បាត់ដំបង : រថភ្លើងដឹកប្រេងរបស់ក្រុមហ៊ុនតេលាកម្ពុជាបានរអិលធ្លាក់ក្រឡាប់ចាក់ប្រេងចោលអស់០៣ស៊ីទែន ក្នុងចំណោម០៤ស៊ីទែន ដែលធ្លាក់ចេញពីផ្លូវ កាលពីវេលាម៉ោងជាង១១ថ្ងៃត្រង់ថ្ងៃទី១៦ សីហា នៅក្នុងចន្លោះ សង្កាត់អូរចា និងសង្កាត់ទូលតាឯក ក្រុងបាត់ដំបង ។
សមត្ថកិច្ចបានរាយការណ៍បឋមថា រថភ្លើង១ខ្សែអូសស៊ីទែនប្រេងរបស់ក្រុមហ៊ុនតេលាកម្ពុជា ធ្វើដំណើរពីភ្នំពេញឆ្លងកាត់បាត់ដំបង ឆ្ពោះទៅកាន់ខេត្តបន្ទាយមានជ័យ ។ សមត្ថកិច្ចបានប្រាប់ថា ពេលទៅដល់ចំណុចកើតហេតុ ស្រាប់តែតួរថភ្លើងរអិលធ្លាក់ចេញពីផ្លូវចំនួន០៤ស៊ីទែនដឹកប្រែងម៉ាស៊ូត តែមាន០៣ស៊ីទែនបានធ្លាយចេញប្រេងហូរពញដី និងចូលទឹក ។
រហូតមកដល់ព្រឹកថ្ងៃទី១៦ខែសីហា ឆ្នាំ២០២៥នេះក្រុមប្រជាពលរដ្ឋនៅតែបន្តទៅដួសប្រេងម៉ាស៊ូត ដែលកំពប់នៅតាមមាត់អូរជាច្រើនកកកុញដដែល។ អាជ្ញាធរមាន សមត្ថកិច្ចក៏ដូចជាខាងក្រុមហ៊ុន មិនមានសមត្ថភាពក្នុងការដួសឬដងប្រេងនោះត្រឡប់មកវិញទេ ដូច្នេះមានតែបណ្ដោយឲ្យប្រជាពលរដ្ឋដួស ឬដងត្រង់យកតាមចិត្តតែប៉ុណ្ណោះ។
នៅកន្លែងកើតហេតុ គេឃើញអ្នកភូមិរាប់សិបនាក់ បាននាំគ្នាត្រងប្រេងហូរចេញពីស៊ីទែន រីឯខ្លះទៀតដណ្ដើមគ្នាដួសប្រេងដែលអណ្ដែតលើទឹក ។ បើតាមព័ត៌មានបឋមពីសមត្ថកិច្ចដែលបានសួរនាំកម្មកររថភ្លើងបានប្រាប់ថា ឧប្បត្តិហេតុនេះ បានធ្វើឲ្យប៉ះពាល់ស៊ីទែនប្រេងចំនួន០៤ តែបាត់បង់ប្រេងម៉ាស៊ូតចំនួន០៣ស៊ីទែន ។ ពេលនេះ សមត្ថកិច្ចកំពុងអន្តរាគមន៍ ជាមួយកម្មកររថភ្លើង ប្រើប្រាស់រថយន្តស្ទូច ស្ទូចលើកស៊ីទែនប្រេងដាក់លើតួរថភ្លើងវិញហើយ ៕ដោយ:apn
