កំពង់ស្ពឺ៖ លោកឧត្តមសេនីយ៍ត្រី ទូច សុភក្ត្រ ហៅ ចាយ មុន្នី ហៅទិត្យ ភេទប្រុស អាយុ៧១ឆ្នាំ អតីតគ្រូហ្វឹកហ្វឺន និង ជានាយរងសេនាធិការ នៅបញ្ជាការដ្ឋានកងរថក្រោះហៅកាត់(ACO) ចូលនិវត្តន៍នៅក្នុងឆ្នាំ២០២៣ ដង្ហើយរកយុត្តិធម៌ ស្នើដល់ថ្នាក់លើ និងជាពិសេសសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ខណៈដែលដីអាស្រ័យផលរបស់គាត់ជិត៤០ឆ្នាំហើយ បែរជាមន្ត្រីយោធា ក្រោមការបញ្ជាផ្ទាល់របស់លោកឧត្តមសេនីយ៍ឯក ឡាញ់ កៅ មេបញ្ជាការកងរថក្រោះ(ACO)ដាក់គ្រឿងចក្រឈូសឆាយ ជីកកាយដំណាំអស់ជាច្រើន។
លោកឧត្តមសេនីយ៍ ទូច សុភក្ត្រ ហៅចាយ មុន្នី ហៅទិត្យ អតីតគ្រូហ្វឹកហ្វឺន និងជានាយរងសេនាធិការ បានលើកឡើងថា រូបលោកបានចូលបំរើការងារជាកងកម្លាំងការពារជាតិ នៅក្នុងមជ្ឈមណ្ឌលហ្វឹកហ្វឺនបាញ់គ្រាប់ពិតបន្ទាយ(ACO) តាំងពីឆ្នាំ១៩៨៣ និងស្នាក់នៅក្នុងភូមិអន្លង់ថ្លឹង ឃុំមហាសាំង ស្រុកភ្នំស្រួច ខេត្តកំពង់ស្ពឺ។ ហើយក៏បានទិញដីស្រែពីប្រជាពលរដ្ឋចំនួន៤គ្រួសារដើម្បីអាស្រ័យផលនៅក្នុងឆ្នាំ១៩៨៥។ លោក ទូច សុភក្ត្រ ហៅ ចាយ មុន្នី ហៅទិត្យ ក៏ដឹងដែរថាដីដែលលោកបានទិញពីប្រជាពលរដ្ឋយកមកអាស្រ័យផល ជាប់ដីរបស់គាត់នោះនៅក្នុងបន្ទាយកងរថក្រោះ ប៉ុន្តែបើថ្នាក់លើត្រូវការពេលណា លោកប្រគល់ជូនភ្លាម។ ប៉ុន្តែអ្វីដែលធ្វើឱ្យលោកឧត្តមសេនីយ៍ ទូច សុភក្ត្រ ហៅ ចាយ មុន្នី ហៅទិត្យ ហួសចិត្តនោះ គឺដីនៅក្នុងបន្ទាយកងរថក្រោះមានទំហំធំណាស់ ហើយកាលពីជាង១០ឆ្នាំមុនបានកាត់ឆ្វៀលដីទៅប្រជាពលរដ្ឋជិត១០ភូមិទៅហើយ មិនតែប៉ុណ្ណោះដីនៅក្នុងបន្ទាយកងរថក្រោះប៉ែកខាងកើត មានទំហំប្រហែល៤០ហិកតា ហេតុអ្វីបានជាលោក ឡាញ់ កៅ មេបញ្ជាការកងរថក្រោះ(ACO) បែងចែកទៅឱ្យមន្ត្រីយោធា និងមន្ត្រីចូលនិវត្តន៍ជាច្រើនគ្រួសារបាន។ ចុះហេតុអ្វីត្រឹមដីអាស្រ័យផលរបស់លោកត្រឹមជាងកន្លះហិកតា មានដាំដំណាំហូបផ្លៃ និងមានស្រះចិញ្ចឹមត្រីហើយផងនោះ បែរជាលោកមេបញ្ជាការកងរថក្រោះ បញ្ជាឱ្យមន្ត្រីដាក់គ្រឿងចក្រមកឈូសឆាយ និងជីកគាស់កាយដំណាំហូបផ្លែរបស់គាត់មានដូចជាដើមស្វាយ ដើមឬស្សី និងជីកកាយដីរងការខូចខាតទុយោប្រព័ន្ធទឹកជាច្រើនម៉ែត្រដែលជាប្រព័ន្ធស្រោចស្រព ដំណាំផ្សេងៗ ទាំងបំពានខណៈដែលរូបគាត់ជាអតីតគ្រូហ្វឹកហ្វឺន និងជានាយរងសេនាធិការថែមទៀតផង។
