យុវជនពីរនាក់ ជិះម៉ូតូឌុបគ្នា ត្រូវរថយន្ត បើកឆ្លងផ្លូវបុក បណ្តាលឱ្យស្លាប់ម្នាក់ របួសធ្ងន់ម្នាក់

ភ្នំពេញៈ ថ្ងៃទី ១២ខែ មីនា ឆ្នាំ ២០២២ចំណុចខាងត្បូងរង្វង់មូលនាងមច្ឆា ប្រមាណ១០០ម៉ែត្រ តាមបណ្តោយមហាវិថីអូស៊ីអាយស៊ី កែងផ្លូវបេតុងក្នុងភូមិដើមគ សង្កាត់ជ្រោយចង្វារ ខណ្ឌជ្រោយចង្វារ ។ រថយន្ត ម៉ាកតូយូតា តាកូម៉ាពណ៌សពាក់ស្លាកលេខភ្នំពេញ2BG 6730 បើកដោយបុរសវ័យចំណាស់ម្នាក់។ ចំណែកម៉ូតូ ម៉ាកហុងដា ឌ្រីមសង់ពណ៌ ខ្មៅពាក់ស្លាកលេខ កណ្តាល1AN 2782ជិះគ្នាពីរនាក់ជាបងប្អូនថ្លៃនឹងគ្នា។ អ្នកឌុបឈ្មោះលី ណាំឈីវ អាយុ១៨ឆ្នាំមុខរបរកម្មផ្សារដែកស្នាក់នៅភូមិបឹងក្រចាប់ត្បូង ឃុំព្រែកតាមាក់ ស្រុកខ្សាច់កណ្តាល ខេត្តកណ្តាលបានស្លាប់នឹងម្នាក់ទៀតជាបងថ្លៃរបួសធ្ងន់។

ប្រភពព័ត៌មានថា ម៉ូតូជិះគ្នាពីរនាក់ តាមបណ្តោយផ្លូវអូស៊ីអាយុស៊ី ក្នុងទិសដៅពីជើងទៅត្បូង។លុះដល់ចំណុចកើតហេតុស្រាប់តែមានរថយន្តតាកូម៉ាបើកតាមបណ្តោយផ្លូវអូស៊ីអាយស៊ី បើកទិសដៅពីត្បូងទៅជើងបត់ឆ្វេង បានបុកជាមួយម៉ូតូពេញទំហឹងហើយអូសម៉ូតូជាច្រើនម៉ែត្រ។ អ្នករងរបួសត្រូវបានបញ្ជូនទៅមន្ទីរពេទ្យ។ ឯអ្នកស្លាប់ត្រូវបានសមត្ថកិច្ចប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ៕ រាយការណ៍ដោយ: ស៊ីន ម៉ារី (APN news )