កំពត:
មន្ត្រីជំនាញសុរិយោដីខេត្តកំពតបានឱ្យដឹងថា មកទល់បច្ចុប្បន្នការវាស់វែងដីធ្លី និងផ្តល់បណ្ណកម្មសិទ្ធិជូនពលរដ្ឋក្នុងខេត្តសម្រេចបានប្រមាណជាង ៦៧ម៉ឺនក្បាលដី ស្មើនឹងជាង ៩៨ភាគរយ ដែលនៅទូទាំងខេត្តមានក្បាលដីសរុបជាង ៧៧ម៉ឺនក្បាលដី។ កត្តាដែលនាំឱ្យការងារចុះវាស់វែង ចុះបញ្ជី និងចេញបណ្ណកម្មសិទ្ធិបានលឿនដូចនេះ ក៏ដោយសារប្រជាពលរដ្ឋមានការយល់ដឹងច្រើនពីអត្ថបប្រយោជន៍បណ្ណកម្មសិទ្ធិដីធ្លី ក្រោយមានការដោះស្រាយ និងផ្សព្វផ្សាយពីសំណាក់ឯកឧត្តមអភិបាលខេត្ត។
ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកំពត លោក ព្រាប សុផាត បានឱ្យដឹងថា ខេត្តកំពតក្រោមការដាក់ចេញនូវគោលនយោបាយដីធ្លីពីសំណាក់ប្រមុខរាជរដ្ឋាភិបាល ដែលមានសម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងការដឹកនាំរបស់ឯកឧត្តម ម៉ៅ ធនិន អភិបាលខេត្តកំពតក្នុងរយៈពេល ៤ឆ្នាំកន្លងមកនេះ ការចុះវាស់វែង ចុះបញ្ជី និងការចែកបណ្ណកម្មសិទ្ធិដីធ្លីជូនពលរដ្ឋក្នុងខេត្តសម្រេចបានប្រមាណជាង ៦៧ម៉ឺនក្បាលដី ដែលស្មើនឹងជាង ៩៨ភាគរយ លើក្បាលដីសរុបប្រមាណជាង ៧៧ម៉ឺនក្បាលដីក្នុងខេត្ត ដែលខេត្តគ្រោងនិងបញ្ចប់ការវាស់វែង និងចែកបណ្ណជូនពលរដ្ឋនៅបំណាច់ឆ្នាំ២០២៥ខាងមុខនេះ។ ការឱ្យដឹងដូចនេះក្នុងពិធីពិធីប្រកាសចែកវិញ្ញាបនបត្រសម្គាល់ម្ចាស់អចលនវត្ថុភូមិដំណាក់ឈ្នួល ស្ថិតក្នុងឃុំត្រពាំងបី ភូមិត្រពាំងគុយ ស្ថិតក្នុងឃុំល្បើក ស្រុកឈូក និងពិធីប្រកាសបិទផ្សាយជាសាធារណៈ នូវឯកសារនៃការវិនិច្ឆ័យ ភូមិត្រពាំងថ្ម ស្ថិតឃុំល្បើក ស្រុកឈូក ខេត្តកំពត នៅព្រឹកថ្ងៃទី៨ ខែកញ្ញា ឆ្នាំ២០២៥ ដែលពិធីនេះធ្វើឡើងក្នុងបរិវេណសាលាស្រុកឈូក។
លោកប្រធានមន្ទីរបានបន្តថា កត្តាដែលជំរុញឱ្យការងារចុះវាស់វែង ចុះបញ្ជី និងចេញបណ្ណកម្មសិទ្ធិបានលឿនដូចនេះ ដោយសារមានការដោះស្រាយវិវាទក្រៅប្រព័ន្ធតុលាការ ក៏ដូចជាការផ្សព្វផ្សាយពីផលលំបាកអំពីវិវាទដីធ្លីរបស់ឯកឧត្តមអភិបាលខេត្ត