ទាហានកម្ពុជាយើងម្នាក់ណាក៏ដូចគ្នាដែរសុទ្ធតែពូជអ្នកចម្បាំងមិនខ្លាចសត្រូវឈ្លានពាន

សម្រាប់វីដេអូមួយនេះ គឺទាហានយើងនៅខ្សែត្រៀមជួរមុខម្តុំភ្នំ៥៧០ ជាប់មុំបី បានល្បាតជួបជាមួយឈុតខ្មៅសៀមមួយក្រុម នៅរសៀលថ្ងៃទី៥ ខែកក្កដា ឆ្នាំ២០២៥ តែទាហានកម្ពុជាបានឃាត់ពួកគេ មិនឲ្យចូលមកទៀត ពីព្រោះជាដីខ្មែរ ហើយមិនទាន់ជួបចរចាគ្នាឲ្យត្រូវរវាងមេបញ្ជាការទាំង២នៅតំបន់នោះ។

បងប្រុសដែលកាន់ និងស្ពានអាវុធជាប់ខ្លួន (B69) បានសម្តីខ្លាំងៗដាក់ទៅទាហានឈុតខ្មៅសៀម ឲ្យនៅស្ងៀម កុំចេះតែដើរចូលផ្តេសផ្តាស់ ព្រោះមិនទាន់និយាយគ្នាត្រូវ រឿងដើរល្បាត។

យើងទាំងអស់គ្នា ពិតជាមានមោទនភាព និងមានទំនុកចិត្តជឿជាក់យ៉ាងខ្លាំងលើកងទ័ពរបស់យើងនៅសមរភូមិជួរមុខ ដែលជាកងទ័ពក្លាហាន រឹងមាំ ម៉ឺងម៉ាត់ ហើយគ្មានខ្លាចញញើតពួកសត្រូវឈ្លានពាននោះទេ។

តាមតំបន់ព្រំដែននៅសមរភូមិមួយចំនួនក្នុងខេត្តព្រះវិហារ ទាហានសៀមតែងចង់បង្កភាពតានតឹង និងចង់ឲ្យកងទ័ពកម្ពុជាផ្ទុះអាវុធដាក់មុន ពោលពួកគេធ្វើឲ្យយើងទ្រាំលែងបានតែម្តង តែកងទ័ពកម្ពុជាមានវិន័យត្រឹមត្រូវ និងស្តាប់បទបញ្ជាថ្នាក់លើយ៉ាងម៉ឺងម៉ាត់។

ពួកគេប្រើយុទ្ធសាស្រ្តល្បាតខុសផ្លូវ និងចេះតែចង់រុលមកចូលដីខ្មែរ តែទាហានយើងនៅជួរមុខ បានរារាំងទប់ស្កាត់មិនឲ្យចូលឡើយ និងត្រូវដើរល្បាតតាមតម្រាយផ្លូវដែលឯកភាពគ្នា។

នៅក្នុងវីដេអូនេះ យើងមើលឃើញយ៉ាងច្បាស់ថា កងទ័ពយើងបានយកអាយុជីវិតទៅផ្ញើនៅសមរភូមិទាំងនេះហើយ ពីព្រោះការប្រយុទ្ធគ្នាអាចកើតឡើងគ្រប់ពេល បើស្ថានភាពប្រឈមបែបនេះជារៀងរាល់ថ្ងៃនោះ។

នេះជាជីវិតទាហានការពារទឹកដី និងចូលក្នុងសមរភូមិសង្គ្រាម ដែលឃ្លាតឆ្ងាញពីក្រុមគ្រួសារ និងមនុស្សជាទីស្រឡាញ់។

សូមជូនពរពូៗបងៗមានសុខភាពល្អ ចៀសឆ្ងាយពីជំងឺ សំណាងល្អ និងឈ្នះអស់សត្រូវឈ្លានពានទឹកដីយើង។

ពួកយើងជាសមរភូមិក្រោយ សូមគាំទ្រ និងផ្តល់កម្លាំងចិត្តគ្រប់ពេលសម្រាប់បងប្អូនយើងនៅសមរភូមិ៕ដោយ:សួន ពិសិត