ភ្នំពេញ ៖ នារីជាកម្មករសំណង់ម្នាក់ ត្រូវរថយន្តមិនស្គាល់ម៉ាកបើកកៀរហើយកិនចំដងខ្លួន ស្លាប់នៅនឹងកន្លែង រីឯប្អូនស្រីបានរងរបួសធ្ងន់ ចំណែកអ្នកបើកម៉ូតូរងរបួសស្រាល ។
ហេតុការណ៍ គ្រោះថ្នាក់ចរាចរណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៨ ព្រឹកថ្ងៃទី២៦ ខែកុម្ភៈ ឆ្នាំ ២០២០ នៅចំណុចវង្វង់មូលទី១ តាមមហាវិថីឈ្នះឈ្នះ ក្នុងភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ ។
ជនរងគ្រោះ ដែលស្លាប់ក្នុងគ្រោះថ្នាក់នេះត្រូវនគរបាលឲ្យដឹងថា ឈ្មោះញឹម ណារ៉ុង អាយុ២៥ឆ្នាំ ជាកម្មករសំណង់ មានលំនៅ ភូមិ ប្រាសាទ ឃុំចំពោរលើ ស្រុកស្ទោង ខេត្តកំពង់ធំ ។ ចំណែក អ្នករងរបួសធ្ងន់ឈ្មោះផល ស្រីពៅ អាយុ១៤ឆ្នាំ ជាកម្មករសំណង់ បានរងរបួសធ្ងន់បញ្ជូនទៅកាន់មណ្ឌលសុខភាព ព្រែកព្នៅ បើកម៉ូតូម៉ាកហុងដា ឌ្រីម ពណ៌ខ្មៅ ពាក់ស្លាកលេខបាតដំបង 1T.8190 បើកបរ ដោយឈ្មោះផល ភ័ក្រ អាយុ ១៨ឆ្នាំ ។ ចំណែករថយន្តបង្កបានគេចខ្លួនបាត់ ។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុជនរងគ្រោះ៣នាក់បងប្អូនបង្កើត បានជិះម៉ូតូមួយគ្រឿងដោយនាងដែលបានស្លាប់ជិះក្រោយ ប្អូនស្រីរងរបួសជិះកណ្តាលហើយ ប្អូនប្រុសម្នាក់ទៀតជាអ្នកឌុបធ្វើដំណើរ តាមមហាវិថីឈ្នះឈ្នះ ក្នុងទិសដៅពីលិច ទៅកើត ។
ខណៈធ្វើដំណើរមកដល់កន្លែងកើតហេតុ ដែលជាចំណុច វង្វង់មូលស្រាប់តែមានរថយន្តមួយគ្រឿង មិនស្គាល់ម៉ាកធ្វើដំណើរស្របគ្នា បើកមកកៀរ បណ្តាលឲ្យនារីរងគ្រោះ ដួលផ្កាប់មុខ ហើយត្រូវរថយន្ត កិនចំដងខ្លួន ស្លាប់នៅកន្លែង ចំណែកប្អូនស្រីរងធ្ងន់ និងប្អូនប្រុសដែលជាអ្នកឌុបរងរបួសស្រាល ។ ក្រោយកើតហេតុរថយន្តបង្ក ដែលសាក្សីបានអះអាងថា ជារថយន្តប្រភេទឃ្លុប បានបើកគេចខ្លួនបាត់ ។
បន្ទាប់ពីគ្រោះថ្នាក់អ្នករងរបួសត្រូវបានរថយន្តបញ្ជូនទៅសង្គ្រោះនៅមណ្ឌលភាពព្រែកព្នៅ សពត្រូវបានក្រុមគ្រួសារបញ្ជូនទៅស្រុកកំណើតធ្វើបុណ្យតាមប្រពៃណី ៕ដោយ÷007
