ប្តីនិងកូនប្រុសពីនាក់ទៀតជាប់ចោទពីបទលួចដំឡូងគេប្រពន្ធនិងម្តាយសំណូមពរឱ្យតុលាការដោះលែងបើឃុំខ្លួនមែននោះដូចសម្លាប់ពួកគាត់មួយគ្រួសារអីចឹង

កំពង់ស្ពឺ: ដោយសារតែអាហារបីពេល ធ្វើឱ្យបុរស០៣នាក់ឪពុកនិងកូនៗ ទទួលរងការចោទប្រកាន់ថាបានទៅលួចដកដំឡូងគេគ្រាន់បានលុយទិញអង្ករហូបបានចិញ្ចឹមជីវិតប្រចាំថ្ងៃរស់ និងបានលុយកាក់តិចតួចទិញទឹកដោះគោឱ្យកូនតូចៗបានបៅគ្រាន់រស់ឃើញពន្លឺព្រះអាទិត្យនិងគេដែរ។ ប៉ុន្តែត្រូវបានម្ចាស់ចំការប្តឹងចោទបុរសទាំង០៣នាក់ឪពុកនិងកូនប្រុស០២នាក់ទៀត ឱ្យកម្លាំងនគរបាលស្រុកឱរ៉ាល់ធ្វើការឃាត់ខ្លួនថាលួចដំឡូង ហើយកសាងសំណុំរឿងបញ្ជូនទៅតុលាការខេត្ត និង បញ្ជូនដាក់ពន្ធនាគារឃុំខ្លួន ទាំងដែលបន្សល់ទុកប្រពន្ធទីទ័លក្រ កូនតូចៗរស់គ្មានទីពឹង សុំផ្ទះគេស្នាក់នៅ។ ស្ត្រីជាប្រពន្ធនិងជាម្តាយ និយាយថាបើសិនជាប្តីនិងកូនប្រុសរបស់គាត់ត្រូវបានលោកតុលាការ ឃុំខ្លួនដាក់ពន្ធនាគារមែននោះ ហាក់បីដូចជាសម្លាប់ពួកគាត់អស់មួយគ្រួសារអញ្ចឹង ដោយសារតែអស់ពីប្តីនិងកូនប្រុសដែលជាមេគ្រួសារដើរស៊ីឈ្នួលគេគ្រាន់បានលុយបន្តិច បន្តួចទិញអង្ករដាំបាយហូប និងទិញទឹកដោះគោសម្រាប់ផ្គត់ផ្គង់ចៅដែលនៅតូចៗ ។

ជួបជាមួយអ្នកយកព័ត៌មានស្ត្រីឈ្មោះ ម៉ា គិត អាយុ៦០ឆ្នាំ មុខរបរដើរស៊ីឈ្នួលដកដំឡូង ដកស្ទូង រើសអេតចាយ សុំផ្ទះគេស្នាក់នៅក្នុងភូមិថ្មី ឃុំតាសាល ស្រុកឱរ៉ាល់ ខេត្តកំពង់ស្ពឺ បានរៀបរាប់ទាំងទឹកភ្នែកថា÷ ប្តីរបស់គាត់មានឈ្មោះ ស៊ុន មុត អាយុ៥២ឆ្នាំ មុខរបរដើរស៊ីឈ្នួលគេ រើសអេតចាយ រស់នៅជាមួយគ្នា មានកូនប្រុសចំនួន០២។ កូនទី១ឈ្មោះ មី ផល្លី ភេទប្រុស អាយុ២៦ឆ្នាំ មុខរបរស៊ីឈ្នួលគេ រើសអេតចាយ រៀបការរួចមានកូនក្នុងចំនួន០២នាក់។ ចំណែកកូនទី២ មានឈ្មោះ មី ផល្លាន់ ភេទប្រុស អាយុ២៣ឆ្នាំ មុខរបរដើរស៊ីឈ្នួលគេ រៀបការរួច មានកូនចំនួន០២នាក់ សុំផ្ទះគេស្នាក់នៅជុំគ្នានៅក្នុងភូមិថ្មី ឃុំតាសាល ស្រុកឱរ៉ាល់ ខេត្តកំពង់ស្ពឺ។

ស្ត្រីជាប្រពន្ធនិងម្តាយទីទ័លក្រ រៀបរាប់ទាំងទឹកភ្នែកបន្តថា ប្តីនិងកូនៗរបស់គាត់តែងតែចេញទៅស៊ីឈ្នួលគេ ដូចជាដកដំឡូង ដកស្ទូង ការងារអ្វីផ្សេងៗនិង រើសអេតចាយក៏ធ្វើដែលឱ្យតែបានលុយយកមកចិញ្ចឹមកូននិងចៅតូចៗបានរស់រានមានជីវិតនឹងគេ។ ហើយកាលពីថ្ងៃទី២២ ខែកក្កដា ឆ្នាំ២០២៥កន្លែងទៅប្តីនិងកូនៗរបស់គាត់បានជិះគោយន្តចាស់មួយគ្រឿងចេញទៅរកស៊ីឈ្នួលគេ និងរើសអេតចាយ រហូតដល់ល្ងាចបាត់មិនឃើញប្តីនិងកូនៗត្រឡប់មកផ្ទះវិញ រូបគាត់មានការបារម្ភ និងមានការភិតភ័យខ្លាំងណាស់ ហើយគិតថា ប្តីនិងកូនប្រហែលជាមានបញ្ហាឈឺ ឬខ្យល់ចាប់អីហើយចាំមើលផ្លូវ រហូតដល់យប់ ទើបមានអ្នកភូមិរស់នៅក្បែរប្រាប់ថា ប្តីនិងកូនៗរបស់គាត់ត្រូវបានសមត្ថកិច្ចឃាត់ខ្លួនជាមួយនិងគោយន្តចាស់នោះនាំយកទៅបាត់ហើយ ដោយសមត្ថកិច្ចថាប្តីនិងកូនៗរបស់គាត់លួចដំឡូងរបស់គេ ហើយថៅកែដំឡូងជាអ្នកដាក់ពាក្យបណ្តឹង។

