មកកំពង់ស្ពឺ៖ លោក តូច ប៉ូលីវ៉ា អភិបាលរងខេត្ត លោក គង់ ប៊ុនសៀង ប្រធាន លេខាធិការដ្ឋានរៀបចំការបោះឆ្នោតកំពង់ស្ពឺ(លធ.ខប) បានអញ្ជើញជាអធិបតីភាពក្នុងកិច្ចប្រជុំស្ដីពីការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០២៥ ជូនដល់មន្ត្រី ល.ធ.ខ.ប និងភាគីពាក់ព័ន្ធ រយ:ពេល០២ថ្ងៃ គឺថ្ងៃ២៤ -២៥ ខែមេសា ឆ្នាំ២០២៥ នៅ ល.ខ.ប កំពង់ស្ពឺ ដោយមានការអញ្ជើញចូលរួមពីតំណាង ស្នងការរងខេត្ត តំណាងតំបន់ប្រតិបតិការសឹករងខេត្ត តំណាងកងរាជអាវុធហត្ថខេត្ត តំណាងមន្ទីរព័ត៌មានខេត្ត លោក លោកស្រី អភិបាលរងក្រុង ស្រុកទាំង៩ តំណាងបក្សនយោបាយ និងតំណាងអង្គការនានា របស់ខេត្តកំពង់ស្ពឺ។
លោក តូច ប៉ូលីវ៉ា អភិបាលរងខេត្តមានប្រសាសន៍ថា÷ ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៥ គឺមានរយៈពេល តែ២៦ថ្ងៃតែប៉ុណ្ណោះ។ ក្នុងនាមឯកឧត្តមបណ្ឌិតអភិបាលនៃគណៈអភិបាលខេត្ត ខ្ញុំសូមអំពាវនាវដល់ប្រជាពលរដ្ឋដែលមានឈ្មោះក្នុងបញ្ជីបោះឆ្នោតផ្លូវការឆ្នាំ២០២៤ សូមអញ្ជើញទៅពិនិត្យបញ្ជីឈ្មោះ អញ្ជើញទៅចុះឈ្មោះបោះឆ្នោតចំពោះប្រជាពលរដ្ឋដែលពុំទាន់បានចុះឈ្មោះបោះឆ្នោត និងអញ្ជើញបងប្អូនប្រជាពលរដ្ឋដែលមានឈ្មោះក្នុងបញ្ជីបោះឆ្នោត ហើយមិនដែលបានធ្វើបច្ចុប្បន្នភាពក្នុងរយៈពេលយ៉ាងតិច ១០ឆ្នាំ ទៅធ្វើបច្ចុប្បន្នភាព ទិន្នន័យជីវមាត្រ ជាមួយក្រុមចុះឈ្មោះបោះឆ្នោត ចាប់ពីថ្ងៃទី១ ខែឧសភា ដល់ថ្ងៃទី២៦ ខែឧសភា ឆ្នាំ២០២៥ នៅតាមឃុំ សង្កាត់សាមី កុំបីខានឡើយ។
សូមតំណាងគណបក្សនយោបាយ សមាគម អង្គការមិនមែនរដ្ឋាភិបាល អាជ្ញាធរគ្រប់លំដាប់ថ្នាក់ ប្រព័ន្ធផ្សព្វផ្សាយព័ត៌មាន និងភាគីពាក់ព័ន្ធដទៃទៀត មេត្តាជួយផ្សព្វ ផ្សាយបន្ត និងជំរុញប្រជាពលរដ្ឋដែលបានចុះឈ្មោះបោះឆ្នោតរួចហើយ ទៅពិនិត្យផ្ទៀងផ្ទាត់ឈ្មោះ និងទិន្នន័យរបស់ខ្លួនក្នុងបញ្ជីបោះឆ្នោតចុងក្រោយឆ្នាំ២០២៤ ដែលមានបិទផ្សាយនៅតាមសាលាឃុំ សង្កាត់ ឬទីប្រជុំជនណាមួយក្នុងឃុំ សង្កាត់ ឬផ្សព្វផ្សាយតាមអាសយដ្ឋានវេប voterlist.nec.gov.kh ឬតាមកម្មវិធីទូរសព្ទដៃឆ្លាត (Mobile App) NEC KH កាលពីថ្ងៃទី២០ ខែមេសា ឆ្នាំ២០២៥ ។
មន្ត្រីនៃលេខាធិការដ្ឋានខេត្តរៀបចំការបោះឆ្នោត លោកគ្រូបង្ហាត់ប្រចាំក្រុង ស្រុក បន្តសហការជាមួយ អាជ្ញាធរគ្រប់លំដាប់ថ្នាក់ ឃុំ សង្កាត់ ទាំង៨៨ ស្រុក ក្រុង ទាំង៩ និង
គ្រប់ភាគីពាក់ព័ន្ធទាំងអស់ ដើម្បីរៀបចំវគ្គបណ្ដុះបណ្ដាលបន្តនៅតាមមណ្ឌលប្រមូលផ្តុំតាម
ក្រុង ស្រុក ទៅតាមផែនការមេដែលបានកំណត់គឺនៅថ្ងៃទី២៩-៣០ ខែមេសា ឆ្នាំ២០២៥ នាពេលខាងមុខ និងសូមប្រកបដោយជោគជ័យ៕
ដោយ:ហេង រិន
