អាជ្ញាធរឃុំជ្រោយប្រស់និងអាជ្ញាធរស្រុកកោះកុង ខេត្តកោះកុង អសមត្ថភាពនៅក្នុងការរកដំណោះស្រាយពីជម្លោះដីធ្លីជូនអតីតគ្រួសារយោធិនពិការ!
(កោះកុងថ្ងៃអង្គារទី២៧ខែធ្នូ ឆ្នាំ២០២២)
ជម្លោះវិបត្តិដីធ្លីដ៏រ៉ាំរ៉ៃមួយដែលបានកើតមានឡើងទៅ អតីតយោធិនពិការមួយគ្រួសារ ជាមួយនឹងលោកអ៊ិនសម្បត្តិដែលស្ថិតនៅក្នុងភូមិថ្មពាង (ហៅភូមិថ្មី) ឃុំជ្រោយប្រស់ ស្រុកកោះកុងខេត្តកោះកុង នៅតែអូសបន្លាយមានរយៈពេលមួយឆ្នាំកន្លងមកហើយដោយអាជ្ញាធរឃុំនិងស្រុកកោះកុងពុំបានយកចិត្តទុកដាក់រកដំណោះស្រាយជូនភាគីទាំងសងខាងឲ្យបានចប់សព្វគ្រប់នោះនៅឡើយទេ។
ទាក់ទងទៅនឹងបញ្ហាវិវាទដីធ្លីដែលកើតមានឡើងរយៈពេលមួយឆ្នាំមកហើយរវាងលោក សៃ សៀន និង លោក អ៊ិនសម្បត្តិ នេះ នាពេលថ្មីៗនេះ គេបានឃើញ លោក ឈាង ធី ដែលត្រូវជាកូនប្រសាររបស់ លោក អ៊ិន សម្បត្តិ ដែលជាអ្នកទៅរំលោភយកដីរបស់លោក សៃសៀន បានចេញមកស្រាយបំភ្លឺថា ជាការពិតណាស់ដីដែលកំពុងតែមានជម្លោះរ៉ាំរ៉ៃ រវាងលោកសៃ សៀន និង លោកអ៊ិនសម្បត្តិ ដែលត្រូវជាឪពុកក្មេករបស់ខ្លួននោះ ដីនេះគឺជាដីរបស់លោក សៃ សៀនយ៉ាងពិតប្រាកដ ព្រោះលោក សៃ សៀន ធ្លាប់បានទៅឈូកឆាយកាប់ទន្ទ្រានអាស្រ័យផលជាមួយនឹងខ្លួនអស់រយៈជាច្រើនឆ្នាំយ៉ាងពិតប្រាកដមែន។ ហើយព្រំដីរបស់ឪក្មេងខ្លួនទៀតនោះ គឺនៅចំណុចខាងកើតរបស់លោកសៃ សៀន ហើយមួយផ្នែកខាងលិចគឺជារបស់ សៃ សៀនពិតមែន ដោយឪក្មេករបស់ខ្លួនបានលួចយកដីរបស់លោក សៃ សៀន ទៅលក់ឲ្យគេយកប្រាក់ចាយអស់ហើយក៏បានទៅទន្ទ្រានយកដីរបស់លោក សៃ សៀន បន្ថែមទៀត។ដើម្បីរកដីឲ្យគ្រប់ចំនួនសម្រាប់អ្នកទិញពីលោក អ៊ិន សម្បត្តិនោះតែម្ដងទៅ នេះបើយោងតាមការធ្វើអត្ថាធិប្បាយពីសំណាក់លោក ឈាង ធី ដែលត្រូវជាកូនប្រសាររបស់ លោក អ៊ិនសម្បត្តិ ។
