រោងចក្រផលិតបារីមួយ(គ្មានយីហោ)ក្នុងភូមិសាស្ត្រខេត្តកំពង់ស្ពឺសង្ស័យគ្មានច្បាប់

រោងចក្រផលិតបារីមួយកន្លែង(គ្មានយីហោ)ក្នុងភូមិសាស្ត្រខេត្តកំពង់ស្ពឺសង្ស័យគ្មានច្បាប់
កំពង់ស្ពឺ៖ ទីតាំងរោងចក្រផលិតបារីមួយកន្លែងស្ថិតនៅស្រុកគងពិសី
ខេត្តកំពង់ស្ពឺ សង្ស័យគ្មានច្បាប់អនុញ្ញាតកំពុងតែសំងំលាក់ខ្លួន ផលិតបារីគេចពន្ធបានយ៉ាងរំភើយ ខណៈមន្ត្រីអាជ្ញាធរមូលដ្ឋាន កំពុងតែរក្សាភាពស្ងៀមស្ងាត់។
តាមប្រភពព័ត៌មាននៅថ្ងៃទី១៥ ខែមីនា ឆ្នាំ២០២៥នេះ បានឱ្យដឹងថា៖ ទីតាំងរោងផលិតបារីខាងលើនេះ កំពុងតែមមាញឹកយ៉ាងសស្រាក់ស្រាំក្នុងការបន្តផលិតបារីខុសច្បាប់ ហើយក៏មិនទាន់មានវត្តមានមន្ត្រីអាជ្ញាធរ និងមន្ត្រីជំនាញណាមួយចុះអនុវត្តនិងពិនិត្យមើលទីតាំងខាងលើនេះទេ។
ប្រភពព័ត៌មានបានបន្តទៀតថា ទីតាំងរោងចក្រផលិតបារីគ្មានច្បាប់ទម្លាប់ខាងលើនេះ គឺជារបស់ជនជាតិចិន និងមានមេការជាជនជាតិខ្មែរ ហើយទីតាំងផលិតបារីមួយកន្លែងនេះ កំពុងតែធ្វើឲ្យប៉ះពាល់សុខភាពកុមារ និងសុខមាលភាពប្រជាពលរដ្ឋជាសាធារណៈ ដែលកំពុងតែរស់នៅក្នុងមូលដ្ឋាន។
ប្រជាពលរដ្ឋជាច្រើនរស់នៅក្នុងភូមិសាស្តស្រុកគងពិសីសំណូមពរទៅដល់លោក ហន ពិសិដ្ឋ អភិបាលស្រុកគងពិសីជាពិសេសលោក ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ រួមទាំងមន្ត្រីជំនាញពាក់ព័ន្ធ សូមមេត្តាជួយចុះត្រួតពិនិត្យមើលទីតាំងផលិតបារីខាងលើនេះផង។
ប្រជាពលរដ្ឋជាច្រើនក៏សូមអំពាវនាវសំណូមពរទៅកាន់ប្រធានគណៈកម្មាធិការវិទ្យាសាស្ត្រ បច្ចេកវិទ្យា និងនវានុវត្តន៏ នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សូមជួយចាត់មន្ត្រីជំនាញចុះត្រួតពិនិត្យរោងចក្រផលិតបារីខាងលើនេះផង៕
ដោយ:ច្បារមន