ពោធិ៍សាត់ : ជនសង្ស័យម្នាក់ត្រូវបាននគរបាលស្រុកតាលោសែនជ័យស្ទាក់ឃាត់ខ្លួនបានភ្លាមៗបន្ទាប់ពីចូលធ្វើសកម្មភាពគម្រាមប្លន់យកម៉ូតូគេដល់ក្នុងផ្ទះរួចជិះគេចខ្លួនបានរយៈពេលត្រឹមជាងមួយម៉ោងប៉ុណ្ណោះ។
សកម្មភាពចុះឃាត់ខ្លួនជនសង្ស័យធ្វើឡើងនៅវេលាម៉ោង11 និង 15 នាទីយប់ថ្ងៃទី 26 ខែមិថុនាឆ្នាំ 2021ត្រង់ចំណុចបឹងអំពិល ភូមិតាំងគោកឃុំតាលោស្រុកតាលោសែនជ័យខេត្តពោធិ៍សាត់។
លោក អ៊ុលហៃ អធិការនគរបាលស្រុកតាលោកសែនជ័យប្រាប់ឲ្យដឹងថាជនសង្ស័យឈ្មោះ អូមសារុំ ភេទប្រុសអាយុ 42 ឆ្នាំរស់នៅក្នុងឃុំត្នោតជុំស្រុកក្រគរខេត្តពោធិ៍សាត់។ ដោយឡែកម្ចាស់ម៉ូតូរងគ្រោះឈ្មោះសុខអានភេទស្រីអាយុ 62 ឆ្នាំរស់នៅក្នុងភូមិឃុំខាងលើ។
លោកបញ្ជាក់ថាបន្ទាប់ពីទទួលព័ត៌មានថាជនសង្ស័យខាងលើចូលធ្វើសកម្មភាពគំរាមប្លន់យកម៉ូតូម៉ាកវេវអាល់ហ្វាពណ៌សស៊េរីឆ្នាំ 2013ពីជនរងគ្រោះដល់ក្នុងផ្ទះរួចជិះគេចខ្លួនដោយសុវត្ថិភាព លោកបានរៀបចំកម្លាំងសហការចុះស្ទាក់គ្រប់ច្រកល្ហកហើយបានជួបជនសង្ស័យកំពុងជិះម៉ូតូនៅចំណុចខាងលើគាត់ដេញស្ទាចាប់បានតែម្ដង។លោកថានៅចំពោះមុខសមត្ថកិច្ចជនសង្ស័យបានឆ្លើយសារភាពថាពួកគេមានគ្នាបីនាក់ពេលចូលធ្វើសកម្មភាពគឺទៅតែម្នាក់ឯងតែប៉ុណ្ណោះ។ដោយឡែកពីរនាក់ទៀតឈរចាំមើលផ្លូវនៅក្បែរផ្ទះ។
ចំពោះជនសង្ស័យសមត្ថកិច្ចបញ្ជូនមកអធិការដ្ឋាននគរបាលដើម្បីបង្កសំណុំរឿងតាមនីតិវិធី។!