ស្ត្រីឈ្មោះ ម៉ា គិត បានរៀបរាប់បន្តទៀតថា ពេលទទួលបានដំណឹងភ្លាមៗយប់បាត់ទៅហើយ ណាមួយក្រុមគ្រួសាររបស់គាត់ទីទ័លក្រគ្មានសម្ភារៈប្រើប្រាស់ គ្មានមធ្យោបាយធ្វើដំណើរ ដូចជាកង់ ម៉ូតូអីក៏គ្មានដែរ ហើយលុយនៅក្នុងខ្លួនក៏គ្មានទៀត ក្រុមគ្រួសាររបស់គាត់រកបានមួយថ្ងៃរស់មួយថ្ងៃ មិនខុសពីពាក្យដែលគេពោលឡើងថា《រកព្រឹកខ្វះល្ងាចនោះ》។ លុះព្រឹកឡើងគាត់ក៏ដាច់ចិត្តសុំខ្ចីម៉ូតូរបស់អ្នកភូមិដែលមានលំនៅឋានក្បែរនោះ ដោយដឹងថាក្រុមគ្រួសាររបស់គាត់ជាមនុស្សស្លូតត្រង់ ឧស្សាហ៍ព្យាយាម ក្រីក្រ ទីទ័លក្រពិតមែនមិនដែលលួច ឆក់ ប្លន់គេនោះទេ ខិតខំប្រឹងប្រែងតស៊ូ ដើរស៊ីឈ្នួលគេ រើសអេតចាយ ដើម្បីបានលុយតិចតួចចិញ្ចឹមជីវិតបានរស់នឹងគេ ដោយឃើញក្រុមគ្រួសាររបស់គាត់ទីទ័លក្រ ម្ចាស់ម៉ូតូបានឱ្យខ្ចីថែមទាំងចាក់សាំងពេញដើម្បីមកមើលប្តីនិងកូនៗ មកដល់មុខសាលាដំបូងខេត្តកំពង់ស្ពឺ ទាំងដែលក្នុងខ្លួនមិនមានលុយទិញបាយហូប សុខចិត្តអត់បាយ ដើម្បីបានជួបបានឃើញមុខប្តីនិងកូនៗ។ អ្វីដែលស្ត្រីកំសត់ទីទ័លក្រលើកឡើងទាំងទឹកភ្នែកបន្ថែមទៀតនោះ គាត់ដឹងច្បាស់ណាស់ថា ប្តីនិងកូនៗរបស់គាត់មិនបានលួចដំឡូងរបស់គេនោះទេ ដោយសារតែតាំងពីពួកគាត់រៀបមង្គលការ ចាប់ដៃគ្នាជាប្តីជាប្រពន្ធ រហូតបានជាកូន ពូនជាចៅ ប្តីរបស់គាត់មិនដែលធ្វើឱ្យគាត់ពិបាកចិត្ត ឈ្លោះប្រែកគ្នានោះទេ បើទោះបីជាពួកគាត់មានជីវភាពទីទ័លក្រក៏ដោយ គិតតែពី ខិតខំធ្វើការរកលុយមកចិញ្ចឹមកូន និងចៅៗ ក្នុងមួយថ្ងៃរកបានចំណូល៥០០០រៀល ទៅ១០០០០រៀល ក៏ក្រុមគ្រួសារគាត់មានសុភមង្គលដែរ។ ថ្ងៃដែលប្តីនិងកូនប្រុសៗរបស់គាត់កើតមានរឿងនោះ លឺសូរដំណឹងថា នៅចំការដំឡូងនោះ គេប្រញាប់យកដីទៅដាំអំពៅវិញ ទើបប្តីរបស់គាត់នឹងកូនៗជិះគោយន្តចាស់របស់គាត់ទៅរើស ដើម្បីយកដំឡូងទៅលក់ ក្រែងបានលុយចិញ្ចឹមជីវិត និងទិញទឹកដោះគោឱ្យចៅៗដែលនៅតូចៗបៅ។ ដឹងអីស្រាប់តែប្តីនិងកូនៗរបស់ពួកគាត់ត្រូវបានគេចោទថាលួចដំឡូងគេជាង១០០០គីឡូក្រាម យកទៅលក់បានក្នុង១គីឡូក្រាមបានតម្លៃ១៧០រៀល ហើយក៏ត្រូវបានសមត្ថកិច្ចនគរបាលស្រុកឱរ៉ាល់ធ្វើការឃាត់ខ្លួនទាំង០៣នាក់ឪពុកនិងកូនៗតែម្តង កសាងសំណុំរឿងបញ្ជូនទៅតុលាការ និងបញ្ជូនទៅដាក់ក្នុងពន្ធនាគារ(គុក)កាលពីព្រឹកថ្ងៃទី២៦ ខែកក្កដា ឆ្នាំ២០២៥នេះហើយ។

ព័ត៌មានតរនៅលេខក្រោយ