សម្តេចតេជោ ហ៊ុន សែន បានបង្ហាញការអស់សំណើចចំពោះស្ថាប័នស្ទង់មតិថៃ (NIDA) ដែលធ្វើការស្ទង់មតិប្រជាជនថៃចំពោះរូបសម្តេច ដែលជាមេដឹកនាំរបស់ប្រទេសសត្រូវខ្លួនទៅវិញ
នៅរសៀលថ្ងៃទី៩ កក្កដានេះសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បានបង្ហាញការភ្ញាក់ផ្អើល និងអស់សំណើចចំពោះស្ថាប័នស្ទង់មតិថៃ (NIDA) ដែលធ្វើការស្ទង់មតិប្រជាជនថៃចំពោះរូបសម្តេច ដែលជាមេដឹកនាំរបស់ប្រទេសជាសត្រូវរបស់ខ្លួនទីវិញ។
សម្តេចចាត់ទុកវាជារឿងកម្រនិងចម្លែកមួយនៅលើពិភពលោក ដែលប្រទេសមួយធ្វើស្ទង់មតិលើមេដឹកនាំនៃប្រទេសដែលកំពុងមានវិវាទជាមួយខ្លួន។
សម្តេចបាននិយាយថា៖វាជារឿងដ៏ចម្លែក និងកម្រណាស់នៅលើពិភពលោក ដែលប្រទេសមួយកំពុងប្រឈមមុខដាក់គ្នា បែរជានាំគ្នាធ្វើការស្ទង់មតិចំពោះមេដឹកនាំប្រទេសមួយទៀតដែលជាសត្រូវរបស់ខ្លួនទៅវិញ ហើយវាជារឿងគួរឲ្យអស់សំណើច និងគ្មានហេតុផលអ្វីដែលត្រូវធ្វើបែបនេះទេ ប៉ុន្តែប្រទេសថៃអាចធ្វើរឿងបែបនេះបាន។
សម្តេចតេជោបន្តថា ការស្ទង់មតិរបស់ថៃមិនមែនជាការចោទប្រកាន់ទេ ប៉ុន្តែជាសញ្ញាបង្ហាញពីការចាប់អារម្មណ៍ខ្លាំង និងផ្តល់តម្លៃចំពោះតួអង្គនយោបាយបរទេស។ ទន្ទឹមនឹងនេះ សម្តេចបានទូន្មានថា ប្រជាជនថៃគួរតែស្ទង់មតិលើមេដឹកនាំរបស់ខ្លួនជាមុនសិន ជំនួសឲ្យមកពិនិត្យលើមេដឹកនាំកម្ពុជាដូច្នេះ។
សម្តេចបានបន្ថែមថា៖អ្វីដែលខ្ញុំខ្លាចបំផុតនោះគឺ ប្រជាជនថៃស្រឡាញ់ ហ៊ុន សែន ដែលអាចបង្ហាញពីខ្ញុំក្បត់ជាតិសាសន៍ និងប្រជាជនរបស់ខ្ញុំ ប៉ុន្តែអ្វីដែលខ្ញុំចង់បានបំផុតនោះគឺ សត្រូវវាយតម្លៃ ហ៊ុន សែន ក្នុងកម្រិតទាបបំផុត ដែលចំណុចនេះបង្ហាញថា ខ្ញុំកំពុងធ្វើរឿងដ៏ត្រឹមត្រូវចំពោះប្រទេសជាតិ និងប្រជាជនរបស់ខ្ញុំ”៕ដោយ:APN
