មេខ្យល់ជនជាតិថៃម្នាក់រងរបួសធ្ងន់ពលរដ្ឋថៃប្រុសស្រី២០នាក់ត្រូវឃាត់ខ្លួនក្រោយទាហានថៃប្រើអាវុធបាញ់ស្ទាក់ពេលលួចឆ្លងដែនខុសច្បាប់ទាំងយប់មកកម្ពុជា

1. ពីខេត្តស្រះកែវ: មានហេតុការណ៍យោធាថៃ ផ្ទុះអាវុធវែង ចំនួន៣គ្រាប់ គ្រាដែលមានក្រុមពលករថៃ ប្រមាណជាង៣០នាក់ កំពុងឆ្លងដែនកាត់ព្រៃចេញពីដីថៃ ចូលមកកម្ពុជា ដោយមានមេខ្យល់ថៃម្នាក់ ជាអ្នកនាំផ្លូវ ហើយក្នុងការបាញ់ប្រហារនោះ មនុស្សម្នាក់ត្រូវបានរងរបួសធ្ងន់។

នេះយោងតាមការផ្សាយ របស់គេហទំព័រស្រះកែវធីវី ដោយគេហទំព័រនេះ  បានបញ្ជាក់ថា ហេតុការណ៍ផ្ទុះអាវុធនេះ បានកើតឡើង នៅវេលាម៉ោង ០០ និង៣០ នាទី យប់រំលងអាធ្រាត ឈានចូលថ្ងៃទី ២១ ខែមិថុនា ឆ្នាំ២០២៥ នៅត្រង់ចំណុចក្បែរព្រំដែនកម្ពុជា ស្ថិតក្នុងភូមិសែនសុខ ឃុំខ្លងណាំសៃ ស្រុកអារញ្ញប្រថេត ខេត្តស្រះកែវ។

គេហទំព័របានបន្តថា នៅមុនពេលកើតហេតុ គឺមានរថយន្ត ៣ ឬ ៤ គ្រឿង បានបើកមកឈប់សំចត រួចហើយក៏មានមនុស្ស ចុះមកធ្វើដំណើរដោយថ្មើជើង ប្រមាណជាង ៣០នាក់ ។ នៅពេលនោះក៏មានយុវជនម្នាក់ ដែលគេដឹងថា ជាអ្នករស់នៅក្នុងតំបន់នេះ ហើយក៏ជាមេខ្យល់នាំផ្លូវ ឲ្យក្រុមមនុស្សទាំងនោះ ឆ្លងដែនចូលមកក្នុងទឹកដីកម្ពុជា៕សួន ពិសិត