ស្ត្រីម្នាក់ជិះម៉ូតូទៅឆ្លងទន្លេដោយខ្លួនឯង ពេលនេះសម្រាលបានស្រីដោយសុវត្ថិភាពក្រោយពីក្រុមគ្រូពេទ្យយកចិត្តទុកដាក់

ស្ទឹងត្រែង៖ស្រ្តីម្នាក់ដែលទៅសម្រាលកូន ដោយជិះម៉ូតូខ្លួនឯង ហើយមិនឃើញមានប្តី និងសាច់ញាតិជូនទៅមន្ទីរពេទ្យនោះ នៅពេលនេះសម្រាលកូនស្រី ដោយសុវត្ថិភាព ក្រោមការជួយ និងយកចិត្តទុក ដាក់ពីក្រុមគ្រូពេទ្យនៅស្រុកថាឡាបរីវ៉ាត់ ខេត្តស្ទឹងត្រែង។

ស្រ្តីរូបនេះ បានទទួលការអាណិតអាសូរយ៉ាងខ្លាំងពីមហាជននៅតាមបណ្តាញសង្គម ព្រោះតែគាត់ ត្រូវជិះម៉ូតូកញ្ចាស់១គ្រឿង ទៅឆ្លងទន្លេខ្លួនឯង ដែលស្ទើរមិនជឿនោះឡើយ។

តែក្រោយទៅដល់មន្ទីរពេទ្យ និងកើតបានកូនស្រីម្នាក់ ទើបប្រហែល២ម៉ោងក្រោយ ឃើញប្តីរបស់គាត់ទៅមើលដល់ពេទ្យ។

ស្រ្តីដែលគួរឲ្យអាសូរនេះមានឈ្មោះ សារិ សូភី អាយុ ២៧ឆ្នាំ រស់នៅភូមិវាលខ្សាច់ ឃុំថាឡាបរីវ៉ាត់ ស្រុកថាឡាបរីវ៉ាត់ ហើយនេះជាការសម្រាលកូនទី៦របស់គាត់។

ស្រ្តីរូបនេះបានសម្រាលកូនស្រី ដែលមានទម្ងន់រហូតដល់៣.៥គីឡូក្រាម តែសុខភាពទាំងម្តាយ និងកូនមានភាពល្អប្រសើរ។

នេះជាស្ថានភាពរបស់ប្រជាពលរដ្ឋយើងខ្លះនៅតំបន់ជនបទ និងតំបន់ដាច់ស្រយ៉ាល។

សង្ឃឹមថាស្រ្តីរូបនេះ នឹងទទួលបានការឧបត្ថម្ភពីសប្បុរសជននានា៕ដោយ:apn