លោក គឹម ជុងអ៊ុន ចេញមុខបញ្ជាក់សារជាថ្មីថាកូរ៉េខាងជើងគាំទ្ររុស្សីក្នុងបញ្ហាជម្លោះនៅអ៊ុយកែន

កូរ៉េខាងជើង៖ យោងតាមទូរទស្សន៍រដ្ឋកូរ៉េខាងជើង KRT កាលពីចុងសប្ដាហ៍កន្លងទៅ បានចាក់ផ្សាយវីដេអូដែលបង្ហាញពីជំនួបរវាងមេដឹកនាំ លោក គីម ជុងអ៊ុន (Kim Jong Un) ជាមួយរដ្ឋមន្ត្រីការបរទេសរុស្ស៊ី លោក ស៊ើហ្គី ឡាវរ៉ូវ (Sergei Lavrov) នាទីក្រុងវ៉ុនសាន (Wonsan) ភាគខាងកើតប្រទេសកូរ៉េខាងជើង ជាទីកន្លែងដែលលោកគីម (Kim) ទើបតែបានបើកសម្ពោធតំបន់ទេសចរណ៍ថ្មីនៅប្របមាត់ឆ្នេរ វ៉ុនសាន កាល់ម៉ា (Wonsan Kalma) សម្រាប់អ្នកនៅក្នុងស្រុក។ គេបានរាយការណ៍ថា ជំនួបនេះ ធ្វើឡើងកាលពីថ្ងៃទី១២ ខែកក្កដា និងចាក់ផ្សាយនៅក្នុងទូរទស្សន៍រដ្ឋនៅមួយថ្ងៃបន្ទាប់ ។

យោងតាមទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍ដែរថា លោក គីម (Kim) បានបញ្ជាក់សារជាថ្មីទៅកាន់លោកឡាវរ៉ូវ (Lavrov) ថា ប្រទេសរបស់លោក បានត្រៀមខ្លួនរួចជាស្រេច ដើម្បី «គាំទ្រដោយគ្មានលក្ខខណ្ឌ» នូវរាល់វិធានការណ៍ដែលធ្វើឡើងដោយរដ្ឋធានីម៉ូស្គូ ដើម្បីដោះស្រាយជម្លោះនៅក្នុងប្រទេសអ៊ុយក្រែន ខណៈដែលប្រទេសទាំងពីរ បានពិភាក្សាគ្នាជាយុទ្ធសាស្ត្រយ៉ាងជិតស្និទ្ធ ។

កាលពីថ្ងៃសៅរ៍ ប្រព័ន្ធផ្សព្វផ្សាយរបស់រុស្ស៊ី បានរាយការណ៍ថា លោក ឡាវរ៉ូវ (Lavrov) បានពណ៌នាអំពីទំនាក់ទំនងទ្វេភាគីថា «មានភាពជាបងប្អូនដែលមិនអាចកាត់ថ្លៃបាន» អំឡុងស្ថិតនៅក្នុងជំនួបរបស់លោក ជាមួយមេដឹកនាំកូរ៉េខាងជើង ហើយបានថ្លែងអំណរគុណដល់លោកគីម (Kim) សម្រាប់ការជួយផ្ដល់កម្លាំងកងទ័ពទៅកាន់ប្រទេសរុស្ស៊ី ។

នៅមុននេះ រដ្ឋមន្ត្រីការបរទេសរុស្ស៊ី លោក ឡាវរ៉ូវ (Lavrov) បានជួបជាមួយសមភាគីកូរ៉េខាងជើង លោក ឆូ ស៊ុនហ៊ុយ (Choe Son Hui) នៅក្នុងទីក្រុងកំពង់ផែវ៉ុនសាន (Wonsan)។ ទីភ្នាក់ងារ KCNA បានឱ្យដឹងទៀតថា អ្នកទាំងពីរ បានចេញសេចក្តីថ្លែងការណ៍រួមមួយ ដោយសន្យាការពារអធិបតេយ្យភាព និងបូរណភាពទឹកដីរវាងគ្នាទៅវិញទៅមក ។

គួររម្លឹកថា រុស្ស៊ី និងកូរ៉េខាងជើង មានទំនាក់ទំនងស៊ីជម្រៅយ៉ាងខ្លាំងក្នុងរយៈពេល ២ឆ្នាំចុងក្រោយនៃសង្រ្គាមនៅអ៊ុយក្រែន ដែលបានចាប់ផ្តើមនៅក្នុងខែកុម្ភៈ ឆ្នាំ ២០២២ ដោយទីក្រុងព្យុងយ៉ាង បានបញ្ជូនកងទ័ពជាង ១ម៉ឺននាក់ និងផ្គត់ផ្គង់គ្រឿងសព្វាវុធទៅកាន់ប្រទេសរុស្ស៊ី ដើម្បីបង្ហាញការគាំទ្រដល់ប្រតិបត្តិការយោធារបស់ទីក្រុងម៉ូស្គូ ៕
ដោយ:សុខសុភ័ណ្ឌ អត្ថបទប្រែសម្រួល