មីយ៉ាន់ម៉ា:ដោយយោងតាមសេចក្តីថ្លែងការណ៍របស់របបសឹកមីយ៉ាន់ម៉ាបានចេញផ្សាយឱ្យដឹងកាលពីរសៀលថ្ងៃព្រហស្បតិ៍ថា លោក អ៊ូ ម្យិញ ស្វេ (U Myint Swe) ដែលបានក្លាយជាប្រធានាធិបតីអំឡុងឆ្នំា២០២១ ដោយសារតែការធ្វើរដ្ឋប្រហារប្រឆំាងនឹងរដ្ឋាភិបាលស៊ីវិល ហើយក្រោយមកមិនដល់មួយចំអិនកំពឹសផង អំណាចរបស់គាត់ត្រូវប្រគល់ឱ្យយោធាត្រួតត្រាវិញរហូតដល់បច្ចុប្បន្ន។
តាមសេចក្តីប្រកាសរបស់រដ្ឋបាលសឹកមីយ៉ាន់ម៉ាដដែលបានលើកឡើងថា លោក អ៊ូ ម្យិញ ស្វេ បានទទួលមរណភាពហើយ ក្នុងជន្មាយុ៧៤ឆ្នំា ដោយរោគាពាធ បន្ទាប់ពីរូបលោកបានចូលសម្រាកព្យាបាលនៅមន្ទីរពេទ្យនៅក្នុងរដ្ឋធានីណៃពិដរ ខណៈដែលប្រព័ន្ធផ្សព្វផ្សាយក្នុងប្រទេសមីយ៉ាន់ម៉ា បានលើកឡើងនៅព្រឹកថ្ងៃសុក្រនេះដែរថា លោក អ៊ូ ម្យិញ ស្វេ មានជំងឺច្រើនមុខ ដូចជាស្រកគីឡូ បាត់បង់ចំណង់ហូបអាហារ និងថយចុះមុខងារខួរក្បាល ដែលតម្រូវឱ្យមានការសង្គ្រោះបន្ទាន់ នៅមុនពេលរូបលោកទទួលមរណភាព។
គួររំលឹកដែរថា លោក អ៊ូ ម្យិញ ស្វេ បានក្លាយទៅជាប្រធានាធិបតីមានតែឈ្មោះ បន្ទាប់ពីធ្វើរដ្ឋប្រហារបណ្តេញលោក វីន ម្យិញ និងធ្វើការឃាត់ខ្លួនកាលពីឆ្នំា២០២១នោះដែរ លុះក្រោយបន្តិចក៏ឃាត់ខ្លួនលោកស្រីអ៊ុងសានស៊ូជី រហូតមក។
ប្រទេសមីយ៉ាន់ម៉ា ប្រឈមមុខទៅនឹងភាពចលាចលសង្គម ចាប់តំាងពីមានអំពើរដ្ឋប្រហារមួយ ដែលបានអូសយកប្រទេសនេះធ្លាក់ចូលក្នុងសង្គ្រាមស៊ីវិលស្ថិតនៅក្នុងតំបន់ប្រជាជាតិអាស៊ីភូមិភាគអាគ្នេយ៍ ខណៈដែលរបបសឹកបន្តប្រយុទ្ធជាមួយនឹងក្រុមកងសេរីកា ក្នុងការដណ្តើមគ្នាត្រួតត្រាលើដែនដី និងបានចោទប្រកាន់គ្នាទៅវិញទៅមក រហូតឈានដល់មានការបន្សល់ទុកនូវភាពសោកសៅយ៉ាងច្រើនដល់ពលរដ្ឋស៊ីវិល តាមរយៈការនិរាសព្រាត់ប្រាស់រកទីបំផុតគ្មាន។
គេនៅចងចំាបានថា កាលពីឆ្នំា២០២១ ដដែលនោះ លោក ម្យិញ ស្វេ បានដើរតួជាអនុប្រធានាធិបតី ស្ថិតនៅក្រោមប្រព័ន្ធបែបស៊ីវិល នៅមុនពេលដែលក្លាយខ្លួនទៅជាប្រធានាធិបតីឆ្អិនឆ្អៅដណ្តើមអំណាចពីរដ្ឋបាលស៊ីវិលងាកទៅរកក្រុមយោធាវិញ។
ចំពោះស្ថានការណ៍ថ្មីៗឯណេះវិញម្តងនៅក្នុងប្រទេសមីយ៉ាន់ម៉ា ត្រូវក្រុមប្រព័ន្ធផ្សព្វផ្សាយក្នុងតំបន់បានរាយការណ៍ដែរថា ក្រុមគណបក្សប្រឆំាងបានសន្យាថា ខ្លួននឹងមិនចូលរួមក្នុងដំណើរការបោះឆ្នោតឡើយ ខណៈដែលក្រុមអ្នកជំនាញការសហប្រជាជាតិកាលពីខែមិថុនា ធ្លាប់បានលើកឡើងថា ការពន្យាពេលម្តងហើយ ម្តងទៀត គឺជាលេសរបស់របបសឹកដើម្បីពន្យាពេលបន្តអំណាចរបស់ខ្លួនតែប៉ុណ្ណោះ។
ទោះបីជាបែបណាក៏ដោយចុះ ពុំទាន់ឃើញមានការកំណត់កាលបរិច្ឆេទជាក់លាក់ណាមួយដើម្បីកំណត់ពេលធ្វើការបោះឆ្នោតជាតិនៅឡើយទេ រហូតមកទល់នឹងថ្ងៃនេះ៕
ប្រែសម្រួលតាមអេប:សុខ សុភ័ណ្ឌ
