កំពត: គណៈប្រតិភូមួយក្រុមនៃកម្មវិធី Futuru Lider ba ASEAN (FLBA) ដែលជាកម្មវិធីសម្រាប់អ្នកដឹកនាំវ័យក្មេង និងអនាគតរបស់ប្រទេសទីម័រខាងកើត បានកោតស្ងើបចំពោះការនាំមកនូវសុខសន្តិភាពជូនពលរដ្ឋរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងការដឹកនាំបន្ត និងអភិវឌ្ឍន៍ប្រទេសរបស់សម្តេចធិបតី ហ៊ុន ម៉ាណែត នាយករដមន្ត្រីនៃព្រះរាជាណាចក្រកម្ពុជា។
នៅព្រឹកថ្ងៃទី២៥ ខែមិថុនា ឆ្នាំ២០២៥ ឯកឧត្តម ម៉ៅ ធនិន អភិបាលខេត្តកំពត បានទទួលជួបសំណេះសំណាលជាមួយគណៈប្រតិភូមួយក្រុមនៃកម្មវិធី Futuru Lider ba ASEAN (FLBA) ដែលជាកម្មវិធី សម្រាប់អ្នកដឹកនាំវ័យក្មេង និងអនាគត របស់ប្រទេសទីម័រខាងកើត ដែលបានមកធ្វើទស្សនកិច្ចសិក្សានៅក្នុងខេត្តកំពត ក្នុងគោលបំណងដើម្បីស្វែងយល់អំពី តំបន់ទេសចរណ៍ធម្មជាតិក្នុងខេត្ត និងទទួលបានការយល់ដឹងកាន់តែច្បាស់អំពីកិច្ចខិតខំប្រឹងប្រែងអភិវឌ្ឍន៍ទេសចរណ៍ ប្រកបដោយចីរភាពរបស់កម្ពុជា។ មានមតិសំណេះសំណាលជាមួយគណៈប្រតិភូនាឱកាសនោះ ឯកឧត្តមអភិបាលខេត្តបានលើកឡើងថា ប្រទេសកម្ពុជាក្រោយមហានគររយៈពេល ៥០០ឆ្នាំ គឺមិនដែលទទួលបាននូវសុខសន្តិភាពពេញលេញនោះទេ តែបច្ចុប្បន្ននេះ ក្រោមការដឹកនាំប្រទេសដ៏ប៉ិនប្រសប់របស់សម្តេចតេជោ ហ៊ុន សែន បាននាំមកនូវសុខសន្តិភាពពេញលេញជូនពលរដ្ឋ និងប្រទេសជាតិ ដែលពោរពេញទៅដោយការអភិវឌ្ឍរីកចម្រើនលើគ្រប់វិស័យយ៉ាងឆាប់រហ័ស។
ឯកឧត្តមអភិបាលខេត្តបានបន្តថា ការដែលយកបានមកនូវសុខសន្តិភាពជូនជាតិ ជូនពលរដ្ឋនេះគឺមិនមែនជាការងាយនោះទេ គឺថ្នាក់ដឹកនាំ ពិសេសសម្តេចតេជោ ហ៊ុន សែន បានលះបង់គ្រប់បែបយ៉ាង ពុះពារគ្រប់ឧបសគ្គក្នុងការបញ្ចប់សង្គ្រាមដោយមិនប្រើប្រាស់អាវុធក្រោមគោលនយោបាយ ឈ្នះ ឈ្នះ។ ហើយបច្ចុប្បន្ននេះ ប្រទេសកម្ពុជាក្រោមការដឹកនាំបន្តដោយសម្តេចធិបតី ហ៊ុន ម៉ាណែត ជានាយករដ្ឋមន្ត្រីនៃព្រះរាជាណាចក្រកម្ពុជា សម្តេចនៅតែមានគោលជំហររក្សាឱ្យបាននូវសុខសន្តិភាព និងបន្តអភិវឌ្ឍន៍លើគ្រប់វិស័យ ក្នុងន័យដើម្បីលើកកម្ពស់ជីវភាពប្រជាពលរដ្ឋ ព្រមទាំងលើកមុខមាត់ប្រទេសកម្ពុជាឱ្យទទួលបាននូវកិត្តិស័ព្ទ កិត្តិនាមល្បីល្បាញនៅលើឆាកអន្តរជាតិ។
ឯកឧត្តមអភិបាលខេត្តបានបន្ថែមថា ទន្ទឹមនឹងការអភិវឌ្ឍលើគ្រប់វិស័យក្នុងប្រទេស និយាយដោឡែកខេត្តកំពតក៏មានការអភិវឌ្ឍលើគ្រប់វិស័យផងដែរ ទាំងហេដ្ឋារចនាសម្ព័ន្ធផ្លូវថ្នល់គ្រប់ក្រុង-ស្រុក ការបង្កើតឆ្នេរខ្សាច់កម្សាន្ត និងសមិទ្ធិផលទេសចរណ៍ឯកជាច្រើន ក្រោមការចង្អុលបង្ហាញរបស់ប្រមុខរាជរដ្ឋាភិបាល គឺសម្តេចធិបតី ហ៊ុន ម៉ាណែត ដោយជំរុញធ្វើយ៉ាងណាឱ្យវិស័យទេសចរណ៍ដែលជាវិស័យមានសក្តានុពលក្នុងខេត្តមានការរីកចម្រើន ក្នុងន័យដើម្បីជួយជំរុញ និងលើកកម្ពស់ជីវភាពប្រជាពលរដ្ឋឱ្យកាន់តេល្អប្រសើរ។
ក្រោយពីបានស្តាប់បទបង្ហាញ ក៏ដូចជាលើកជាសំនួរផ្សេងៗពីគណៈប្រតិភូ លោក អេសេគៀល ហ្វេរហ៊ែរ៉ា ប្រធានគណៈប្រតិភូ បានសំដែងការស្ងើបស្ងែងចំពោះការដឹកនាំប្រទេស និងវិធីសាស្ត្រក្នុងការស្វែងរកសុខសន្តិភាពជូនជាតិ ជូនប្រជាជន របស់សម្តេចតេជោ ហ៊ុន សែន អតីតនាយករដ្ឋមន្ត្រី ដែលប្រទេសនានាលើពិភពលោកពិបាកនឹងធ្វើបាន។ លោកក៏បានកោតសរសើរចំពោះការដឹកនាំបន្តរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបន្តរក្សាបាននូវស្ថេរភាពនយោបាយ ពិសេសសុខសន្តិភាព និងការអភិវឌ្ឍប្រទេសលើគ្រប់វិស័យយ៉ាងឆាប់រហ័ស។ ទន្ទឹមនឹងនោះ លោកក៏បានលើកសរសើរចំពោះការដឹកនាំខេត្តកំពត របស់ឯកឧត្តម ម៉ៅ ធនិន អភិបាលខេត្ត ដែលបានធ្វើឱ្យវិស័យទេសចរណ៍មានការរីកចម្រើនខ្លាំង ដោយរក្សាបាននូវសម្បត្តិធម្មជាតិដែលជាធនធានសម្រាប់បម្រើដល់វិស័យទេសចរណ៍ ព្រមទាំងបានបង្កើតឱ្យមានសមិទ្ធិផលទេសចរណ៍ដ៏ទាក់ទាញជាច្រើនទៀត៕
ដោយ:វង្ស ចំរើន
