ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន ស្នើសុំឲ្យកម្លាំងនគរបាលទាំងអស់ធ្វើការថ្កោលទោសដាច់អហង្កា និងប្រឆាំងដាច់ខាត ចំពោះសេចក្ដីថ្លែងការណ៍របស់មេក្រុមឧទ្ទាម
ខេត្តរតនគិរី ៖ ការស្នើសុំនេះ ឯកឧត្ដម នាយឧត្ដមសេនីយ៍ នេត សាវឿន មានប្រសាស្ត្រក្នុងឱកាស អញ្ជើញជាអធិបតីភាពក្នុងពិធីប្រកាសតែងតាំងមុខតំណែង ស្នងការ នៃស្នងការដ្ឋាននគរបាលខេត្តរតនគិរី។
នៅព្រឹកថ្ងៃទី១៨ ខែតុលា ឆ្នាំ២០២២ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អញ្ជើញជាអធិបតីភាព ក្នុងពិធីប្រកាសតែងតាំងមុខតំណែងលោកឧត្តមសេនីយ៍ត្រី អ៊ុង សុភាព អតីតស្នងការរង នៃស្នងការដ្ឋាននគរបាលខេត្តរតនគិរី ជាស្នងការ នៃស្នងការដ្ឋាននគរបាលខេត្តរតនគិរី ជំនួសលោកឧត្តមសេនីយ៍ទោ យិន ចំណាន ដែលត្រូវបានដាក់ឲ្យចូលនិវត្តន៍។ ដែលបានប្រារពធ្វើឡើង នៅសាលប្រជុំស្នងការដ្ឋាននគរបាលខេត្តរតនគិរី។ ដោយមានការអញ្ជើញចូលរួមពីសំណាក់ ឯកឧត្តម ញ៉ែម សំអឿន អភិបាលខេត្តរតនគិរី និងគណៈប្រតិភូ នៃអគ្គស្នងការនគរបាលជាតិ ព្រមទាំង ឯកឧត្តម លោក លោកស្រី ភ្ញៀវកិត្តិយស សជិក សមាជិការ នៃអង្គពិធីផងដែរ។
ថ្លែងក្នុងឱកាសនេះ ឯកឧត្តម ញ៉ែម សំអឿន អភិបាលខេត្តរតនគិរី បានសម្តែងនូវការស្វាគមន៍យ៉ាងកក់ក្តៅចំពោះវត្តមានគណៈអធិបតី និងបានជម្រុញអោយលោកស្នងការនគរបាលខេត្ត ដែលទើបតែងតាំងថ្មី ត្រូវពង្រឹង និងពង្រីកសាមគ្គីភាពផ្ទៃក្នុងអោយបានរឹងមាំថែមទៀត ជាពិសេសត្រូវដឹងអំពីសុខទុក្ខ និងការលំបាករបស់មន្ត្រីនគរបាលគ្រប់ផ្នែកក្រោមឱវាទ។ ត្រូវគោរពវិន័យ របៀបធ្វើការ និងក្រមសីលធម៌ជាកងកម្លាំង ដែលជាសេនាធិការដ៏រឹងមាំអោយគណៈបញ្ជាការឯកភាពរដ្ឋបាលខេត្ត និងត្រូវបន្តការយកចិត្តទុកដាក់អនុវត្តគោលការណ៍ច្បាប់ លិខិតបទដ្ឋាន និងបទបញ្ជាចង្អុលណែនាំរបស់អគ្គស្នងការនគរបាលជាតិ ព្រមទាំងបញ្ជាការឯកភាពរដ្ឋបាលខេត្ត។
ប្រសាសន៍សំណេះសំណាលនាឱកាសនេះដែរ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន បានថ្លែងការកោតសរសើរ និងវាយតម្លៃខ្ពស់ចំពោះអាជ្ញាធរដែនដី គ្រប់លំដាប់ថ្នាក់នៃខេត្តរតនគិរី ដែលបានរួមគ្នាធ្វើការកសាង និងអភិវឌ្ឍន៍ខេត្តអោយមានការរីកចម្រើនលើគ្រប់វិស័យ។ ឯកឧត្តម នាយឧត្តមសេនីយ៍ បានជម្រុញ លោកស្នងការ ក៏ដូចជាថ្នាក់ដឹកនាំនៃស្នងការដ្ឋាននគរបាលខេត្តរតនគិរី ត្រូវយកចិត្តទុកដាក់លើសកម្មភាពជាក់ស្តែង គឺសំខាន់ផ្តោតទៅលើការពង្រឹងសន្តិសុខ សណ្តាប់ធ្នាប់ ធានាអោយបានសុវត្ថិភាព សន្តិភាព សន្តិសុខផ្ទៃក្នុង ជាពិសេសទប់ស្កាត់អោយបានការវិលត្រឡប់មកវិញ នូវបដិវត្តន៍ពណ៌ និងទប់ស្កាត់ការប្រឆាំងនានា ដែលយកទឹកដីកម្ពុជា ធ្វើជាជម្រក រឺធ្វើជាទីតាំងដើម្បីប្រឆាំងប្រទេសជិតខាង ព្រមទាំងការកាត់បន្ថយបទល្មើសព្រហ្មទណ្ឌ រួមទាំងការកាត់បន្ថយឥទ្ធិពល រីករាលដាលរបស់គ្រឿងញៀន ព្រមទាំងការងារផ្សេងៗទៀតដូចជា ការទប់ស្កាត់បញ្ហាក្មេងទំនើង និងការជួញដូរផ្លូវភេទ ស្រ្តី និងកុមារ។ ជាមួយគ្នានោះ ការពង្រឹងច្បាប់ចរាចរណ៍ គឺត្រូវផ្តោតទៅលើការអប់រំ បណ្តុះបណ្តាលមន្ត្រី ការកែប្រែឥរិយាបថ នៃការធ្វើការងាររបស់មន្ត្រី ក្រមសីលធម៌របស់មន្ត្រី និងជំរុញយ៉ាងតឹងរឹងបំផុតក្នុងការអនុវត្តន៍ អនុក្រិតថ្មីស្តីពីការវិន័យអន្តរការណ៍បទល្មើសច្បាប់ចរាចរណ៍ផ្លូវគោក។
ទាក់ទងនឹងសភាពការណ៍បច្ចុប្បន្នឯកឧត្តម
អគ្គស្នងការ បានស្នើអោយកម្លាំងនគរបាលទាំងអស់ ធ្វើការថ្កោលទោសដាច់អហង្ការ និងប្រឆាំងដាច់ខាតចំពោះ សេចក្តីថ្លែងការណ៍របស់ទណ្ឌិត សម រង្ស៉ី មេក្រុមឧទ្ទាម ជាពូជក្បត់ជាតិ៣ជំនាន់ តាមរយៈវីដេអូឃ្លីបនាពេលថ្មីៗនេះ ដែលបានញុះញង់ឲ្យកងកម្លាំងប្រដាប់អាវុធធ្វើការបះបោរ និងបានប្រមាថដោយអសីលធម៌ចំពោះ សម្តេចតេជោ នាយករដ្ឋមន្ត្រី ដែលជាស្ថាបនិកសន្តិភាព និងជាទីគោរពស្រលាញ់របស់ប្រជាពលរដ្ឋកម្ពុជាគ្រប់រូប៕
