ខឹងសុំធ្វើការបន្ត តែជនរងគ្រោះមិនព្រម បានយកកូនកាំបិតចិតផ្លែឈើ ចាក់សម្លាប់រួច ប្លន់យកទូរស័ព្ទ នឹងជម្រិតយកលេខកូដធានាគាររត់គេចខ្លួនបាត់
ភ្នំពេញ ៖ ជនសង្ស័យខឹង សុំអង្វរជនរងគ្រោះ ដើម្បីនៅធ្វើការបន្ត ខណៈជនរងគ្រោះមិនព្រម ព្រោះជនសង្ស័យមានដៃមានជើងលួចរបស់របរ ក៏កើតទៅការទាស់ពាក្យសម្តីគ្នា រហូតឈានដល់ការចាក់សម្លាប់នឹងប្លន់យកទូរស័ព្ទ នឹងបង្ខំអោយប្រាប់លេខកូដធានាគារ ។
ករណីចាក់សម្លាប់នេះដែរបានបង្កអោយមានការភ្ញាក់ផ្អើលកាលពីវេលាម៉ោង ០៩ នឹង ៣០នាទីព្រឹកថ្ងៃទី ១៨ ខែមីនា ឆ្នាំ២០២៥ នៅចំណុចផ្ទះម៉ាស្សាយីហោ « គេណេស » តាមបណ្តោយផ្លូវលេខ ៤២០ ក្នុងសង្កាត់បឹងត្របែក ខណ្ឌចំការមន រាជធានីភ្នំពេញ ។
សពជនរងគ្រោះមានឈ្មោះ ពៅ ភេទប្រុស អាយុ ៣៦ឆ្នាំ ជនជាតិខ្មែរ មុខរបរ បុគ្គលិកម៉ាស្សា ស្នាក់នៅទីតាំងកើតហេតុ ( ស្លាប់ពេលនៅមន្ទីរពេទ្យ ) ។
តាមប្រភពព័ត៍មានពីប្រជាពលរដ្ឋបានប្រាប់អោយដឹងថា មុនកើតហេតុ កាលពីថ្ងៃទី ១៦ ខែមីនា ឆ្នាំ២០២៥ វេលាម៉ោង ០៩យប់ បុរសរងគ្រោះបានហៅ ជនសង្ស័យមកជួបដើម្បីនិយាយពីរឿងការងារ នឹងបានប្រាប់ទៅកាន់ជនសង្ស័យថា « គាត់ឈប់អោយនៅធ្វើការទៀតហើយ ដោយសារតែជនសង្ស័យមានដៃមានជើង លួចឥវ៉ាន់ » ។ ខណៈនោះជនសង្ស័យបានសុំអង្វរទៅកាន់ជនរងគ្រោះ ប៉ុន្តែជនរងគ្រោះមិនព្រមអោយនៅបន្ត ក៏កើតមានការទាស់សម្តីគ្នា រហូតឈានដល់ជនសង្ស័យយកកូនកាំបិត ចិតផ្លែឈើ ចាក់ទៅលើ បុរសរងគ្រោះ ជាច្រើនកាំបិត បណ្តាលអោយរងរបួសធ្ងន់ ។ ស្របពេលនោះឆ្លៀតឪកាសល្អ ជនសង្ស័យបានលួចយកទូរស័ព្ទដៃចំនួន ០១គ្រឿង នឹងជម្រិតបង្ខំបុរសរងគ្រោះអោយប្រាប់លេខកូដ ធានាគារ ហើយក៏រត់គេចខ្លួនបាត់ស្រមោល ។ ភ្លាមៗ បង្កអោយមានការឆោរឡោរ ផ្អើលបុគ្គលិកដូចគ្នា ទាក់ទងហៅរថយន្តសង្គ្រោះ បញ្ជូនទៅកាន់មន្ទីរពេទ្យ ប៉ុន្តែជាអកុសល បុរសរងគ្រោះ បានស្លាប់បាត់បង់ជីវិតនៅមន្ទីរពេទ្យ កាលពីម្សិលមិញនេះបាត់ទៅហើយ ។
បច្ចុប្បន្ន សពរងគ្រោះត្រូវបានសមត្ថកិច្ចធ្វើកោសល្យវិច័យ រួចតម្កល់នៅមន្ទីរពេទ្យរុស្សី រងចាំប្រគល់សពអោយគ្រួសារសាច់ញាតិដឹកយកទៅធ្វើបុណ្យ តាមប្រពៃណី៕ដោយ:សួង សាម
