កូរ៉េខាងជើង: ប្រព័ន្ធផ្សព្វផ្សាយរដ្ឋ កាលពីថ្ងៃអង្គារ (ទី២២ ខែកក្កដា) បានរាយការណ៍ថា កូរ៉េខាងជើងបានបញ្ជូនគណៈប្រតិភូទាំងអស់ដែលសុទ្ធតែជាមន្ត្រីស្ត្រី ឱ្យធ្វើដំណើរចាកចេញពីរដ្ឋធានីព្យុងយ៉ាងទៅបំពេញទស្សនកិច្ចនៅប្រទេសរុស្ស៊ី ។
រូបភាពវីដេអូពីទីភ្នាក់ងារសារព័ត៌មានផ្លូវការរបស់កូរ៉េខាងជើង KCNA បានបង្ហាញពីទិដ្ឋភាពគណៈប្រតិភូចាកចេញពីទីក្រុងព្យុងយ៉ាង កាលពីដើមសប្ដាហ៍នេះ ហើយឯកអគ្គរដ្ឋទូតរុស្ស៊ីប្រចាំនៅកូរ៉េខាងជើង លោក អាឡិចសាន់ឌើរ ម៉ាត់សេហ្គោរ៉ា (Alexander Matsegora) រួមជាមួយនឹងមន្ត្រីកូរ៉េខាងជើង បង្ហាញវត្តមាននៅទីនោះ ដើម្បីជូនដំណើរគណៈប្រតិភូ។ ទោះជាបែបណាក្ដី ទីភ្នាក់ងារសារព័ត៌មាន Reuters បានកត់សម្គាល់ថា ខ្លួនមិនអាចបញ្ជាក់ពីភាពត្រឹមត្រូវនៃវីដេអូនោះ បាននៅឡើយទេ ។
គណៈប្រតិភូស្ត្រីខាងលើនេះ ស្ថិតនៅក្រោមការដឹកនាំដោយលោកស្រី គីម ចុងស៊ុន (Kim Jong Sun) ប្រធាននាយកដ្ឋានមកពីគណៈកម្មាធិការកណ្តាលនៃគណបក្សពលករកូរ៉េ។ ទោះយ៉ាងណាក៏ដោយ KCNA មិនបានផ្តល់ព័ត៌មានលម្អិតអំពីគោលបំណង ឬកាលវិភាគនៃដំណើរទស្សនកិច្ចនេះទេ ដោយគេគ្រាន់តែចាត់ទុកថា ដំណើរទស្សនកិច្ចរបស់គណៈប្រតិភូដែលសុទ្ធតែជាស្ត្រីទាំងអស់បែបនេះ គឺកម្រមានខ្លាំងណាស់ ។
ក្នុងរយៈពេលប៉ុន្មានឆ្នាំចុងក្រោយនេះ ទំនាក់ទំនងរវាងកូរ៉េខាងជើង និងរុស្ស៊ីកាន់តែរឹងមាំ ជាពិសេសចាប់តាំងពីសង្គ្រាមនៅអ៊ុយក្រែនបានចាប់ផ្តើមក្នុងខែកុម្ភៈ ឆ្នាំ ២០២២។ កូរ៉េខាងជើង បានរាយការណ៍ថា ខ្លួនបានបញ្ជូនកងទ័ពជាង១ម៉ឺននាក់ និងគ្រឿងយុទ្ធោបករណ៍ជាច្រើន ដើម្បីជួយគាំទ្រដល់កិច្ចខិតខំប្រឹងប្រែងសង្រ្គាមរបស់រដ្ឋធានីមូស្គូ ៕
អត្ថបទ:ដោយ សុខ សុភ័ណ្ឌ ប្រែសម្រួល
