កំពង់ស្ពឺ:កាលពីរសៀលថ្ងៃទី១០ ខែសីហា ឆ្នាំ២០២៥ លោកអភិបាលខេត្តកំពង់ស្ពឺ អញ្ជើញជាអធិបតីភាពក្នុងពិធីជំនួបសំណេះសំណាលជាមួយគណ:គ្រប់គ្រង បុគ្គលិក សាស្ត្រាចារ្យនិងនិស្សិតនៃសាកលវិទ្យាល័យអង្គរខេមរា ខេត្តកំពង់ស្ពឺ នៅសាលប្រជុំធំអគាររដ្ឋបាលខេត្តកំពង់ស្ពឺ។
លោក ជាម ច័ន្ទសោភ័ណ អភិបាលខេត្តកំពង់ស្ពឺ បានលើកទឹកចិត្តដល់និស្សិតក៏ដូចយុវជនទាំងអស់ឱ្យបន្តការខិតខំរៀនសូត្រ ដើម្បីលើកកម្ពស់សមត្ថភាព ចំណេះជំនាញរួមចំណែកអភិវឌ្ឍសង្គមជាតិឱ្យកាន់តែរីកចម្រើននៅក្នុងសម័យសកលភាវូបនីយកម្ម និងបច្ចេកវិទ្យាវិទ្យាសាស្ត្រ។ ឯកឧត្តមបានលើកឡើងថា រាជរដ្ឋាភិបាល ដែលមាន សម្តេចធិបតី ហ៊ុន ម៉ាណែត ជាប្រមុខ មានបំណងប្រាថ្នាចម្បងតែមួយគត់ គឺការផ្តល់ឱ្យប្រជាពលរដ្ឋនូវជីវភាពធូរធាចម្រុងចម្រើន និងការរស់នៅប្រកបដោយភាពសុខសាន្តក្រោមម្លប់នៃសន្តិភាព ព្រមជាមួយនឹងសិទ្ធិសេរីភាព និងឱកាសគ្រប់បែបយ៉ាងក្នុងការកសាងអភិវឌ្ឍខ្លួនឱ្យទទួលបានជោគជ័យ។
ពិតណាស់ ការប្រែក្លាយគំនិតឱ្យចេញជាលទ្ធផលជាក់ស្តែងប្រកបដោយនិរន្តរភាពនៃការរីកចម្រើនគឺទាមទារនូវចក្ខុវិស័យវែងឆ្ងាយនិងច្បាស់លាស់ ក៏ដូចជាការប្តេជ្ញាចិត្តខ្ពស់ពីគ្រប់ភាគីពាក់ព័ន្ធក្នុងការជម្នះនូវរាល់គ្រប់ឧបសគ្គ។ក្នុងន័យនេះ សូមប្រជាពលរដ្ឋគ្រប់មជ្ឈដ្ឋាន ចូលរួមថែរក្សា និងប្រឹងប្រែងចាប់យកឱកាសអំណោយផលពីកត្តាសុខសន្តិភាព ស្ថិរភាព និងកំណើនឱ្យបានជាប្រយោជន៍សម្រាប់ខ្លួន ក្រុមគ្រួសារនិងសង្គមជាតិ។
ក្នុងឱកាសនោះដែរ អភិបាលខេត្តកំពង់ស្ពឺ ក៏បានលើកឡើងថាប្រមុខរាជរដ្ឋាភិបាលនៃកម្ពុជាគឺសម្តេចមហាបវរធិបតី ហ៊ុន ម៉ាណែត បានផ្តល់ឱកាសឱ្យវិស័យឯកជនចូលរួមវិនិយោគលើវិស័យអប់រំ ដោយចាប់ផ្តើមពីថ្នាក់បឋម រហូតដល់ឧត្តមសិក្សា ដែលការណ៍នេះក៏ដូចជាការបើកឱកាសសម្រាប់សិស្សនិស្សិតយើងផងដែរ។
