ស្ត្រីទីទ័លក្រ ឈ្មោះ ម៉ា គិត អាយុ៦០ឆ្នាំ បានបញ្ជាក់ប្រាប់អ្នកសារព័ត៌មានថា ប្រសិនបើតុលាការខេត្តកំពង់ស្ពឺ ធ្វើការឃុំខ្លួនប្តីនិងកូនៗរបស់គាត់មែននោះ ច្បាស់ណាស់ គាត់កូនប្រសារ០២នាក់ និងចៅៗចំនួន០៤នាក់ទៀត ប្រាកដជាដាច់បាយស្លាប់ជាក់ជាមិនខានឡើយ ដោយសារតែប្តី និងកូនប្រុសៗទាំង០២នាក់ ជាបង្គោលដ៏រឹងមាំក្នុងគ្រួសារ បើគ្មានពួកគាត់រកលុយមកចិញ្ចឹមក្រុមគ្រួសារនោះទេពិតជាស្លាប់ជាក់ជាមិនខានឡើយ។
ជាចុងក្រោយស្ត្រីឈ្មោះ ម៉ា គិត លើកម្រាមដៃ១០ ទទួចសុំដល់លោកតុលាការខេត្តកំពង់ស្ពឺ លោកអភិបាលខេត្តកំពង់ស្ពឺ និងជាពិសេសសម្តេច តេជោហ៊ុន សែន និងសម្តេច ប៊ុន រ៉ានី ហ៊ុន សែន មេត្តាជួយអន្តរាគមន៍ដោះលែងប្តី និងកូនៗរបស់គាត់ឱ្យមានសេរីភាពវិញផង ដើម្បីមកជួបជុំក្រុមគ្រួសារប្រពន្ធ កូន និងចៅៗវិញផងទាន។
ពាក់ព័ន្ធនិងស្ត្រីទីទ័លក្រ ឈ្មោះ ម៉ា គិត លើកឡើងខាងលើនេះដែរ អ្នកយកព័ត៌មានយើងបានសួរទៅលោក ម៉ន ធីម អនុប្រធានភូមិសូរិយា បានឱ្យដឹងតាមទូរស័ព្ទថា ក្រុមគ្រួសាររបស់អ្នកស្រី ម៉ា គិត និង លោក ស៊ុន មុត នេះពិតជាទីទ័លក្រលំបាកពិតមែន មកសុំដីគេស្នាក់នៅនិងធ្វើខ្ទមជ្រក ដើរស៊ីឈ្នួលគេ ដើរជីកទំពាំង និងដើររើសអេតចាយដើម្បីបានចិញ្ចឹមជីវិត។ លោកអនុប្រធានភូមិបានបញ្ជាក់ថាក្រុមគ្រួសារនេះជាមនុស្សស្លូតត្រង់ មិនលួចឆក់ប្លន់ទ្រព្យសម្បត្តិគេនោះទេ មុនពេលសមត្ថកិច្ចឃាត់ខ្លួននេះ ពួកគាត់ក៏ដូចជាប្រជាពលរដ្ឋនៅក្នុងភូមិ បានទៅដើររើសដំឡូង(ដែលក្រុមហ៊ុនផុតកុងត្រា)ហើយគេប្រញាប់យកដីដាំអំពៅវិញ ហើយត្រូវបានសមត្ថកិច្ចធ្វើការឃាត់ខ្លួនដោយចោទថា បានលួចដំឡូងគេទៅវិញ ៕
