កំពង់ស្ពឺ៖ អ្នកបើកបររថយន្តម៉ាកHYUNDAI ពណ៌ស ពាក់ស្លាកលេខ ភ្នំពេញ 31-3885 ឈ្មោះ នឹម ឡាំភាង ដែលចាប់ខ្លួនក្នុងករណីគ្រោះថ្នាក់ចរាចរណ៍បណ្តាលឱ្យយុវជន ៣នាក់ ស្លាប់នៅនឹងកន្លែង ត្រូវបានអយ្យការសាលាដំបូងខេត្តកំពង់ស្ពឺ សម្រេចឱ្យវិលត្រឡប់ទៅលំនៅដ្ឋានវិញហើយ ប៉ុន្តែសំណុំរឿងនេះតុលាការនៅតែបន្តតាមនីតិវិធីច្បាប់។
លោក ទិន សុចិត្ត្រា ព្រះរាជអាជ្ញារង និងជាអ្នកនាំពាក្យសាលាដំបូងខេត្តកំពង់ស្ពឺ បានឱ្យដឹងនៅព្រលប់ថ្ងៃទី២១ ខែមីនា ឆ្នាំ២០២៥ ថា អយ្យការអមសាលាដំបូងខេត្តកំពង់ស្ពឺ បានទទួលសំណុំរឿងពីការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ស្ពឺ ពាក់ព័ន្ធនឹងករណីគ្រោះថ្នាក់ចរាចរណ៍(ម៉ូតូបុករថយន្ត) ដែលមានឈ្មោះ នឹម ឡាំភាង បានបើកបររថយន្ត ១គ្រឿង ម៉ាក HYUNDAI ពណ៌ស ពាក់ស្លាកលេខ ភ្នំពេញ 31-3885 ធ្វើដំណើរពីទិសខាងកើតទៅទិសខាងលិច តាមបណ្តោយផ្លូវជាតិលេខ៤ លុះមកដល់ចំណុចចន្លោះគីឡូម៉ែត្រលេខ ៦៥-៦៦ ស្រាប់តែមានម៉ូតូ ១គ្រឿង ម៉ាកHONDA DREAM C125 ពណ៌ខ្មៅ ពាក់ស្លាកលេខ ភ្នំពេញ 1GY-9242 បើកបរដោយ ឈ្មោះ ម៉ុត រ៉ាក់ រួមដំណើរជាមួយឈ្មោះ អាត សំអូន និងឈ្មោះ សាម ផានិត ក្នុងទិសដៅពីទិសខាងលិចទៅទិសខាងកើត រួចបានវ៉ារថយន្ត១គ្រឿង មកបុករថយន្ត១គ្រឿង ម៉ាក HYUNDAI ពណ៌ស ពាក់ស្លាក លេខ ភ្នំពេញ 31-3885 បើកបរដោយឈ្មោះ នឹម ឡាំភាង ក្នុងទិសដៅបញ្ច្រាសទិសគ្នា បណ្តាលឱ្យអ្នកបើកបរម៉ូតូ និងអ្នករួមដំណើរទាំង ៣នាក់ បានស្លាប់បាត់បង់ជីវិតភ្លាមៗនៅកន្លែងកើតហេតុ។
លោក ទិន សុចិត្ត្រា បានបន្ថែមថា ផ្អែកតាមរបាយការណ៍សំយោគលេខ៣៤៦/២៥ ចុះថ្ងៃទី២១ ខែមីនា ឆ្នាំ២០២៥ របស់ ការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ស្ពឺ សមត្ថកិច្ចបានសន្និដ្ឋានថា អ្នកបើកបរម៉ូតូ១គ្រឿង ម៉ាក HONDA DREAM C125 ពណ៌ខ្មៅ ពាក់ស្លាកលេខ ភ្នំពេញ 1GY-9242 បើកបរពីទិសខាងលិចទៅទិសខាងកើត ផ្ទុកមនុស្ស ៣នាក់ លើសចំនួនកំណត់ បើកបរមិនប្រកាន់ស្តាំ ត្រង់ចំណុចមានគំនូសជាប់បង្អួតកណ្តាលទ្រូងផ្លូវ (ហាមបើកបរជែង ឬឆ្លងកាត់) បានបើកបញ្ច្រាសទិសចរាចរណ៍ក្នុងចំណែកផ្លូវម្ខាងទៀត ទៅបុករថយន្ត១គ្រឿងដែលកំពុងបើកបរបញ្ច្រាសទិសគ្នា បង្កឡើងនូវគ្រោះថ្នាក់បណ្តាលឱ្យស្លាប់ខ្លួនឯង និងអ្នកដទៃ គឺខុសច្បាប់ស្តីពីចរាចរណ៍ផ្លូវគោក។ ចំណែកឯអ្នកបើកបររថយន្តម៉ាកHYUNDAI ពណ៌ស ពាក់ស្លាកលេខ ភ្នំពេញ 31-3885 គ្មានប័ណ្ណបើកបរ គឺខុសច្បាប់ស្តីពី ចរាចរណ៍ផ្លូវគោក។
អ្នកនាំពាក្យរូបនេះ បានបញ្ជាក់ថា បន្ទាប់ពីទទួលសំណុំរឿង ពិនិត្យភស្តុតាង និងធ្វើការសាកសួរទៅលើអ្នកបើកបរឈ្មោះ នឹម ឡាំភាង តាមនីតិវិធីច្បាប់រួចមក តំណាងអយ្យការបានសម្រេចអនុញ្ញាតឱ្យអ្នកបើកបររថយន្តខាងលើ វិលត្រឡប់ទៅលំនៅឋានវិញ ប៉ុន្តែសំណុំរឿងខាងលើនេះ នៅតែបន្តតាមនីតិវិធីច្បាប់ដដែល៕ដោយ : ហេង រិន
