅព្រឹកថ្ងៃទី១១ ខែកញ្ញា ឆ្នាំ២០២៥នេះ បានអញ្ជើញសំណេះសំណាល និងចែកអំណោយមនុស្សធម៌ជាលើកទី២
ជូនលោកពូ លោកអ៊ុំ លោកតា ដែលជាសមាជិកមូលនិធិត្រីចក្រយានកម្ពុជា (ស៊ីក្លូ) ចំនួន ៣៨៦នាក់ ក្នុងរាជធានីភ្នំពេញ។ ពិធីនេះបានប្រព្រឹត្ដទៅនៅទីស្នាក់ការកណ្ដាលកាកបាទក្រហមកម្ពុជា ក្នុងសង្កាត់អូបែកក្អម រាជធានីភ្នំពេញ។
ស្របក្នុងឱកាសនៃពិធីបុណ្យកាន់បិណ្ឌ និងភ្ជុំបិណ្ឌឆ្នាំនេះ សម្ដេចកិត្តិព្រឹទ្ធបណ្ឌិតប្រធាន បានអញ្ជើញសំណេះសំណាលជាមួយលោកពូ លោកអ៊ុំ លោកតា ប្រកបដោយភាពដោយស្នាមញញឹមដ៏ស្រស់ស្អាតសិ្នទស្នាល ពោរពេញទៅដោយសេចក្ដីអាណិតស្រលាញ់។
ក្នុងឱកាសនោះផងដែរ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន បាននាំយកនូវព្រះរាជបណ្តាំព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាព្រះប្រធានកិត្ដិយសកាកបាទក្រហមកម្ពុជា ដែលមានព្រះទ័យនឹករលឹក និងគិតគូរខ្វល់ខ្វាយគ្រប់ពេលវេលាពីសុខទុក្ខរបស់ប្រជារាស្ដ្ររបស់លោកទាំងទ្វេ ដោយមិនដែលភ្លេចម្ដងណានោះឡើយ និងបានផ្ដាំផ្ញើជូនពរដល់លោកពូ លោកអ៊ុំ លោកតានៃមូលនិធិទាំងអស់ ក្នុងឱកាសបុណ្យភ្ជុំបិណ្ឌនេះ សូមមានសុខភាពល្អ សុវត្ថិភាព ក្នុងការធ្វើដំណើរទោះទីជិតទីឆ្ងាយទៅជួបជុំកូនចៅប្រកបដោយសេចក្ដីសុខចម្រើន។
ជាមួយគ្នានេះសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ក៏បានថ្លែងបន្ដថា ថ្ងៃនេះគឺជាជួបសំណេះសំណាលជាលើកទី២ហើយ ជួបលោកអ៊ុំ លោកតា បងប្អូនធ្លាក់ស៊ីក្លូ ដែលលើកទី១កាលពីថ្ងៃទី២៨ ខែកញ្ញា ឆ្នាំ២០២៤ ។មាតាមនុស្សធម៌បានថ្លែងបន្ដថា ការជួបសំណេះសំណាលនាពេលនេះ គឺស្របនឹងថ្ងៃកាន់បិណ្ឌទី៤ ដូច្នេះក្នុងនាមប្រជាជនយើងគោរពយ៉ាងខ្ជាប់ខ្ជួននូវព្រះពុទ្ធសាសនា គឺតែងតែធ្វើចង្ហាន់ រួមមានទេយ្យវត្ថុមួយចំនួន និងបច្ច័យ ទៅប្រគេនព្រះសង្ឃដែលគង់នៅតាមបណ្ដាវត្ដអារាមនានា ដូចនេះហើយ អំណោយមនុស្សធម៌ ដែលបានចែកជូនលោកពូ លោកអ៊ំ លោកតានាពេលនេះ ដែលមានជាគ្រឿងឧបភោគ-បរិភោគ និងបច្ច័យផងដែរ គឺអាចយកទៅធ្វើបុណ្យក្នុងឱកាសកាន់បិណ្ឌ ភ្ជុំបិណ្ឌនេះ និងសម្រាប់ផ្ញើជូនដល់ក្រុមគ្រួសារផងដែរ។
សម្រាប់អំណោយមនុស្សធម៌ដែលទទួលបានពីសប្បុរសជនគ្រប់មជ្ឈដ្ឋាន បានចែកជូនសមាជិកមូលនិធិត្រីចក្រយានកម្ពុជានៅថ្ងៃនេះ ក្នុងម្នាក់ៗទទួលបាន៖ អង្ករ ៣០គីឡូក្រាម, មី ១កេស, ត្រីខ ១កេស (ស្មើនឹង ១០០កំប៉ុង), ប្រេងឆា ១ដប, ទឹកស៊ីអ៊ីវ ១យួរ, ភេសជ្ជៈបាកាស ១យួរ, ទឹកក្រូច ១កេស, ឃីត (មុង ភួយ សារុង ក្រមា) ១កញ្ចប់ និងថវិកា ៣០០.០០០រៀល រួមជាមួយអាហារពេលព្រឹក រួមមាន បាយសាច់មាន់ ១ប្រអប់, ផ្លែក្រូចឃ្វិច ២ផ្លែ, ទឹកក្រូច ១កំប៉ុង និងទឹកបរិសុទ្ធ ២ដប ទៀតផង។
