ខេត្តសៀមរាប៖ ករណីលូចឈូសឆាយដីព្រៃលិចទឹកជាច្រើនហិកតា នៅក្នុងភូមិសាស្ត្រស្រុកពួក ពលរដ្ឋមានការសង្ស័យថា ករណីនេះអាចមានការឃុបឃិតគ្នាជាប្រព័ន្ធ។
ប្រភពពីបងប្អូនប្រជាពលរដ្ឋបានលើកឡើងថា ទីតាំងឈូសឆាយដីព្រៃលិចទឹក ស្ថិតនៅ(តំបន់លូបី គ្រប់គ្រងដោយសហគមន៍)ក្នុងស្រុកពួក។
នៅរសៀលថ្ងៃទី ១៣ ខែឧសភា ឆ្នាំ២០២១ ម្សិលមិញ ស្ថិតនៅតំបន់ទំនុកចិត្ត ៧៨ ចំណុចលូបី ឃុំល្វា ស្រុកពួក ខេត្តសៀមរាប មានបណ្ដាអ្នកសារព័ត៌មានជាច្រើនអង្គភាព បានចុះទៅដល់ចំណុចទីតាំងដីព្រៃលិចទឹកខាងលើ ប្រទះឃើញអេស្កាចំនួនពីរគ្រឿងកំពុងធ្វើសកម្មភាពភ្លាមៗនោះដោយសារតំបន់អត់សេវាមិនអាចទំនាក់ទំនងទៅអាជ្ញាធរដើម្បីសុំការអន្តរាគមន៍បាន លុះមកដល់ព្រឹកថ្ងៃទី ១៤ ខែឆ្នាំដដែល អ្នកសារព័ត៌មានទាំងអស់នោះបានសុំការបំភ្លឺពីប្រធានសហគមន៍ក្នុងស្រុកពួក លោកឆ្លើយថាកាលពីពេលថ្មីៗនេះក៏ត្រូវបានចាប់អេស្កាការចំនួន ២ គ្រឿងផងដែរ តែបើមានធ្វើសកម្មភាពទៀតចូលរួមសោកស្ដាយដែរព្រោះមិនបានដឹង។
យោងតាមប្រភពពីប្រជាពលរដ្ឋបានរាយការណ៍បន្តថាការឈូសឆាយនេះភាគច្រើនសុទ្ធតែអ្នកធំមានអំណាចទើបអាចធ្វើបានអ្នកតូចតាចអត់ខ្សែប្រជាពលរដ្ឋស្លូតត្រង់កុំឡើងថាយកអេស្កាមកវ៉ៃព្រៃនោះសុំបីតែកំបិតកាប់សឹងតែមិនបានផង។ ការឈូសឆាយដីព្រៃលិចទឹកខាងលើធ្វើឡើងជិត១ខែមកហើយ ដោយអស់ដីព្រៃជាច្រើនហិកតាដែលជាជម្រកមច្ឆាជាតិត្រីពងកូន។
ពាក់ព័ន្ធករណីឈូសឆាយដីព្រៃលិចទឹកនេះ អង្គភាពសារព័ត៌មានយើងមិនអាចសុំការបំភ្លឺពីអាជ្ញាធរពាក់ព័ន្ធមានសមត្ថកិច្ចណាម្នាក់បាននៅឡើយអង្គភាពយើងរង់ចាំទទួលស្វាគមន៍រាល់ការបកស្រាយបំភ្លឺពាក់ព័ន្ធករណីឈូសឆាយដីព្រៃលិចទឹកខាងលើ។
ទោះជាយ៉ាងណាពលរដ្ឋសង្ឃឹមថា ឯកឧត្តម ទៀសីហា អភិបាលនៃគណៈអភិបាល ខេត្តសៀមរាប និងមានវិធានការទៅលើមន្ត្រីមានសមត្ថកិច្ចពាក់ព័ន្ធ ជុំវិញករណីខាងលើ។ដោយ ខ្លាខ្មៅ
