មន្ទីរព័ត៌មានខេត្តកំពង់ធំ និងក្រុមគ្រួសារ ព្រមទាំងពុទ្ធបរិស័ទចំណុះជើងវត្តបានផ្តួចផ្តើមធ្វើបុណអង្គកឋិនទានសាមគ្គី ដង្ហែចូលវត្តសានគរ
(កំពង់ធំ)÷ លោកជំទាវ ង៉ែត ណារីន ប្រធានមន្ទីរព័ត៌មានខេត្តកំពង់ធំ និងក្រុមគ្រួសារ ព្រមទាំងពុទ្ធបរិស័ទ បានផ្តួចផ្ដើមធ្វើបុណ្យអង្គកឋិនទានសាមគ្គីដង្ហែទៅកាន់វត្តសានគរ ដើម្បីប្រមូលបច្ច័យយកមកកសាងសមិទ្ធផលនានា នៅក្នុងវត្តឲ្យមានការរីកចម្រើន។
នៅរសៀលថ្ងៃសៅរ៍ ០៥រោច ខែអស្សុជ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៥ ខែតុលា ឆ្នាំ២០២២ លោកជំទាវង៉ែត ណារីន មន្ទីរព័ត៌មានខេត្តកំពង់ធំ និងក្រុមគ្រួសារ ព្រមទាំងពុទ្ធបវិស័ទ ញាតិមិត្តជិតឆ្ងាយបានប្រារព្វធ្វើបទនមស្សការ ព្រះរតនត្រ័យសមាទានសីល និមន្តព្រះសង្ឃចម្រើនព្រះបរិត្ត និងសម្ដែងធម្មទេសនា ដោយព្រះគ្រូជោតិមុនីញាណ ឡាំង សុខឃី ព្រះចៅអធិការវត្តសានគរ ស្ថិតនៅភូមិសានគរ ឃុំសាគរ ស្រុកកំពង់ស្វាយ ខេត្តកំពង់ធំ។
លុះព្រឹកឡើងថ្ងៃអាទិត្យ ០៦រោច ខែអស្សុជ ត្រូវនឹងថ្ងៃទី១៦ ខែឆ្នាំដដែល រៀបចំយាគូប្រគេនដល់ព្រះសង្ឃ ជួបជុំអង្គកឋិនទាននានា ប្រគេនចង្ហាន់ព្រះសង្ឃ និងវេលាម៉ោង១២:៣០នាទីថ្ងៃត្រង់ដង្ហែអង្គកឋិនទានប្រទក្សិណ៣ជុំព្រះវិហារ និងវេរប្រគេនដល់ព្រះសង្ឃជាកិច្ចបង្ហើយកម្មវិធីបុណ្យ។
ព្រះគ្រូជោតិមុនីញាណ ឡាំង សុខឃី ព្រះចៅអធិការវត្តសានគរ បានមានសង្ឃដឺកាក្រោយពីព្រះសង្ឃចូលកាន់ព្រះវស្សា អស់ត្រីមាស ទើបបង្កើតជាអង្គកឋិននេះឡើង រយ:ពេល១ខែពេញ សម្រាប់ពុទ្ធបរិសទ្ធទាំងឡាយ កាន់អង្គកឋិនទាននេះ ដើម្បីដង្ហែយកទៅវេរប្រគេនដល់ព្រះសង្ឃ ដែលគង់ចាំព្រះវស្សា អស់កាលត្រីមាសក្នុងវត្តសានគរ ព្រមទាំងបានចូលជាធនធានថវិកាតាមកម្លាំងសទ្ធាជ្រះថ្លាសម្រាប់យកមកកសាង សមិទ្ធផលបន្ថែមនៅក្នុងវត្ត ឱ្យមានឪភាពរីកចំរើនបន្ថែមទៀត។
ព្រះគ្រូជោតិមុនីញាណ ឡាំង សុខឃី បានថ្លែងអរគុណ និងប្រសិទ្ធិពរជ័យដល់ថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធ និងពុទ្ធបរិស័ទ ដែលមានសទ្ធាជ្រះថ្លាចូលរួមថវិកាក្នុងអង្គកឋិនទាននេះ សូមឲ្យមហាអង្គកុសលផលបុណ្យ និងវត្ថុសាកសិទ្ធក្នុងលោក តាមជួយថែរក្សា ឲ្យជួបតែសេចក្តីសុខគ្រប់ប្រការជារៀងរហូត។ ព្រះករុណាអាត្មាភាព សូមអំពាវនាវដល់សប្បុរសជនក្នុងនិងក្រៅប្រទេសជួយគាំទ្រឧបត្ថម្ភជាថវិកា ឬសម្ភារៈ ដើម្បីយកមកកសាងសមិទ្ធផលនានា នៅក្នុងវត្តឲ្យបានរីកចម្រើនបន្តទៀត។
សូមបញ្ជាក់ថា អង្គកឋិនទានដែលបានដង្ហែចូលក្នុងវត្តសានគរមានចំនួន១៤៣អង្គកឋិនទាន ដែលអញ្ជើញមកពីរាជធានីភ្នំពេញ ខេត្តបន្ទាយមានជ័យ និងកឋិនទានសាមគ្គីក្នុងខេត្តកំពង់ធំ។
