តំបន់ទេសចរធម្មជាតិឆ្នេរនេសាទស្ថិតនៅក្នុងឃុំជ្រោយស្វាយ ស្រុកស្រែអំបិល ខេត្តកោះកុង កំពុងបាត់បង់សោភ័ណ្ឌភាពបន្តិចម្ដងៗដោយសារការសាងសង់របងថ្មរឹងមាំបិទបាំងឆ្នេរខ្សាច់!
ខេត្តកោះកុង ៖ ឆ្នេរនេសាទដែលជាតំបន់ទេសចរដ៏ស្រស់ត្រកាលមួយដែលស្ថិតនៅភាគខាងត្បូងនៃស្រុកស្រែអំបិល ខេត្តកោះកុង គឺស្ថិតនៅក្នុងភូមិនេសាទ ឃុំជ្រោយស្វាយ បើគេមានបំណងធ្វើដំណើរកំសាន្តទៅតំបន់ទេសចរឆ្នេរនេសាទនោះ គឺគេត្រូវចំណាយពេលវេលា ពី ៣០ ទៅ ៤០នាទីទើបទៅដល់គោលដៅតំបន់ទេសចរធម្មជាតិជ្រោយស្វាយនោះ ។ ព្រោះតំបន់ឆ្នេរនេសាទ លាតសន្ធឹងទៅដោយឆ្នេរខ្សាច់ និងផ្ទៃទឹកសមុទ្រដ៏ស្រស់ស្អាតគួរជាទីមោទនៈយ៉ាងក្រៃលែង ដែលជាកត្តាធ្វើឲ្យភ្ញៀវជាតិ និងអន្តរជាតិពេញនិយមចូលចិត្តទៅលេងទីនោះដោយពុំដែលដាច់សោះឡើយ ។ ប៉ុន្តែអ្វីដែលធ្វើឲ្យមានការសោកស្ដាយបំផុតនោះ បច្ចុប្បន្នតំបន់ទេសចរធម្មជាតិរបស់ស្រុកស្រែអំបិលមួយនេះ កំពុងតែត្រូវបានបាត់បង់ទេសភាពដ៏ស្រស់ស្អាតបន្តិចម្ដងៗទៅហើយ ដោយសារតែបុគ្គលមួយចំនួនដែលជាម្ចាស់កម្មសិទ្ធិដីធ្លីរស់នៅក្នុងតំបន់នោះ បានធ្វើរបងថ្មខ្ពស់ៗហុំព័ទ្ធបិទបាំងដីរបស់ខ្លួនបណ្តាលឲ្យបាត់បង់សោភ័ណភាពឆ្នេរខ្សាច់ និងផ្ទៃទឹកសមុទ្រ ។
ទាក់ទងទៅនឹងការសាងសង់របងថ្មនេះ លោក.ប៊ុន រ៉េ មេឃុំជ្រោយស្វាយ បានប្រាប់បណ្តាញសារព័ត៌មាន អំណាចព័ត៌មាន ឲ្យដឹងថា អាជ្ញាធរមិនហាមឃាត់មិនឲ្យម្ចាស់ដីធ្វើរបងសម្គាល់ព្រំដីនោះទេ ។ ប៉ុន្តែអាជ្ញាធរអនុញាតឲ្យបោះបង្គោលឈើធម្មតាដើម្បីព្រំប៉ុណ្ណោះ អាជ្ញាធរមិនអនុញាតឲ្យម្ចាស់ដីធ្វើរបងថ្មបេតុងរឹងមាំ ឬរបង ស័ង្កសី និងឈើបាំងបិទសោភ័ណ្ឌភាពតំបន់ឆ្នេរឡើយ ។
លោក សុខ.ចាន់គ្រឹស្នា ប្រធានមន្ទីរទេសចរខេត្តកោះកុង បានបញ្ជាក់ឱ្យដឹងថា រាល់ការសាងសង់ គឺអាជ្ញាធរមូលដ្ឋានជាអ្នកទទួលមើលការខុសត្រូវរាល់ការសាងសង់សំណង់រឹងមាំផ្សេងៗទៅតាមដែនដីដែលខ្លួនគ្រប់គ្រង ។
លោក ហុង.ប្រុស អភិបាលរងស្រុកស្រែអំបិលបានប្រាប់ឲ្យដឹងដែរថា ចំពោះការសាងសង់របងថ្មបិទបាំងឆ្នេរខ្សាច់នេះ លោកពុំទាន់បានដឹងនៅឡើយទេ ហើយលោកនឹងដឹកនាំកម្លាំងអាជ្ញាធរស្រុក និងមន្ត្រីជំនាញចុះទៅពិនិត្យមើលនៅដើមសប្តាហ៍នេះ ដើម្បីពិនិត្យមើលថា តើការសាងសង់របងថ្មបិទបាំងឆ្នេរខ្សាច់នេះ វាមានចំណុចខុសត្រូវយ៉ាងណានោះ ៕ ដោយ.អំណាចព័ត៌មាន
