- ចូលកោសខ្យល់ដេកលក់មួយភាំងក្រោកឡើងវិញបាត់លុយអស់(មួយម៉ឺនប្រាំពាន់ដុល្លា) ១៥០០០$ និងទូរសព្ទដៃ iphone 12 pro max 1 គ្រឿង!
ពោធិ៍សាត់ថ្ងៃទី ៨ខែ ធ្នូ ឆ្នាំ ២០២៤
បុរសម្នាក់បានដាក់ពាក្យបណ្ដឹងភ្លាមៗចូលទៅកាន់ការិយាល័យព្រហ្មទណ្ឌកម្រិតស្រាលទៅលើស្ត្រីម្នាក់ដែលជាអ្នករកស៊ីកោសជប់ដែលមានឈ្មោះថា ប៊ន.វណ្ណៈ រស់នៅភូមិ តានុក ឃុំលាច ស្រុកភ្នំក្រវាញ ខេត្តពោធិ៍សាត់ បន្ទាប់ពីខ្លួនបានចូលទៅកោសខ្យល់ដេកលក់មួយភាំងក្រោកមកវិញបាត់លុយចំនួន 15.000 ដុល្លារនិង ទូរសព្ទដៃ iphone 12 pro max 1 គ្រឿង។
យោងតាមការរៀបរាប់ពីសំណាក់ជនរងគ្រោះដែលមានឈ្មោះហៅថា មាសហេង ជនជាតិខ្មែរមានអាយុ ៥៤ ឆ្នាំសញ្ជាតិខ្មែររស់នៅក្នុងភូមិ ឯក ភាព ឃុំថ្មដា ស្រុកវាលវែង ខេត្តពោធិ៍សាត់ក្នុងតួនាទីជាយោធា បានរៀបរាប់ឲ្យដឹងថាកាលពីវេលាម៉ោង ៣ និង ៣០ នាទីទាបភ្លឺនៅថ្ងៃទី ៤ ខែធ្នូឆ្នាំ ២០២៤ កន្លងមកថ្មីៗនេះខ្លួនមានអាការៈមិនស្រួលខ្លួនហើយក៏ចូលទៅកាន់ទីកន្លែងកោសជប់ដើម្បីឲ្យគេជួយបន្ថយអាការៈរបស់ខ្លួន។
លោក មាស ហេង បានបន្តឲ្យដឹងទៀតថាបន្ទាប់ពីចូលឲ្យគេកោសជប់រួចហើយខ្លួនក៏បានសម្រាកមួយភាំងលុះដល់ពេលក្រោកឡើងមកវិញ នៅវេលាម៉ោង ៦:៤៥នាទីព្រឹក ថ្ងៃទី០៤ ខែធ្នូ ឆ្នាំ២០២៤ ថ្ងៃដដែល ក៏ស្រាប់តែខ្លួនបានលូកមើលក្នុងហោប៉ៅខោស្រាប់តែបាត់លុយអស់រលីងចំនួន ១៥០០០ ដុល្លារ និង ទូរសព្ទ iphone 12pro max មួយគ្រឿងតែម្ដងទៅ។
បន្ទាប់ពីដឹងថាលុយនិងទូរសព្ទត្រូវបានបាត់អស់ខ្លួនក៏បានទៅសួររកស្ត្រីដែលមានឈ្មោះប៊នវណ្ណៈ នៅផ្ទះជិតខាងហើយពលរដ្ឋដែលរស់នៅក្បែរកន្លែងកោសជប់បានប្រាប់ថាស្ត្រីរូបនោះបានម៉ៅឡានជិះធ្វើដំណើរឆ្ពោះទៅកាន់ទិសខាងលិចគឺខេត្តបាត់ដំបងបាត់ទៅហើយ។ក្រោយពីបានទទួលដំណឹងពីពលរដ្ឋរួចហើយខ្លួនក៏បានទៅដាក់ពាក្យបណ្ដឹងនៅការិយាល័យព្រហ្មទណ្ឌកម្រិតស្រាលដើម្បីឲ្យកម្លាំងសមត្ថកិច្ចព្រហ្មទណ្ឌកម្រិតស្រាលជួយស្រាវជ្រាវរកជនល្មើសដើម្បីយកមកផ្ដន្ទាទោសទៅតាមច្បាប់។
លោក មាស ហេង បានបញ្ជាក់ជាចុងក្រោយថា ប្រសិនបើសមីខ្លួនបានដឹងថាខ្លួនធ្វើខុសហើយ ហើយយកទ្រព្យសម្បត្តិទាំងនោះត្រឡប់មកវិញមុនពេលសមត្ថកិច្ចតាមចាប់ខ្លួនបានលោកនឹង លើកលែងទោសឲ្យ៕ដោយសំនៀង
