កំពង់ស្ពឺ:លោកឧបនាយករដ្ឋមន្ត្រី ហ៊ុន ម៉ានី ប្រធានកិត្តិយសសាខាកាកបាទក្រហមកម្ពុជា ខេត្តកំពង់ស្ពឺ ថ្ងៃទី ១ ខែឧសភា ឆ្នាំ២០២៥នេះ បានអញ្ជើញជាអធិបតីដឹកនាំ សាខាកាកបាទក្រហមកម្ពុជា ខេត្តកំពង់ស្ពឺ ប្រារព្ធខួបលើកទី១៦២ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០២៥។
ក្រោមប្រមូលបទ (រួមគ្នាស្ម័ត្រចិត្ត ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ)ដោយមានការចូលរួមពីគណៈកម្មាធិការសាខា សមាជិក សមាជិកា ក្រុមប្រឹក្សាខេត្ត អភិបាលខេត្ត មន្ទីរ-អង្គភាពនានាជុំវិញខេត្ត យុវជនកាកបាទក្រហមកម្ពុជា អ្នកស្ម័គ្រចិត្តកាកបាទក្រហម អ្នកឧកញ៉ា លោកឧកញ៉ា តំណាងម្ចាស់ក្រុមហ៊ុន អាជីវករ សប្បុរសជនជាតិ អន្តរជាតិ សរុបប្រមាណ ១៣០០នាក់។
ក្នុងឱកាសនោះដែរ លោកឧបនាយករដ្ឋមន្ត្រី ហ៊ុន ម៉ានី បានលើកឡើងថា ការប្រារព្ធមីទ្ទីងអបអរខួបទី១៦២ ទិវាពិភពលោកកាកបាទក្រហម អឌ្ឍចន្ទក្រហម នាពេលនេះក្នុងគោលបំណងរំលឹកដល់ថ្ងៃកំណើតរបស់លោក ហង់រី ឌុយណង់ ដែលជាស្ថាបនិករបស់កាកបាទក្រហម យល់ដឹងអំពីប្រវត្តិចលនារបស់កាកបាទក្រហម អឌ្ឍចន្ទក្រហម និងបង្ហាញជូនពីលទ្ធផលការងារមនុស្សធម៌ ។
ដែលសាខាកាកបាទក្រហមកម្ពុជា ខេត្តកំពង់ស្ពឺ បានអនុវត្តក្នុងរយៈពេល៥ឆ្នាំកន្លងមក ព្រមទាំងសូមអំពាវនាវដល់សប្បុរសជនគ្រប់មជ្ឈដ្ឋានចូលរួមឧបត្ថម្ភជាថវិកា សម្ភារៈឬអំណោយមនុស្សធម៌ផ្សេងៗដល់សាខា ដើម្បីបន្តបេសកកម្មមនុស្សធម៌ ជួយសម្រាលទុក្ខលំបាករបស់ប្រជាពលរដ្ឋរងគ្រោះ និងងាយរងគ្រោះដោយឧបទ្ទវហេតុផ្សេងៗ ពិសេសគ្រោះមហន្តរាយដែលបង្កឡើងដោយធម្មជាតិ។
ដោយសន្ដានចិត្តមនុស្សធម៌របស់អ្នកឧកញ៉ា លោកឧកញ៉ា លោក លោកស្រី ជាសប្បុរសជន សមាជិកសមាជិកានៃអង្គពិធីទាំងមូល បានចូលរួមឧបត្ថម្ភដល់សាខាកាកបាទក្រហមកម្ពុជា ខេត្តកំពង់ស្ពឺ នូវថវិកាជាតួលេខបឋមប្រាក់រៀលមានចំនួន ៤១៩,៩២៦,០០០រៀល និងជាប្រាក់ដុល្លារមានចំនួន ៧៧,៨៩០ដុល្លារបន្ថែម៕
ដោយ:នាយក សាន់ រិន