លោក ឈាង ធី ដែលជាកូនប្រសាររបស់ លោក អ៊ិន សម្បត្តិបានបញ្ជាក់ប្រាប់ដល់អាជ្ញាធរ ភូមិ ឃុំ និង ស្រុកថា សូមមេត្តាជួយដល់គ្រួសារយោធាពីការមួយគ្រួសារនេះដោយភាពយុត្តិធម៌ផងចុះ ព្រោះដីនេះគឺជាដីរបស់លោក សៃ សៀនពិតមែន។ ហើយលោក សៃ សៀន ក៏មានលិខិតកាន់កាប់ដែលទទួលស្គាល់ដោយអាជ្ញាធរភូមិឃុំមុនៗមកដែរ។
លោក សៃ សៀន បានបញ្ជាក់ថា ចំពោះការអះអាងពីឈ្មោះ អុិន សម្បត្តិនោះ គឺគ្មានឯកសារជាក់លាក់ណាមួយយកមកបង្ហាញឲ្យអាជ្ញាធរ ឃុំ ស្រុក ឃើញនោះឡើយ ចុះតើហេតុអ្វីបានជាអាជ្ញាធរឃុំជ្រោយប្រស់ មិនព្រមដោះស្រាយពីជម្លោះដីធ្លីនេះឲ្យបានចប់សព្វគ្រប់ទៅ ដោយទុកឱ្យលោក អ៊ិន សម្បត្តិ ធ្វើព្យុះធ្វើភ្លៀងតាមតែអំពើចិត្តរបស់ខ្លួនដែលចង់បានដីគេនោះទៅវិញ។ហើយមេឃុំជ្រោយប្រោះហាក់បីដូចជាខ្លាចអំណាចលោក អ៊ិន សម្បត្តិ នោះខ្លាំងណាស់។
លោក សៃ សៀន បានបញ្ជាក់ជាចុងក្រោយថា មិនដឹងជាលោក ពុំធឿន មេឃុំ ជ្រោយប្រស់ និង លោក ជា សាវី អភិបាលស្រុកកោះកុង មានអាថ៌កំបាំងអ្វីនោះទេ? បានជាធ្វើព្រងើយៗ មិនព្រមដោះស្រាយដល់ពួកគាត់ ហើយ រុញដាក់គ្នា ទៅវិញ ទៅមក ដូចជាអសមត្ថភាពក្នុងការរកដំណោះស្រាយជូនពលរដ្ឋដែលមានរឿងរ៉ាវទំនាស់ដីធ្លីក្នុងមូលដ្ឋានរបស់ខ្លួននោះ។
លោក ជា សាវី អភិបាលនៃគណៈអភិបាលស្រុកកោះកុងបានបង្ហើបឱ្យដឹងថា ចំពោះរឿងរ៉ាវវិវាទដីធ្លីនេះលោកបានដឹងហើយ។ ហើយលោកក៏បានដាក់បទបញ្ជាឲ្យមេឃុំជ្រោយប្រស់ដោះស្រាយជូនពូគាត់ហើយដែរ ហើយបើដោះស្រាយមិនបាន សូមឱ្យភាគីដើមចោទទៅដាក់ពាក្យបណ្ដឹងជាមួយនឹងអាជ្ញាធម៌ឃុំម្ដងទៀត ហើយបើអាជ្ញាធរឃុំនៅតែពុំព្រមរកដំណោះស្រាយជូនពួកគាត់នោះទេ សូមឱ្យក្រុមគ្រួសារជនរងគ្រោះចូលមកកាន់សាលាស្រុកកោះកុង លោកនឹងទទួលពាក្យបណ្ដឹងពីជនរងគ្រោះដោយផ្ទាល់ដៃដើម្បីចាត់ការទៅតាមនីតិវិធីច្បាប់៕
គួរបញ្ជាក់ផងដែរថារឿងវិវាទដីធ្លីរនេះ គឺបានអូសបន្លាយមួយឆ្នាំកន្លងមកហើយតែនៅតែស្រាយបញ្ហាមិនបាន ហើយគ្រួសារអតីតយោធាពិការក៏ពុំអាចទៅអាស្រ័យផលលើដីនោះបានដែររហូតមកទល់នឹងពេលបច្ចុប្បន្ននេះ ដោយមានការរារាំងពីឈ្មោះ អុិន សម្បត្តិ នោះតែម្ដង ៕
