កំពង់ឆ្នាំង:ស្ត្រីម្នាក់ជាកម្មារិនីរោងចក្រ ស្នាក់នៅផ្ទះជួល នៅរាជធានីភ្នំពេញ បានសម្រេចចិត្ត ចំណាយថវិកាប្រមាណ ជិត១ម៉ឺនដុល្លា ដើម្បីសាងសង់ផ្ទះសមរម្យថ្មីជូនម្តាយដែលមានវ័យចាស់ជរា បានរស់នៅដូចគេ។
ប៉ុន្តែបែរជាចាញ់បោក អ្នកម៉ៅការដែលមកធ្វើផ្ទះនោះយកលេស មិនធ្វើការសាងសង់ដូចក្នុងកិច្ចសន្យាឡើយ ស្ត្រីកំសត់ខាងលើ លើកម្រាមដៃ១០ ស្នើដល់អាជ្ញាធរ និង សមត្ថកិច្ច ពាក់ព័ន្ធជួយអន្តរាគមន៍ រកយុត្តិធម៌ដល់រូបនាងផង។
ជួបជាមួយអ្នកយកព័ត៌មាន ស្ត្រីមេម៉ាយកំសត់មានឈ្មោះ ប៊ុន គន្ធា អាយុ៣០ឆ្នាំ មុខរបរកម្មារិនីរោងចក្រ ស្នាក់នៅផ្ទះជួលក្នុងរាជធានីភ្នំពេញ មានស្រុកកំណើតនៅក្នុងភូមិជន្លាវ ឃុំប្រស្នឹប ស្រុករលាប្អៀរ ខេត្តកំពង់ឆ្នាំង បានរៀបរាប់ទាំងទឹកភ្នែករលីងរលោងថា ដោយមានក្តីអាណិតអ្នកមានគុណ ខិតខំប្រមូលលុយដែលខំសន្សំទុក និង ខ្ចីបុលលុយគេផងនោះ ដើម្បីសាងសង់ផ្ទះថ្មតូចមួយគ្រាន់បាន ម្តាយរស់នៅឱ្យបានសមរម្យដូចគេដែរ។
ប៉ុន្តែគាត់មិននឹកស្មានថា ក្រុមអ្នកម៉ៅការដែលមានឈ្មោះ យូ វិស័យ បានទទួលយកលុយរបស់គាត់អស់ជាង80%(៨០ភាគរយ)ទៅហើយ ចំណែកផ្ទះដែលកំពុងធ្វើការសាងសង់វិញ ក្រុម ជាងទើបតែធ្វើការសាងសង់បានត្រឹមតែ20%(២០ភាគរយ)តែប៉ុណ្ណោះ។
ស្ត្រីមេម៉ាយកំសត់ ឈ្មោះ ប៊ុន គន្ធា បានបន្តថា មួយវិញទៀតក្រុមជាងបានផ្អាកធ្វើការសាងសងផ្ទះគាត់ទៀត ក៏ព្រោះតែអ្នកម៉ៅការឈ្មោះ យូ វិស័យនោះ បានទទួលយកលុយរបស់គាត់ហើយមិនទិញសម្ភារ: របស់របរ ទៅឱ្យក្រុមជាងនោះទេ ទើបផ្ទះសម្បែងរបស់គាត់ នៅមិនទាន់សង់រួចរហូតដល់សព្វថ្ងៃនេះ!។
ស្រ្តីជាម្ចាស់ផ្ទះមានឈ្មោះ ប៊ុន គន្ធា បាននិយាយថា អ្វីដែលធ្វើឱ្យរូបគាត់ធ្វើការសាងសង់ផ្ទះ ទាំងត្រដាបត្រដួស ជូនអ្នកម្តាយនេះ។
ដោយគាត់បានយល់ឃើញថា ម្តាយមានសភាពជរាណាស់ទៅហើយណាមួយផ្ទះដែលរស់នៅសព្វថ្ងៃមិនសូវសមរម្យផង ទើបគាត់សម្រេចចិត្តហៅអ្នកម៉ៅការដែលមានឈ្មោះយូ វិស័យ ភេទប្រុសអាយុ៣៩ឆ្នាំមានមុខរបបដើរម៉ៅការធ្វើផ្ទះដែលមានទីលំនៅសព្វថ្ងៃភូមិឬស្សី សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។
ស្ត្រីមេម៉ាយកំសត់ខាងលើបានបញ្ជាក់ថា លោក យូ វិស័យ រូបនោះបានទទួលធ្វើផ្ទះឱ្យគាត់ និងបានធ្វើកិច្ចសន្យា ផ្តិតមេដៃថែមទៀតផង ផ្ទះមាន
ទំហំ ៤.៥ម៉ែត្រគុណ១០ម៉ែត្រ ធ្វើពីដែក ហើយព្រមព្រាងគ្នាក្នុងតម្លៃយ១០០០០ម៉ឺនដុល្លាសហរដ្ឋអាមេរិក។
