លោកឧត្តមសេនីយ៍ឯក ស្រី ឌឹកមេបញ្ជាការកងពលធំអន្តរាគមន៍លេខ៣ជាប្រធានចុះជួយមូលដ្ឋានស្រុកជាំក្សាន្ត
ព្រះវិហារ៖ ថ្ងៃទី២១ ខែឧសភា ឆ្នាំ២០២៥ ឯកឧត្តម ឧត្តមសេនីយ៍ឯក ស្រី ឌឹក មេបញ្ជាការង កងទ័ពជើងគោក មេបញ្ជាការ កងពលធំអន្តរាគមន៍លេខ៣ និងជាប្រធានក្រុមការងារចុះជួយមូលដ្ឋានស្រុកជាំក្សាន្ត បានដឹកនាំក្រុមការងារចុះជួបសំណេះសំណាល សាកសួរសុខទុក្ខដល់ប្រជាពលរដ្ឋជាអាជីវករចំនួន ១១ គ្រួសារ ដែលរងគ្រោះគ្រោះមហន្តរាយអគ្គីភ័យឆាបឆេះលំនៅឋាន កាលយប់ថ្ងៃទី២០ ខែឧសភា ឆ្នាំ២០២៥ វេលាម៉ោង ២០ :៣០នាទី នៅចំណុចផ្សារពាក់ស្បែក ស្ថិតនៅភូមិពាក់ស្បែក ឃុំរំដោះស្រែ ស្រុកជាំក្សាន្ត ខេត្តព្រះវិហារ បណ្ដាលឲ្យឆេះផ្ទះ០៨ខ្នងមាន ១៥បន្ទប់និងតូបជួល ១៦ តូបបណ្ដាលឱ្យខូចខាតសម្ភារៈទាំងស្រុងដោយពុំមានរងរបួសគ្រោះថ្នាក់ដល់មនុស្សទេ។
ក្នុងអំឡុងពេលនោះដោយបានប្រើប្រាស់រថយន្ត៣គ្រឿង រថយន្តពន្លត់អគ្គីភ័យអធិការដ្ឋាននគរបាលស្រុកជាំក្សាន្ត និងរថយន្តពន្លត់អគ្គីភ័យរបស់អង្គរក្ស ព្រមទាំងរថយន្តទឹកកងពលធំអន្តរាគមន៍លេខ៣ មូលហេតុឆេះ បណ្ដាលមកពីផ្ទុះសេរខ្សែភ្លើង។
ក្នុងឱកាសនោះដែរ ឯកឧត្តម ស្រី ឌឹក បានឧបត្ថម្ភដល់ក្រុមគ្រួសាររងគ្រោះខួចខាត ផ្ទះសំបែងចំនួន ១១គ្រួសារ ក្នុង១គ្រួសារ ទទួលបាន កៅស៊ូតង់ចំនួន0១,អង្ករ០១បេ, មី០១កេស, ត្រីខ០១យួ និងថវិកាចំនួន ១.០០០.០០រៀល និងឯកឧត្តម ឧត្តមសេនីយ៍ទោ អ៊ូ ណារិន មេបញ្ជាការរង នាយសេនាធិការ កងពលធំអន្តរាគមន៍លេខ៣ និងជាប្រធានក្រុមការងារចុះជួយឃុំរំដោះស្រែ បាននាំយកអំណោយថវិកាក្រុមការងារ ជូន ដល់ក្រុមគ្រួសាររងគ្រោះខួចខាត ផ្ទះសំបែងចំនួន ១១គ្រួសារចំនួន ១០០.០០០រៀលផងដែរ ។
