ផុតម៉ោងកំណត់បិទច្រកទ្វារព្រំដែនកម្ពុជា-ថៃ ទាំងស្រុងនៅម៉ោង៨យប់

ភ្នំពេញ៖ ផុតរយៈពេលបីម៉ោង ក្រោយការឯកភាពគ្នារវាងអាជ្ញាធរខេត្តបន្ទាយមានជ័យ និងខេត្តស្រះកែវ ដែលអនុញ្ញាតឲ្យពលរដ្ឋទាំងសងខាងត្រូវវិលចូលប្រទេសរៀងៗខ្លួនជាកំណត់នោះ នៅវេលាម៉ោង៨យប់ ថ្ងៃទី២៤ ខែមិថុនា ឆ្នាំ២០២៥នេះ ពលករខ្មែរ និងអាជីវករខ្មែរលក់ដូរនៅផ្សាររ៉ុងកឿ បានវិលចូលប្រទេសកម្ពុជាវិញអស់ហើយ។

ការប្រញាប់ប្រញាល់វិលចូលប្រទេសវិញ មុនភាគីថៃបិទច្រកទ្វារព្រំដែនស្រុងបញ្ឈប់ឲ្យចេញចូលនោះ នៅច្រកទ្វារអន្ដរជាតិប៉ោយប៉ែត លោក អ៊ុំ រាត្រី អភិបាលខេត្តបន្ទាយមានជ័យ បានចុះទៅទទួល និងអន្ដរាគមន៍ជួយសម្រួលដល់ប្រជាពលរដ្ឋផងដែរ។

លោក អ៊ុំ រាត្រី បានបញ្ជាក់ថា ក្នុងរយៈពេលបីម៉ោងចុងក្រោយនេះ មានពលរដ្ឋខ្មែរវិលត្រឡប់ចូលប្រទេសវិញ ចំនួន៦,៤៨៥នាក់ ក្នុងនោះស្ដ្រី៣,១៥២នាក់។

ក្រៅពីច្រកទ្វារអន្ដរជាតិប៉ោយប៉ែត, នៅច្រកទ្វារអន្ដរជាតិអូស្មាច់ ក្នុងភូមិសាស្ដ្រខេត្តឧត្តរមានជ័យឯណោះវិញ ក៏មានប្រជាពលរដ្ឋខ្មែរ ប្រញាប់ប្រញាល់វិលត្រឡប់មកប្រទេសកម្ពុជាវិញ ក្រោមការជួយសម្រួលពីសំណាក់អាជ្ញាធរដូចគ្នាផងដែរ។

សូមរំលឹកថា អាជ្ញាធរកម្ពុជា-ថៃ បានឯកភាពគ្នាទុកពេលត្រឹម៣ម៉ោង ចាប់ពីម៉ោង៥ល្ងាច ដល់ម៉ោង៨យប់ ថ្ងៃទី២៤ ខែមិថុនា ឆ្នាំ២០២៥ ដើម្បីឲ្យប្រជាពលរដ្ឋទាំងសងខាងអាចវិលត្រឡប់ចូលប្រទេសរៀងៗខ្លួនវិញ នៅច្រកទ្វារព្រំដែនអន្ដរជាតិប៉ោយប៉ែត មុនសម្រេចបិទខ្ទប់ច្រកទ្វារអន្ដរជាតិមួយនេះទាំងស្រុង បញ្ឈប់ឲ្យមានការឆ្លងកាត់ទៅវិញទៅមក។

សេចក្ដីរាយការណ៍ពីខេត្តបន្ទាយមានជ័យ បានឲ្យដឹងថា ការឯកភាពគ្នាទុកពេល ៣ម៉ោងសម្រាប់ច្រកទ្វារអន្ដរជាតិប៉ោយប៉ែត បានធ្វើឡើងបន្ទាប់ពីអភិបាលខេត្តបន្ទាយមានជ័យ និងអភិបាលខេត្តស្រះកែវរបស់ថៃ បានជួបជជែកគ្នា និងឆ្លងយោបល់ថ្នាក់ដឹកនាំរៀងៗខ្លួន។ តែសម្រាប់ជនជាតិបរទេស ក្រៅពីជនជាតិកម្ពុជា-ថៃ មិនត្រូវបានអនុញ្ញាតឲ្យឆ្លងកាត់នោះទេ។

នៅច្រកទ្វារព្រំដែនអន្ដរជាតិប៉ោយប៉ែត, បើតាមសេចក្ដីរាយការណ៍បញ្ជាក់ថា អាជ្ញាធរកម្ពុជា-ថៃ បានសម្រេចឲ្យពលរដ្ឋនៃប្រទេសទាំងពីរ ត្រូវវិលត្រឡប់ចូលប្រទេសរៀងៗខ្លួនវិញអស់ ត្រឹមម៉ោង៥ល្ងាច ដល់ម៉ោង៨យប់ ពិសេសប្រជាពលរដ្ឋខ្មែរដែលប្រកបអាជីវកម្មនៅផ្សាររ៉ុងកឿ និងអ្នកធ្វើការនៅក្នុងប្រទេសថៃ។

ដោយឡែក សម្រាប់ជនជាតិថៃ ដែលធ្វើការនៅកម្ពុជា ជាពិសេសនៅ ប៉ោយប៉ែត ក៏ត្រូវវិលត្រឡប់ចូលប្រទេសខ្លួនវិញដូចគ្នា។

នៅម៉ោងដូចគ្នានេះ សម្រាប់រថយន្ដ នៃប្រទេសទាំងពីរ ក៏ត្រូវបើកត្រឡប់ទៅប្រទេសរៀងៗខ្លួនផងដែរ តែមិនអនុញ្ញាតឲ្យមានដឹកទំនិញអ្វីទាំងអស់។

ដោយឡែកសម្រាប់ច្រកទ្វារតំបន់ដែលមាននៅក្នុងភូមិសាស្ដ្រខេត្តបន្ទាយមានជ័យ និងខេត្តស្រះកែវ គឺភាគីកម្ពុជា-ថៃ ឯកភាពគ្នាទុកពេលត្រឹមម៉ោង១ប៉ុណ្ណោះ ពោលនៅម៉ោង៥ ដល់ម៉ោង៦ល្ងាចថ្ងៃនេះ ពលរដ្ឋត្រូវវិលត្រឡប់ ចូលប្រទេសរៀងៗខ្លួនវិញ ហើយបញ្ឈប់ឲ្យមានការចេញចូលឆ្លងកាត់បន្ដទៀត៕(apn)