ដែលកន្លងមកឯកឧត្តមតែងតែគិតគូរដោះស្រាយបញ្ចប់នូវរាល់ទំនាស់ផ្សេងៗ ពិសេសទំនាស់ដីធ្លី ហើយបានធ្វើឱ្យប្រជាពលរដ្ឋមានការយល់ដឹងច្បាស់ពីអត្ថប្រយោជន៍នៃបណ្ណកម្មសិទ្ធិដីធ្លី។ លោកប្រធានមន្ទីរបានបញ្ជាក់បន្ថែមថា ការចេញបណ្ណកម្មសិទ្ធិដីធ្លីនាពេលបច្ចុប្បន្ននេះ គឺជាការគិតគូរយ៉ាងយកចិត្តទុកដាក់ពីសំណាក់ប្រមុខរាជរដ្ឋាភិបាល និងឯកឧត្តមអភិបាលខេត្ត ដើម្បីធ្វើយ៉ាងណាឱ្យប្រជាពលរដ្ឋបានប្រើប្រាស់ដីដោយស្របច្បាប់ ព្រមទាំងទាញយកប្រយោជន៍ពីដីធ្លីឱ្យអស់សក្តានុពលនៃដី។
ក្នុងឱកាសនោះដែរ ឯកឧត្តម ម៉ៅ ធនិន អភិបាលខេត្តកំពត ក៏បានគូសបញ្ជាក់ដែរថា ការផ្តល់បណ្ណកម្មសិទ្ធិដីធ្លីជូនពលរដ្ឋទើបតែមានក្នុងអណត្តិដឹកនាំរបស់សម្តេចតេជោ ក្រោយពេលដែលលោកបានស្វែងរកសុខសន្តិភាពជូនពលរដ្ឋ និងប្រទេសជាតិ គឺក្រោយថ្ងៃរំដោះ ៧មករា ឆ្នាំ១៩៧៩ ហើយបន្តរហូតមកដល់ការដឹកនាំរបស់សម្តេចធិបតី ក៏លោកនៅតែគិតគូរជំរុញឱ្យអាជ្ញាធរខេត្ត និងមន្ទីរជំនាញពន្លឿនក្នុងការចុះវាស់វែង ក៏ដូចជាចេញបណ្ណកម្មសិទ្ធិជូនពលរដ្ឋឱ្យបានឆាប់បំផុត។ ឯកឧត្តមអភិបាលខេត្តក៏បានស្នើដល់ប្រជាពលរដ្ឋទាំងអស់ ត្រូវចូលរួមសហការជាមួយអាជ្ញាធរ និងមន្ត្រីជំនាញដែលធ្វើការងារនេះឱ្យបានល្អ ពិសេសត្រូវច្បាស់ថាមុនពេលចេញបណ្ណគឺយើងឯកភាពគ្នាជាមួយអ្នកដែលមានព្រំជាប់គ្នា ហើយក្រោយពេលដែលចេញបណ្ណរួចក៏មិនត្រូវមានវិវាទនោះដែរ។
តាមរយបាយការណ៍របស់មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកំពតបានឱ្យដឹងថា ការចែកវិញ្ញាបណ្ណបត្រសម្ភាល់ម្ចាស់អចលនវត្ថុនាពេលនេះមានចំនួន ២ភូមិ គឺភូមិដំណាក់ឈ្នួល ស្ថិតក្នុងឃុំត្រពាំងបី ភូមិត្រពាំងគុយ ស្ថិតក្នុងឃុំល្បើក ដែលមានក្បាលដីសរុបចំនួន ២,៩២១ក្បាលដី ស្មើនឹង ១,៤០៩គ្រួសារ និងប្រកាសបិទផ្សាយជាសាធារណៈនូវឯកសារនៃការវិនិច្ឆ័យចំនួន១ភូមិ គឺភូមិត្រពាំងថ្ម ស្ថិតឃុំល្បើក ស្រុកឈូក ដែលមានក្បាលដីសរុបចំនួន ២,៦៤៩ក្បាលដី ស្មើនឹង ១,៣៣៣គ្រួសារ៕ដោយ វង្ស ចំរើន |កំពត| អំណាចព័ត៌មាន
