អ្នកវិនិយោគមកពីប្រទេសចិនបោះទុនវិនិយោគប្រមាណ៥០០លានដុល្លារ ផលិតថាមពលពន្លឺព្រះអាទិត្យនៅខេត្តកំពង់ស្ពឺ
ខេត្តកំពង់ស្ពឺ៖ ក្រុមហ៊ុនរបស់ Dongbaishan Holding Group Co., Ltd. and its subsidiaries នឹងបណ្តាក់ទុនប្រមាណ ៥០០លានដុល្លារ ដើម្បីសាងសង់រោងចក្រផលិតថាមពលពន្លឺព្រះអាទិត្យ(សូឡា) នៅក្នុងខេត្តកំពង់ស្ពឺ ដែលនឹងចាប់ផ្តើមនៅពាក់កណ្តាលខែកក្កដា ឆ្នាំ២០២៥ នៅលើផ្ទៃដីប្រមាណជិត ៦០០ហិកតា។ នេះបើយោងតាមជំនួបពិភាក្សាការងាររវាងលោក Si Juchen អ្នកវិនិយោគជនជាតិចិន និង លោក ជាម ច័ន្ទសោភ័ណ អភិបាលខេត្តកំពង់ស្ពឺ នៅព្រឹកថ្ងៃទី៧ ខែកក្កដា ឆ្នាំ២០២៥។
លោក Si Juchen បានបញ្ជាក់ថា ក្រុមហ៊ុនលោកបានដំណើរការមានរយ:ពេលជាង ២០ឆ្នាំមកហើយនៅប្រទេសចិន។ ដោយមើលឃើញពីឱកាសការងាររកស៊ី ក្រុមហ៊ុនក៏បានសហការជាមួយសមាគមសហគមន៍អភិវឌ្ឍន៍កម្ពុជា-ចិន និងក្រុមហ៊ុន SL sunligth green energy sorlapower co.ltd បោះទុន ៥០០លានដុល្លារ វិនិយោគលើការងារនេះដោយជ្រើសរើសយកខេត្តកំពង់ស្ពឺជាខេត្តគោលដៅ។ នៅពេលដែលរោងចក្រចាប់ដំណើរការអាចផ្តល់ឱកាសការងារដល់ប្រជាពលរដ្ឋក្នុងខេត្តនេះក្នុងរង្វង់ពី ១៥០០នាក់ ទៅ៣០០០នាក់។
លោក ជាម ច័ន្ទសោភ័ណ អភិបាលខេត្តកំពង់ស្ពឺ បានបង្ហាញពីការគ្រាំទ្រយ៉ាងពេញទំហឹងចំពោះការវិនិយោគលើផ្នែកថាមពលកកើតឡើងវិញតែមួយគត់នៅក្នុងខេត្តកំពង់ស្ពឺ និងបានសន្យាផ្តល់ការគាំទ្រ សម្របសម្រួលគ្រប់បែបយ៉ាងចំពោះផ្នែកច្បាប់ និងនីតិវិធីផ្សេងៗដើម្បីឱ្យដំណើរការនៃរោងចក្រនេះប្រព្រឹត្តិបានរលូន។
សូមបញ្ជក់ផងដែរថា បច្ចុប្បន្នខេត្តកំពង់ស្ពឺមានរោងចក្រ សហគ្រាសប្រមាណ ២៤៤២រោងចក្រសហគ្រាស ក្នុងនោះមានអ្នកវិនិយោគប្រមាណជាង៩០% ជាជនជាតិចិន៕ដោយ:APN
