ការដោះដូរទំនិញរវាងក្រុមហ៊ុនកម្ពុជានិងថៃនៅច្រកចាំយាមខេត្តកោះកុងមានភាពល្អប្រសើរក្រោយពីវិបត្តិកូវីដត្រូវបានបញ្ចប់!

ការដោះដូរទំនិញរវាងក្រុមហ៊ុនកម្ពុជានិងថៃនៅច្រកចាំយាមខេត្តកោះកុងមានភាពល្អប្រសើរក្រោយពីវិបត្តិកូវីដត្រូវបានបញ្ចប់!

កោះកុងថ្ងៃពុធទី១២ខែតុលាឆ្នាំ២០២២

ខេត្តកោះកុងគឺជាខេត្តមួយនៅភាគខាងលិចនៃប្រទេសកម្ពុជា ហើយក៏ជាខេត្តមួយដែលមានព្រំប្រទល់ជាប់ជាមួយនឹងព្រះរាជាណាចក្រថៃឡង់ គឺ ចាន់បូរី និងត្រាត ។ហើយខេត្តមួយនេះក៏មានច្រកទ្វារអន្តរជាតិចេញចូលរវាងកម្ពុជាថៃនោះដែរ។

នាពេលបច្ចុប្បន្ននេះបន្ទាប់ពីវិបត្តិជំងឺ covid ត្រូវបានថយចុះ គេបានសង្កេតឃើញច្រកទ្វារអន្តរជាតិចាំយាមមានសភាពអ៊ូអរសារជាថ្មីឡើងវិញដោយមានទាំងរថយន្តដឹកទំនិញតូចធំរវាងថៃនិងកម្ពុជាក៏ដូចជាបងប្អូនអាជីវករកម្ពុជានិងថៃបានឆ្លងទៅឆ្លងមកក្នុងការចេញចូលធ្វើអាជីវកម្មលក់ដូរទំនិញផ្សេងៗពីមួយថ្ងៃទៅមួយថ្ងៃគួរឱ្យកត់សម្គាល់ក្រោយពីរដ្ឋាភិបាលនៃប្រទេសទាំងពីរបានព្រមព្រៀងឯកភាពគ្នាបើកច្រកឡើងវិញនោះ។

លោកវរសេនីយ៍ឯក ង៉ុយ ជៀងមេបញ្ជាការនគរបាលអន្តោប្រវេសន៍ប្រចាំច្រកទ្វារអន្តរជាតិចាំយាមខេត្តកោះកុងលោកបានលើកឡើងឲ្យដឹងថាបន្ទាប់ពីរាជរដ្ឋាភិបាលកម្ពុជា និងរាជរដ្ឋាភិបាលនៃប្រទេសថៃឡង់ បានឯកភាពគ្នាបើកឲ្យដំណើរការច្រកដែលមានព្រំប្រទល់កម្ពុជាថៃឡើងវិញចាប់ពីពេលណានោះមកដោយឡែកច្រកទ្វារអន្តរជាតិចាំយាមខេត្តកោះកុងនេះ ហើយសម្រាប់ការដោះដូរទំនិញពីសំណាក់ក្រុមហ៊ុនធំៗរវាងកម្ពុជា.ថៃ.ក៏ដូចជាការដោះដូរមុខទំនិញរវាងអាជីវករកម្ពុជានិងថៃគឺមានភាពល្អប្រសើរឡើងពីមួយថ្ងៃទៅមួយថ្ងៃ។ដែលជាកត្តាធ្វើឲ្យពលរដ្ឋទាំងពីប្រទេសមានការរីករាយនៅក្នុងការរកប្រាក់កម្រៃដើម្បីផ្គត់ផ្គង់ជីវភាពក្រុមគ្រួសារ។

លោកវរៈសេនីយ៍ឯក.ង៉ុយ ជៀង បានបន្ថែមទៀតថា បើទោះបីក្នុងកាលៈទេសៈដែលប្រទេសកម្ពុជានិងថៃ មានភាពល្អប្រសើរឡើងវិញជាមួយនឹងបញ្ហាវិបត្តិជំងឺ covid យ៉ាងណាក៏ដោយក៏ក្នុងនាមលោកជាមេបញ្ជាការផ្នែកនគរបាលអន្តោប្រវេសន៍ប្រចាំការនៅច្រកទ្វារអន្តរជាតិចាំយាមខេត្តកោះកុងនេះ ក៏មិនធ្វេសប្រហែសអំពីការត្រួតពិនិត្យទៅលើបញ្ហាសុខភាព របស់ភ្ញៀវជាតិនិងអន្តរជាតិដែលបានឆ្លងកាត់ច្រកមួយនេះដែរ ពីព្រោះការរឹតបន្តឹងត្រួតពិនិត្យទៅលើបញ្ហាសុខភាពវាជាកត្តាយ៉ាងសំខាន់ណាស់សម្រាប់ការទប់ស្កាត់និងធ្វើឲ្យសង្គមជាតិកម្ពុជាយើងគឺគ្មានការរីករាលដាលឬក៏ឆ្លងទៅនឹងបញ្ហាជំងឺផ្សេងៗទៀតបានឡើយ។

លោកបានបញ្ជាក់ជាចុងក្រោយថា បើទោះបីជាកម្ពុជានិងថៃបានទប់ទល់ជាប់ជាមួយនឹងវិបត្តិជំងឺ covid យ៉ាងណាក៏ដោយក៏រាល់ការចេញចូលរបស់ភ្ញៀវជាតិនិងអន្តរជាតិ ក៏ដូចជាការផ្លាស់ប្ដូរមុខទំនិញគ្នារវាងភាគីកម្ពុជានិងថៃ ក៏កម្លាំងរបស់លោកនៅតែរឹតបន្តឹងចំពោះការត្រួតពិនិត្យទៅលើបញ្ហាសុខភាពដោយមិនអាចធ្វើប្រហែសបានឡើយ៕

ដោយ ប៉ែន.សំបូរ