សមត្ថកិច្ចទម្លុះចូលទៅក្នុងអគារខុនដូមួយកន្លែងនៅខណ្ឌចំការមន ឃាត់ខ្លួនមនុស្សជាច្រើននាក់…..
ភ្នំពេញ ៖ កម្លាំងកងរាជអាវុធហត្ថរាជធានីភ្នំពេញ សហការជាមួយកម្លាំងអាវុធហត្ថខណ្ឌចំការមន បានធ្វើការឆ្មក់បង្ក្រាបទីតាំងអគារមួយកន្លែង ដែលសង្ស័យថា បង្ខាំងមនុស្សជំរិតទារប្រាក់ ដោយធ្វើការឃាត់ខ្លួនមនុស្សប្រុសស្រីជាច្រើននាក់ផងដែរ បង្កឱ្យមានការភ្ញាក់ផ្អើលកាលពីវេលាម៉ោង១០យប់ ថ្ងៃទី៨ ខែកញ្ញា ឆ្នាំ២០២២ នៅចំណុចអគារខុនដូមួយកន្លែង តាមបណ្ដោយផ្លូវ១២៣ កែង៤៤៦ ស្ថិតក្នុងសង្កាត់ទួលទំពូងទី១ ខណ្ឌចំការមន ។
តាមប្រភពពីកម្លាំងសមត្ថកិច្ចបានអោយដឹងខ្លះៗថា មុននឹងកម្លាំងអាវុធហត្ថរាជធានីភ្នំពេញ បានធ្វើការចុះបង្ក្រាប គឺកម្លាំងកងរាជអាវុធហត្ថ បានទទួលដំណឹងពីបងប្អូនប្រជាពលរដ្ឋរាយការណ៍មកថា ទីតាំងខាងលើមានករណីបង្ខាំងមនុស្ស ដើម្បីជំរិតទារប្រាក់ដោយខុសច្បាប់ បន្ទាប់ពីទទួលបានដំណឹងបែបនេះហើយ កម្លាំងអាវុធហត្ថរាជធានីភ្នំពេញ បានសហការជួយនឹងកម្លាំងអាវុធហត្ថខណ្ឌចំការមន ដឹកនាំកម្លាំង រហូតដល់ឈានដល់ការបុកទម្លុះចូលទៅក្នុងអគារខុនដូខាងលើ ដោយធ្វើការឃាត់ខ្លួនមនុស្សប្រុសស្រីជាច្រើននាក់ ក្នុងនោះមានជនជាតិខ្មែរ វៀតណាម និងចិន រួមទាំងវត្ថុតាំងពាក់ព័ន្ធ និងហ្គេមអនឡាញ ដើម្បីយកទៅធ្វើការសាកសួរផងដែរ ។
គួរបញ្ជាក់ថា នៅក្នុងរង្វង់ប្រតិបត្តិការខាងលើនេះ បន្ទាប់ពីចប់សព្វគ្រប់ហើយ មនុស្សប្រុសស្រីជិត១០នាក់ ត្រូវបានកម្លាំងអាវុធហត្ថនាំខ្លួនយកទៅធ្វើការសាកសួរនៅមូលដ្ឋានកងរាជអាវុធហត្ថរាជធានីភ្នំពេញ ដើម្បីអោយដឹងថា តើអ្នកណាជាជនរងគ្រោះ និងអ្នកណាជាជនសង្ស័យអោយពិតប្រាកដ?៕ដោយ តាំង វ៉ៃ
