មន្ត្រីក្រសួងការងារនិងបណ្តុះបណ្តាលវិជ្ជាជីវ:ខេត្តបាត់ដំបងចាំទទួលស្វាគមន៍ពលករខ្មែរដែលវិលត្រឡប់មកប្រទេសវិញ

បាត់ដំបង: មន្រ្តីក្រសួងការងារ និងមន្ទីរការងារខេត្តបាត់ដំបង បានរង់ចាំស្វាគមន៍ប្រជាពលរដ្ឋ និងពលករខ្មែរដែលត្រឡប់វិញតាមច្រកទ្វារព្រំដែនអន្តរជាតិដូង ស្រុកកំរៀងខេត្តបាត់ដំបង ដើម្បី ផ្តល់ព័ត៌មានស្តីពីព័ត៌មានការងារក្នុងស្រុក និងក៏មានមន្រ្តីសម្ភាសន៍ការងារផ្ទាល់នៅមាត់ច្រកតែម្តង នាថ្ងៃទី១៦ ខែមិថុនា ឆ្នាំ២០២៥។
លោក មាស ដារ៉ា ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តបាត់ដំបងបានផ្តល់បទសម្ភាសន៍ខណៈលោកប្រចាំការនៅច្រកព្រំដែនបានឱ្យដឹងថា ក្រុមការងារក្រសួង ,មន្ទីរការងារ, មន្រ្តីបសស ,គ្រឹះស្ថានបណ្តុះបណ្តាលវិជ្ជាជីវៈបបទាំង៣ ,មជ្ឈមណ្ឌលការងារជាដើម បានប្រចាំការនៅមាត់ច្រកទ្វារតែម្តង ដើម្បីត្រៀមទទួលពលករខ្មែរ ។
លោកបានបញ្ជាក់ថាមន្រ្តីបានធ្វើការផ្សព្វផ្សាយ និងសម្ភាសន៍ផ្តល់ការងារជូនដល់ពលករធ្វើភ្លាមៗតែម្តង បើសិនបងប្អូនចង់ទៅភ្លាម មន្រ្តីបញ្ជូនទៅតាមរោងចក្រសហគ្រាសក្នុងប្រទេសភ្លាម ដែលការប្រកាសរបស់ក្រសួងមានការងារក្នុងស្រុកជាង២៣ម៉ឺនកន្លែង។ លោកបន្ថែមថាបើសិនជាពលករមិនទាន់ចង់រកការងារភ្លាមទេអាចមកទទួលការបណ្តុះបណ្តាលចាប់រកជំនាញសិន ចាំបន្តរកការងារធ្វើក៏បានដែរ ដោយវិទ្យាស្ថានបណ្តុះបណ្តាលវិជ្ជាជីវៈខេត្តបាត់ដំបងមានបីកន្លែងបានបើកទទួលចុះឈ្មោះចូលរៀនជំនាញបច្ចេកទេសវិជ្ជាជីវៈគ្រប់ជំនាញតាមចំណង់ចំណូលចិត្ត ហើយសុទ្ធសឹងតែជំនាញត្រូវនឹងទីផ្សារការងារក្នុងស្រុកនាពេលបច្ចុប្បន្ន ។
លោកបញ្ជាក់ថាបន្ថែមពីនោះរដ្ឋបាលខេត្តបាត់ដំបងបានយកចិត្តទុកដាក់ឱ្យមន្រ្តីពាក់ព័ន្ធផ្សព្វផ្សាយពីគោលនយោបាយគាំពារសង្គម សម្រាប់ពលករ ដូចជាគាំពារលើថែទាំសុខភាព គ្រោះថ្នាក់ការងារ និងប្រាក់សោធនជាដើម នឹងមានរៀបចំទីទួលសុវត្ថិភាពនៅបេនឡានផ្ទាល់តែម្តងដែលមានទីតាំងធំទូលាយ អាចដាក់ពលករពី៤ពាន់ទៅ៥ពាន់នាក់ និងបន្តសង់បន្ថែមទៀតបើសិនមានបងប្អូនពលករត្រឡប់មកចូលប្រទេសវិញកាន់តែច្រើន។បន្ថែមពីនោះក៏រៀបចំក្រុមគ្រូពេទ្យប្រចាំការសង្គ្រោះព្យាបាលរឺបញ្ជូនបន្ត និងការសម្របសម្រួលផ្សេងៗពីអាជ្ញាធរមានសមត្ថកិច្ចផងដែរជូនដល់ពលករ ៕
ដោយ:សុខ សុភ័ណ្ឌ