ជាមួយគ្នានេះលោកពូ លោកអ៊ុំ លោកតា រួមទាំងមានបងស្រីម្នាក់ផងដែរ ដែលប្រកបមុខរបរធាក់ស៊ីក្លូ បានសម្ដែងនូវភាពសប្បាយរីករាយជាខ្លាំង និងថ្លែងអំណរគុណយ៉ាងជ្រាលជ្រៅគោរពជូនចំពោះ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែមិនភ្លេច ជួយយកអាសារ ពីសុខទុក្ខមិនដែលរំលងនោះឡើយ ហើយនេះក៏ជាលើកទី២ហើយ ដែលបានជួយដោយផ្ទាល់ជាមួយសម្ដេចកិត្ដិព្រឹទ្ធបណ្ឌិត មាតាមនុស្សធម៌គ្មានព្រំដែន ទឹកចិត្ដជួយសង្រ្គោះដ៏មហិមា និងជាម្លប់ដ៏ត្រជាក់ត្រជុំ ដល់កូនចៅកម្ពុជា។
ឆ្លៀតក្នុងពិធីសំណេះសំណាលខាងលើនេះលោក ឃួង ស្រេង អភិបាលនៃគណៈអភិបាលរាជធានីភ្នំពេញ ,ជាប្រធានគណៈកម្មាធិការសាខាកាកបាទក្រហមកម្ពុជារាជធានីភ្នំពេញ និងជាប្រធានក្រុមប្រឹក្សាមូលនិធិត្រីចក្រយានកម្ពុជាបានថ្លែងថា វត្តមានរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងពិធីនេះ គឺជាការផ្ដល់នូវកិត្តិយស និងជាការលើកទឹកចិត្តដ៏ធំធេងដល់រដ្ឋបាលរាជធានីភ្នំពេញ សាខាកាកបាទក្រហមកម្ពុជារាជធានី និងអនុសាខា ខណ្ឌទាំង១៤ ក្នុងការបន្តខិតខំប្រឹងប្រែងបំពេញបេសកកម្មមនុស្សធម៌របស់ខ្លួន ឱ្យកាន់តែសកម្មខ្លាំងក្លាថែមទៀត។ ជាមួយគ្នានេះ ការចុះជួបសំណេះសំណាលដោយផ្ទាល់របស់ សម្តេចកិត្តិព្រឹទ្ធបណ្ឌិត មិនត្រឹមតែបានផ្សារភ្ជាប់មនោសញ្ចេតនា ជាមួយបងប្អូនជាអ្នកប្រកបរបរធាក់ស៊ីក្លូប៉ុណ្ណោះទេ ប៉ុន្តែថែមទាំងបានឆ្លុះបញ្ចាំងឱ្យឃើញកាន់តែច្បាស់ពីការយកចិត្តទុកដាក់ របស់ថ្នាក់ដឹកនាំកំពូលកាកបាទក្រហមកម្ពុជា ដែលតែងតែរួមសុខរួមទុក្ខជាមួយបងប្អូនប្រជាពលរដ្ឋគ្រប់មជ្ឈដ្ឋាន ស័ក្តិសមទៅនឹងការប្រសិទ្ធនាមជា «មាតាមនុស្សធម៌» របស់កម្ពុជា។
សូមជម្រាបថា សមាគមមូលនិធិត្រីចក្រយានកម្ពុជា ត្រូវបានបង្កើតឡើងក្រោមគំនិតផ្តួចផ្តើមដ៏ឧត្តុង្គឧត្តមបំផុតរបស់សម្ដេចតេជោ ហ៊ុន សែន និងត្រូវបានចុះបញ្ជីទទួលស្គាល់ត្រឹមត្រូវ តាមច្បាប់នៃព្រះរាជាណាចក្រកម្ពុជា តាមរយៈប្រកាសលេខ១៩០ ប្រក ចុះថ្ងៃទី៩ ខែមករា ឆ្នាំ២០១៨ របស់ក្រសួងមហាផ្ទៃ។ ក្រោយពេលបង្កើតសមាគមនេះ និងដោយទទួលបានកិត្តិយសដ៏ខ្ពង់ខ្ពស់បំផុតពី សម្ដេចតេជោ ហ៊ុន សែន ក្នុងឋានៈជាប្រធានកិត្តិយសក្រុមប្រឹក្សាភិបាលសមាគម សព្វថ្ងៃនេះ ៕
ដោយ:អ៊ុំ ណូន|ភ្នំពេញ|អំណាចព័ត៌មាន