លោក ទូច សុភក្ត្រ ហៅ ចាយ មុន្នី ហៅទិត្យ បានបន្តទៀតថា លោកបានលះបង់កម្លាំងកាយចិត្តបំរើការងារ បំរើជាតិជាង៤០ឆ្នាំកន្លងទៅហើយ ចំណាយថវិកាជួយបក្សស្រុកភ្នំស្រួច ឃុំតាំងសំរោង។ ត្រឹមដីអាស្រ័យផលជាងកន្លះហិកតាដែលជាប់ដីលំនៅឋានសោះ អស់ហេតុអ្វីបានអស់លោកមន្ត្រីយោធា លោកមេបញ្ជាការកងរថក្រោះ(ACO) មិនយោគយល់ មិនជូនដំណឹងមុនពេលដែលដាក់គ្រឿងចក្រមកធ្វើការឈូសឆាយ ជីកគាស់កាយ បំផ្លាញដំណាំហូបផ្លែទាំងបំពានទៅវិញ។ ខណៈដែលអស់លោកបានយកដីបន្ទាយបែងចែកគ្នា ខ្លះចេញប្លង់រឹង ដីខ្លះទៀតកំពុងតែរៀបចំឯកសាររត់ការធ្វើប្លង់រឹងបន្ថែមទៀតហើយ តើថ្នាក់លើមានដឹងពីទង្វើររបស់លោកមេបញ្ជាការកងរថក្រោះ(ACO) នេះដែរឬទេ?។ ក្នុងនាមរូបលោកជាអតីតមន្ត្រីយោធាមួយរូបដែរ ប៉ុន្តែត្រឹមកូនចៅបន្តវេនម្នាក់គ្មានផង។ រីឯក្រុមគ្រួសាររបស់ លោកមេបញ្ជាការ និងថ្នាក់ដឹកនាំក្នុងបន្ទាយកងរថក្រោះ(ACO)នេះវិញ មានឈ្មោះប្រពន្ធ កូន ចៅ និងសាច់ញាតិខ្សែស្រឡាយថែមទៀតផង មិនខុសពីពាក្យចាស់លោកពោលថា កន្ទេរធំបន្លំដេកនោះទេ ។
ជាចុងក្រោយលោកទូច សុភក្ត្រ ហៅចាយ មុន្នី ហៅទិត្យ អតីតគ្រួហ្វឹកហ្វីននិងជានាយរងសេនាធិការបញ្ជាការដ្ឋានកងរថក្រោះ(ACO) ធ្វើការសំណូមពរដល់ឯកឧត្តមនាយឧត្តសេនីយ៍ វង្ស ពិសេន អគ្គមេបញ្ជាការកងយោធពលខេមរភូមិន្ទចាត់កម្លាំងជំនាញអធិការកិច្ចចុះពិនិត្យស្រាវជ្រាវផង និងជាពិសេសធ្វើការសំណូមពរដល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាមេត្តាជួយពិនិត្យមើលទង្វើររបស់លោកឧត្តមសេនីយ៍ឯក ឡាញ់ កៅ មេបញ្ជាការកងរថក្រោះ(ACO)ធ្វើរាល់ថ្ងៃនេះផងទាន។
ពាក់ព័ន្ធនិងការលើកឡើងរបស់លោក ទូច សុភក្ត្រ ហៅចាយ មុន្នី ហៅទិត្យ អតីតគ្រូហ្វឹកហ្វឺន និងជានាយរងសេនាធិការបញ្ជាការដ្ឋានកងរថក្រោះនេះដែរ លោក ឡាញ់ កៅ មេបញ្ជាការកងរថក្រោះហៅកាត់(ACO)អ្នកយកព័ត៌មានខលចូល មានអ្នកលើកបដិសេធថា លោក ឡាញ់ កៅ អត់នៅទេ ហើយការងារនោះសួរអ្នកគេធ្វើការងារនៅទីនោះដឹងហើយ លោកមេបញ្ជាការ ចាំលោកប្រាប់តាមនឹង៕
