យុវជនម្នាក់ សង្ស័យលើកដែកអាល់ទែរហាត់ប្រាណខុសបច្ចេកទេស ទើបបណ្ដាលឱ្យដែកអាល់ទែរសង្កត់ពីលើ ស្លាប់នៅនឹងកន្លែងកើតហេតុ
ភ្នំពេញ ៖ កាលពីវេលាម៉ោង១០និង៥០នាទីព្រឹក ថ្ងៃទី០៤ ខែមេសា ឆ្នាំ២០២២ ស្ថិតនៅក្នុងបុរីភ្នំពេញថ្មីសែនសុខ ផ្ទះលេខ៥ ផ្លូវលេខ៤ ក្នុងក្រុម៥ ភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ។
ជនរងគ្រោះឈ្មោះផេន ចាន់នី មានអាយុ២៧ឆ្នាំ បច្ចុប្បន្នជានិស្សិតស្នាក់នៅកន្លែងកើតហេតុ មានស្រុកកំណើតនៅស្រុកបាធាយ ខេត្តកំពង់ចាម។
ជនរងគ្រោះនេះ បានមកស្នាក់នៅផ្ទះកន្លែងកើតហេតុដែលម្ចាស់ផ្ទះត្រូវជាពូរបស់ខ្លួនអស់រយៈពេលជាយូរឆ្នាំមកហើយ ដោយសារម្ចាស់ផ្ទះបានទៅរស់នៅឯសហរដ្ឋអាមេរិកទើបឱ្យជនរងគ្រោះមកមើលថែផ្ទះឱ្យ។ នៅមុនពេលកើតហេតុដោយពូរបស់ជនរងគ្រោះមានការសង្ស័យ ព្រោះមើលតាមកាមេរ៉ាសុវត្ថិភាព ឃើញក្មួយរបស់គាត់បានដេកលើកន្លែងហាត់ប្រាណដោយមិនមានកាយវិការអ្វីទាំងអស់នោះក៏មានការសង្ស័យ ហើយពូរបស់ជនរងគ្រោះបានទូរស័ព្ទឱ្យអ្នកដែលរស់នៅក្បែរគ្នានោះចូលមើលទើបដឹងថា ជនរងគ្រោះត្រូវបានដែកអាល់ទែរសង្កត់ពីលើបណ្ដាលឱ្យស្លាប់នៅនឹងកន្លែងហាត់ប្រាណខាងមុខផ្ទះបាត់ទៅហើយ រួចក៏បានរាយការណ៍ទៅសមត្ថកិច្ចមូលដ្ឋានឲ្យចុះមកចំណុចកើតហេតុ។
សមត្ថកិច្ចមូលដ្ឋានបានមកដល់ រួចបានធ្វើការហ៊ុមព័ទ្ធនៅចំណុចទីតាំងកើតហេតុនិងបានទំនាក់ទំនងទៅសមត្ថកិច្ចជំនាញផ្នែកកោសល្យវិច័យចក្ខុនៃស្នងការដ្ឋាននគរបាលរាជធានីភ្នំពេញ ឱ្យមកធ្វើការត្រួតពិនិត្យ។ ក្រោយពិនិត្យរួចសមត្ថកិច្ចបានធ្វើកំណត់ហេតុប្រគល់សពឱ្យទៅក្រុមគ្រួសារយកទៅចាត់ចែងធ្វើបុណ្យតាមប្រពៃណីនៅឯស្រុកកំណើត៕
ដោយ. តាំង វ៉ៃ