ទន្ទឹមនេះលោក ជាម ច័ន្ទសោភ័ណ ក៏បានថ្លែងនូវការកោតសរសើរផងដែរទៅដល់និស្សិត យុវជន យុវនារីនៃខេត្តកំពង់ស្ពឺ ដែលស្រវាស្រទេញចំពោះការសិក្សា ចង់ចេះ ចង់ដឹង និងដើរឱ្យទាន់សម័យកាលសកលភាវូបនីយកម្ម និងបច្ចេកវិទ្យាវិទ្យាសាស្ត្រ។ជាមួយនោះដែរ សាស្ត្រាចារ្យត្រូវប្រកាន់ភ្ជាប់នូវគោលការណ៍បណ្តុះបណ្តាលនិងស្រាវជ្រាវតាមបែបវិទ្យាសាស្រ្តនេះជានិច្ច ដោយសារគោលការណ៍សិក្សាស្រាវជ្រាវតាមបែបវិទ្យាសាស្រ្តនេះនិងជួយឱ្យនិស្សិតមានចំណេះជំនាញពិតប្រាកដ ដើម្បីប្រកួតប្រជែងគុណភាពធនធានមនុស្សជាមួយបណ្តាប្រទេសអភិវឌ្ឍន៍នានា។បច្ចុប្បន្នការបណ្តុះបណ្តាលនៅតាមសកលវិទ្យាល័យក្នុងប្រទេសឱ្យមានគុណភាព វាមិនខុសពីការបណ្តុះបណ្តាលនៅតាមបណ្តាប្រទេសអភិវឌ្ឍន៍នោះទេ ដូចនេះនិស្សិតទាំងអស់ត្រូវតែគោរពវិន័យ និងខិតខំប្រឹងប្រែងសិក្សាស្រាវជ្រាវក្រេបយកចំណេះវិជ្ជាពីសាស្រ្តាចារ្យជំនាញរៀងៗខ្លួន ស្របតាមគោលការណ៍បណ្តុះបណ្តាលនិងស្រាវជ្រាវតាមបែបវិទ្យាសាស្ត្ររបស់សកលវិទ្យាល័យឱ្យបានត្រឹមត្រូវ។ហើយក្រោយបញ្ចប់បងប្អូន ក្មួយៗនិស្សិតនិងមានឱកាសចូលរួមលើកស្ទួយប្រទេសជាតិយើងឱ្យមានការអភិវឌ្ឍន៍រីកចម្រើន។
លើកឡើងនៅក្នុងឱកាសនោះ លោក ជាម ច័ន្ទសោភ័ណ ក៏បានលើកទឹកចិត្តបន្ថែមដល់និស្សិតទាំងអស់កុំអស់សង្ឃឹម ហើយបោះបង់ការសិក្សានៅពាក់កណ្តាលទីឱ្យសោះ ហើយប្រសិនជាមានការលំបាកខ្លាំងឬមានឧបសគ្គអ្វីមួយសូមទំនាក់ទំនងមករដ្ឋបាលខេត្ត ឬអភិបាលខេត្តផ្ទាល់ដើម្បីឱ្យរដ្ឋបាលខេត្តក៏ដូចអភិបាលខេត្តអាចជួយទំនុកបំរុងបន្ថែមដើម្បីមានលទ្ធភាពអាចបញ្ចប់ការសិក្សា។ក្នុងនោះអភិបាលខេត្តក៏បានប្រកាសជួយជ្រោមជ្រែងដល់សិស្សក្រីក្រចំនួន២២នាក់និងសិស្សដែលមានពិការ២នាក់ឱ្យមានលទ្ធភាពអាចសិក្សារហូតដល់បញ្ចប់ថ្នាក់បរិញ្ញាបត្រនៅសកលវិទ្យាល័យអង្គរខេមរានាខេត្តកំពង់ស្ពឺនេះ៕ដោយ:APN