សព្វថ្ងៃនេះផ្ទះរបស់គាត់ត្រូវបានជាងទុកចោលដោយសារមិនមានសម្ភារសម្រាប់ឱ្យជាងធ្វើ ដោយសារតែឈ្មោះ យូ វិស័យ អ្នកម៉ៅការមិនព្រមទិញសម្ភារៈឱ្យជាង ទើបជាងទុកផ្ទះគាត់ចោលទាំងគ្រោងនៅកណ្តាលថ្ងៃកណ្តាលភ្លៀង សឹងនិងពុកដែកវិញទៅហើយនោះ មើលទៅសង្វេគ ខ្លាំងណាស់ បើទោះបីជាគាត់ទូរស័ព្ទទៅ លោក យូ វិស័យ ក៏មិនមានដំណោះស្រាយអ្វីដែរ។
ជាចុងក្រោយគាត់សំណូមពរទៅអាជ្ញាធរមូលដ្ឋាន ជាពិសេសឯកឧត្តមអភិបាលខេត្តកំពង់ឆ្នាំង សូមជួយអន្តរាគមន៍ទៅក្រុមអ្នកម៉ៅការខាងលើបានធ្វើខុសពីកិច្ចសន្យា មួយទៀតគាត់អ្នកម៉ៅការរូបនោះបានយកលុយពីគាត់ជាង៨០ភាគរយទៅហើយ។
ពាក់ព័ន្ធរឿងសាងសង់ផ្ទះខាងលើ ជាង ឈ្មោះ ធីម បានឱ្យដឹងថាផ្ទះមួយខ្នងដែលមានម្ចាស់ឈ្មោះប៊ុន គន្ធា ហើយគាត់ទទួលយកកមធ្វើពីឈ្មោះ យូ វិស័យ ក្នុងតម្លៃយពលកម្មចំនួន៣៥០០ដុល្លាសហរដ្ឋអាមេរិក ។ ក្រោយពីទទួលបានការងារសង់ផ្ទះនេះហើយនិងព្រមព្រាងគ្នាតាមតម្លៃយខាងពួកគាត់ជាជាងបាននាំគ្នាធ្វើរហូតបានជាង៥០ភាគរយទៅហើយខាងអ្នកម៉ៅការនៅមិនទាន់បើកថ្លៃពលកម្មឱ្យគាត់ដើម្បីគាត់ថ្លៃពលកម្មកូនជាងគាត់នោះទេ ។
ពេលគាត់សួរម្ចាស់ផ្ទះម្ចាស់បានប្រាប់ថាលោក យូ វិស័យបានបើកលុយយកអស់ជាង៨០ភាពរយទៅហើយ ។
ទើបគាត់ជាជាងក្រុមជាងបានទូរស័ព្ទទៅលោក យូ វិស័យ ដើម្បី បើកប្រាក់ពលកម្មខ្លះដើម្បើបើកឱ្យកូនជាង ។ បើទោះបីជាលោកព្យាយាមទូរស័ព្ទទៅលោកយូ វិស័យ អ្នកម៉ៅការរូបនិងចូលជាច្រើន លើកតែមិនមានអ្នកទទួល តេតាមឆាតក៏ ឈ្មោះយូ វិស័យ នេះមិនមើល និងមិនលើក
ដោយសារតែគាត់គ្មានលុយបើកឱ្យកូនជាងទើបគាត់ដកកូនជាងទៅធ្វើកន្លែងផ្សេងវិញសិនរង់ចាំឈ្មោះយូ វិស័យ យកលុយមកបើកឱ្យគាត់ទើបគាត់ចូលធ្វើផ្ទះនឹងវិញ។
គាត់រង់ចាំរយះពេលជាង៣ខែមកហើយនៅតែមិនមានទំនាក់ទំនងពីឈ្មោះ យូ វិស័យ និងសោះ ទើបគាត់នឹងម្ចាស់ផ្ទះស្នើសុំឱ្យអាជ្ញាធរជួយគាត់ផង។
ក្រោយពីមានការលើកឡើងនិងសំណូមពរពីស្ត្រីជាម្ចាស់ផ្ទះខាងលើ អ្នកយកព័ត៌មានយើងបានទូរស័ព្ទទៅឈ្មោះ យូ វិស័យ អ្នកម៉ៅការសាងសងផ្ទះតេចូលជាច្រើនដង ប៉ុន្តែមិនមានអ្នកលើកទទួល។
ចំណែកលោក មេឃុំប្រស្នឹប បានឲ្យដឹងថាសូមឱ្យស្ត្រីជាម្ចាស់ផ្ទះមកដាក់ពាក្យបណ្តឹងទើបអាជ្ញាធរឃុំកោះហៅអ្នកម៉ៅការនោះមកធ្វើការ ដោះស្រាយជូនបាន៕
អត្ថបទ៖ សុខ សុភ័ណ្ឌនចាញ់បោក
