ព្រៃលិចទឹកនៅខាត្បូងភូមិព្រែកតានង់ត្រូវបានកាប់បំផ្លាញតាមរយ:ការទិញរបស់ពួកឈ្មួញឃុបឃិតជាមួយអាជ្ញាធរ

កំពង់ចាម÷តាមរយៈការចុះដោយផ្ទាល់កាលព្រឹកថ្ងៃទី១៥ខែកក្កដាឆ្នាំ២០២៥ក្រុមអ្នកកាសែត ធ្វើដំណើរដោយថ្មើជើងចម្ងាយជិត៣គីឡូម៉ែត្រ នៅវាលបឹងខាង ត្បូងភូមិព្រែកតានង់ ឃុំព្រែកតានង់ ស្រុកកោះសូទិន ខេត្តកំពង់ចាម..ជាទីវាលព្រៃតំបន់លិចទឹកគ្រប់គ្រងដោយខាងជលផល ពេលនេះប្រឈមនឹងការរលាយហិនហោច តាមរយៈការឃុបឃិតគ្នានៃអាជ្ញាធរមូលដ្ឋានលក់ឲ្យឈ្មួញកាប់ទន្ទ្រានអស់ទៅហើយ។

ប្រភពព័ត៌មានបានឲ្យដឹងថា មកដល់ពេលនេះព្រៃលិច ទឹកដែលជាតំបន់បឹង ស្ថិតនៅក្នុងភូមិទី៩,ភូមិទី១០ ឃុំព្រែកតានង់ ស្រុកកោះសូទិន..ត្រូវបានកាប់រុករានឈូសឆាយបានប្រមាណជាង៥០ហិចតារួចហើយ។ តាមផែន ការនៅរដូវប្រាំងខាងមុខនេះ,ផ្ទៃដីបឹងដំរីឆ្លងនិងតួរហាត់ខ្យល់ ដែលគ្របដណ្ដប់ដោយព្រៃលិចទឹកប្រមាណជាង ១០០ ហិចតា ត្រូវប្រឈមកាប់បំផ្លាញឈូសដុតកំទេចឲ្យស្អាតនិងឲ្យរួចរាល់។

ក្រោមការសម្របសម្រួលរបស់ប្រធាន ភូមិទី៩និងផ្នែកខ្លះភូមិទី១០និងមួយចំនួនភូមិទី៨ ដីព្រៃលិចទឹក និងតំបន់បឹងទាំងនេះ ត្រូវបានលក់ទៅឲ្យឈ្មួញក្នុងតម្លៃ១ ហិចតា២៥០០ដុល្លារ។ ឈ្មួញបានទម្លាក់លុយជាច្រើនដំណាក់កាលច្រើនតង់,ទៅឲ្យមេការនៅតំបន់នោះដែល គេដឹងថាមេការនៅនឹងកន្លែង នៃភូមិទី៩ឈ្មោះលោករ៉ុមជួលប្រជាពលរដ្ឋកាប់ដោយដៃ និងបន្ទាប់មកទើបជួលត្រាក់ទ័រមកឈូសឆាយសំអាតជាក្រោយ។ ត្រាក់ទ័រ១ គ្រឿងត្រូវដឹងថាមកពីភូមិក្សេរ កំពុងធ្វើសកម្មភាពឈូសឆាយនៅទីនោះ។

បើតាមសេចក្តីរាយការណ៍បានឲ្យដឹងថា មេការជាអ្នក សម្របសម្រួល និងដើរជួលប្រជាពលរដ្ឋឲ្យចុះទៅកាប់ជាការព្រៃទាំងនោះក្នុង១ហិចតា តម្លៃ១លានរៀល។ នៅ ក្នុងរយៈពេលប៉ុន្មានថ្ងៃចុងក្រោយថ្មីៗនេះ សកម្មភាពកាប់ឆ្ការ ហាក់ដូចជាបានបន្ធូរដៃ ឬបានសម្រាកដោយលើកឡើងអំពីមូលហេតុសំខាន់២យ៉ាង,ទី១អ្នកកាប់ឆ្ការមិនទាន់បានទទួលប្រាក់គ្រប់ចំនួននិងទី២ទំនងជាលេចឮដល់មន្ត្រីជលផលដែលគេចុះមកត្រួតពិនិត្យមើល។ ដូច្នេះហើយអ្នកកាសែត ដែលចុះទៅមើលនោះមិនជួបប្រទះអ្នកកាប់ឆ្ការដោយផ្ទាល់ទេ។

លោក ប៉ិញ សុខឃាង មេឃុំព្រែកតានង់បានប្រាប់អ្នក កាសែតថា ដីនេះពីដើមមកគាត់(ប្រជាពលរដ្ឋ)ធ្លាប់អាស្រ័យផល,ខ្ញុំបានឱ្យហៅគាត់មកធ្វើកិច្ចសន្យាឈប់ធ្វើដីហ្នឹងតទៅទៀត។ គាត់ឈ្មោះសែម សារុម ។ កាល មុនប្រជាពលរដ្ឋមានការលក់ដូរ(ដីព្រៃ)នៅឆ្នាំ២០១៩។ ឥឡូវយើងបានទទួលការណែនាំពីរដ្ឋបាលខេត្ត យើងរក្សាដីនេះទុក។

ដីតំបន់លិចទឹកនេះត្រូវបានគ្រប់គ្រងថែរក្សាដោយសមត្ថកិច្ចជលផល ហើយប្រជាពលរដ្ឋអាចទៅនេសាទត្រីជាលក្ខណៈគ្រួសារតាមដំណែលចាស់បុរាណកន្លង មក។ ឥឡូវនេះព្រៃលិចទឹកនៅតំបន់នោះ ត្រូវបានកាប់បំផ្លាញអស់ហើយ តាមរយៈការឃុបឃិតគ្នារវាងអាជ្ញាធរមូលដ្ឋាននៅឃុំព្រែកតានង់។ ករណីនេះរដ្ឋបាលខេត្តកំពង់ចាមត្រូវតែបើកការស៊ើបអង្កេតឲ្យបានច្បាស់លាស់ថា តើស្ថាប័នណាខ្លះពាក់ព័ន្ធនិងករណីខាងលើ។ លោកមេឃុំ? លោកស្មៀន?លោកមេប៉ុស្តិ៍?បណ្ដាអស់លោកជា ប្រធានភូមិ?  តើត្រូវជំរុញឲ្យអង្គភាពប្រឆាំងអំពើពុក រលួយហៅមន្ត្រីពាក់ព័ន្ធទាំងនេះសួរនាំដែរឬទេ?៕ដោយ:សំ ណាង